قازاقستان ازاماتتارى وزبەكستاندا ۋاقىتشا ەسەپكە تۇرماي 30 كۇن بولا الادى
استانا. KAZINORM - بۇگىن ءماجىلىستىڭ جالپى وتىرىسىندا «قازاقستان مەن وزبەكستان ۇكىمەتتەرى اراسىنداعى ءوزارا ساپارلاردىڭ شارتتارى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلداندى.
«حاتتاماعا مەملەكەت باسشىسىنىڭ تاشكەنتكە ساپارى بارىسىندا 2022 -جىلعى جەلتوقساندا قول قويىلدى. بۇل قۇجاتپەن ەكى ەل ازاماتتارى ءۇشىن بىردەي نەگىزدە ۋاقىتشا ەسەپكە تۇرماي 30 كۇن بولۋ بەلگىلەنبەك. وسى مەرزىم اياقتالعاننان كەيىن ولار ۋاقىتشا تۇرۋعا رۇقسات الۋعا مىندەتتى. نەگىزدەرى - جۇمىس ىستەۋ، ەمدەلۋ، وقۋ، وتباسىمەن بىرىگۋ، بيزنەس جۇرگىزۋ. وسىلايشا، ءبىز كوشى-قوندى باقىلايمىز. ودان باسقا بولۋ مەرزىمدەرىن جاڭارتۋ ماسەلەسى شەشىلمەك. ءبىراق ولاردىڭ بولۋ مەرزىمى التى اي ىشىندە 90 تاۋلىكتەن اسپاۋى ءتيىس»، - دەدى زاڭ جوباسىن تانىستىرعان ىشكى ىستەر ءمينيسترى ەرجان سادەنوۆ.
ونىڭ اتاپ وتۋىنشە، بۇگىندە قازاقستان ازاماتتار وزبەكستاندا 5 كۇن ىشىندە تىركەۋدەن وتۋگە مىندەتتى.
«ال قازاقستاندا مىندەتتى تىركەۋ مەن كوشى-قون كارتوچكالارى بارلىق شەتەلدىكتەر ءۇشىن 2020-جىلدان باستاپ تالاپ ەتىلمەيدى. بۇل تۇزەتۋ ءبىزدىڭ باستاما بويىنشا ازىرلەندى. وزبەكستان تاراپى حاتتامانى وتكەن جىلدىڭ ساۋىرىندە راتيفيكاتسيالادى. حاتتامانى راتيفيكاتسيالاۋ ازاماتتاردىڭ بولۋى ءۇشىن قولايلى جاعداي جاساپ، ەكى ەلدىڭ ىنتىماقتاستىعىن نىعايتادى»، - دەدى ول.
اۆتور
مارلان جيەمباي
