قازاقستان باۋىرلاس حالىقتاردىڭ ىنتىماقتاستىعىن ارتتىرۋدى كوزدەيدى

استانا. KAZINFORM - سەنات ءتوراعاسى ماۋلەن اشىمبايەۆ تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋمەن كەزدەستى.

سۇحبات بارىسىندا تاراپتار ەكى ەل اراسىنداعى ىنتىماقتاستىقتى ودان ءارى نىعايتۋ جانە ستراتەگيالىق سەرىكتەستىكتى كەڭەيتۋ ماسەلەلەرىن تالقىلادى. بۇل تۋرالى ق ر پارلامەنتى سەناتىنىڭ باسپا ءسوز قىزمەتى ءمالىم ەتتى.

ءوز سوزىندە ماۋلەن اشىمبايەۆ مۇستافا قاپۋدجۋنى بىلتىر تۇركيا رەسپۋبليكاسىنىڭ قۇرىلعانىنا 100 جىل تولۋىمەن قۇتتىقتادى. ول قازاقستاننىڭ تۇركيامەن ىنتىماقتاستىعى تەرەڭنەن تامىر تارتاتىنىن، ەكى ەلدىڭ مادەني-تاريحي قۇندىلىقتارى ورتاق ەكەنىن ايتتى. سونداي-اق پالاتا سپيكەرى تۇركيامەن قارىم-قاتىناس ەلىمىزدىڭ سىرتقى ساياساتىنىڭ ماڭىزدى باعىتتارىنىڭ ءبىرى ەكەنىن، ءوزارا جان-جاقتى ستراتەگيالىق سەرىكتەستىككە مەملەكەت باسشىلارىنىڭ دوستىق پەن قۇرمەتكە نەگىزدەلگەن بايلانىسى ۇلكەن سەرپىن بەرەتىن تىلگە تيەك ەتتى.

«ءبىز تۇركيانىڭ ۇلى ۇلتتىق جينالىسىمەن ىنتىماقتاستىقتى دامىتۋعا جانە زاڭنامالىق باعىتتا تاجىريبە الماسۋعا مۇددەلىمىز. ەكى ەلدىڭ پارلامەنتتەرىندە جۇمىس ىستەيتىن «قازاقستان-تۇركيا» پارلامەنتارالىق دوستىق توپتارىنىڭ الەۋەتىن ودان ءارى دامىتۋدىڭ ماڭىزى زور. تۇركىتىلدەس ەلدەردىڭ مادەني، ەكونوميكالىق جانە گۋمانيتارلىق سالاداعى بايلانىسىن نىعايتۋعا تۇركى مەملەكەتتەرىنىڭ پارلامەنتتىك اسسامبلەياسى دا ۇلكەن ۇلەس قوسىپ وتىر. سەنات دەپۋتاتتارى تۇركپا كوميسسيالارىنىڭ جۇمىسىنا جانە ونىڭ شەڭبەرىندە وتەتىن باسقا دا ءىس-شارالارعا بەلسەندى قاتىسىپ كەلەدى»، - دەدى ماۋلەن اشىمبايەۆ.

كەزدەسۋ كەزىندە استانادا وتكەن تۇركى مەملەكەتتەرى ۇيىمىنىڭ 10- سامميتىندە ايتىلعان باۋىرلاس حالىقتاردىڭ ىنتىماقتاستىعىن ارتتىرۋدى كوزدەيتىن باسىمدىقتار تۋرالى دا ءسوز بولدى.

«تۇركى مەملەكەتتەرى ۇيىمىنىڭ 10- سامميتىندە قازاقستان پرەزيدەنتى قاسىم-جومارت كەمەل ۇلى توقايەۆ اتاپ وتكەندەي، ءبىزدىڭ ەلدىڭ ۇيىمعا ءتوراعالىعى «TURKTIME!» ۇرانىمەن وتەدى. بۇل تۇجىرىمدامادا ءبىرىنشى كەزەكتەگى باسىمدىقتار بەلگىلەنگەن. ءوزارا سەنىم مەن تاريحي تامىرعا تابان تىرەگەن بىرلىگىمىزدى ساقتاۋ جانە نىعايتۋ - ءبىزدىڭ ورتاق ماقساتىمىز. استانا ءسامميتى ەلدەرىمىز اراسىنداعى ساياسي، ەكونوميكالىق جانە مادەني ىقپالداستىقتى جاڭا دەڭگەيگە كوتەرۋگە سەپتىگىن تيگىزدى دەپ ەسەپتەيمىز»، - دەگەن ماۋلەن اشىمبايەۆ قازاقستان پارلامەنتىنىڭ سەناتى ەكى ەلدىڭ قارىم-قاتىناسىن ودان ءارى نىعايتۋ جولىنداعى ءتيىستى جۇمىستى جالعاستىرا بەرەتىنىن اتاپ ءوتتى.

سونىمەن قاتار سەنات ءتوراعاسى مەملەكەت باسشىسىنىڭ باستاماسىمەن قازاقستاندا ىسكە اسىرىلىپ جاتقان الەۋمەتتىك-ساياسي جانە ەكونوميكالىق رەفورمالار بارىسىنا جانە پالاتانىڭ زاڭ شىعارۋ قىزمەتىنە توقتالدى.

ءوز كەزەگىندە مۇستافا كاپۋدجۋ قازاقستاندا جۇرگىزىلىپ جاتقان رەفورمالاردى جوعارى باعالاپ، تۇركى حالىقتارى اراسىنداعى ءوزارا ءىس-قيمىلدى ودان ءارى ارتتىرۋدىڭ ماڭىزدى ەكەنىنە نازار اۋداردى.

اۆتور

باقىتگۇل اباي قىزى