قازاقستان اۆتوكولىكپەن رەسەي مەن بەلارۋستى اينالىپ وتەتىن بالاما باعدار قاراستىرىپ جاتىر

قازاقستان اۆتوكولىكپەن جۇك تاسىمالداۋ ءۇشىن رەسەي مەن بەلارۋستى اينالىپ وتەتىن بالاما باعدار قاراستىرىپ جاتىر. بۇل تۋرالى ۇكىمەت وتىرىسىندا كولىك ۆيتسە- ءمينيسترى ءساتجان ابلاليەۆ ايتتى، دەپ حابارلايدى Kazinform.

«سوڭعى جىلدارى اۆتوتاسىمالدىڭ وڭ سەرپىنى ەۋروپا ەلدەرىمەن ەكسپورت/يمپورتتا دا بايقالۋدا. وتكەن جىلى وسى باعىتتاردا قازاقستاندىق تاسىمالداۋشىلاردىڭ ۇلەسى 13 پايىزعا ءوسىپ 48 پايىزعا جەتتى. بۇل ەل ەكونوميكاسىنا شامامەن 80 ميلليارد تەڭگەدەي قوسىمشا ءتۇسىم اكەلدى. الايدا، بۇگىنگى تاڭدا بەلارۋس پەن ەۋروپا ەلدەرى اراسىنداعى ورنالاسقان 13 وتكىزۋ پۋنكتىنىڭ 8- ءى جانە رەسەي مەن فينليانديا اراسىنداعى بارلىق 8 وتكىزۋ پۋنكتتەرى جابىلعان. بەلارۋس تاراپىنىڭ اقپاراتى بويىنشا ەۋروپالىق پۋنكتتەر جالپى قۋاتىنىڭ 40 پايىزىمەن عانا جۇمىس جاساۋدا»، - دەدى ءساتجان ابلاليەۆ.

ونىڭ اتاپ وتۋىنشە، بۇل جاعداي قازاقستاندىق اۆتوكولىك قۇرالدارىن بەلارۋس جانە ليتۆا، لاتۆيا شەكارالارىندا ۇزاق مەرزىم توقتاپ تۇرۋعا ءماجبۇر ەتەدى.

«سوندىقتان جۇكتەردى ەۋروپاعا جەتكىزۋدىڭ بالاما جولى رەتىندە تۇرىكمەنستان مەن يران ەلدەرىمەن ەركىن ترانزيتتى قامتاماسىز ەتۋ ماقساتىندا كەلىسسوزدەر جۇرگىزدىك. بۇل باعىتتاعى جۇك تاسىمالىنىڭ قۇنى مەن جەتكىزۋ مەرزىمىنىڭ ارتاتىنىن اتاپ وتكەن ءجون. الايدا، اتالعان باعىت سانكسيالىق جۇكتەردى تاسىمالداۋعا، سونداي- اق ەۋروپا ەلدەرى رەسەي مەن بەلارۋس شەكارانى جاۋىپ تاستاعان جاعدايدا بىردەن-ءبىر بالاما مارشرۋت سانالادى»، - دەدى ۆيتسە- مينيستر.

اۆتور

مارلان جيەمباي