قازاقستان اسكەرىندە جاڭا قىزمەت پايدا بولدى
استانا. KAZINFORM - اسكەري بولىمدەردەگى بەينەباقىلاۋ كامەرالارىن باقىلاپ، ساراپتايتىن جاڭا قىزمەت ءتۇرى ەنگىزىلدى. بۇل تۋرالى قورعانىس مينيسترلىگىنىڭ وكىلى، پولكوۆنيك تىلەۋحان باسقوجايەۆ ءمالىم ەتتى.

- قورعانىس مينيسترلىگى اسكەري بولىمدەردە بەينەباقىلاۋ كامەرالارىن ورناتۋمەن شەكتەلمەي، قازىر كەزەكشى بولىمدەردە قوسىمشا لاۋازىم ەنگىزىلدى. ولار بەينەباقىلاۋ كامەرالارىن ساراپتاپ، قاراپ وتىرادى، ياعني جاعدايدى باقىلاپ، باياندايدى، - دەدى تىلەۋحان باسقوجايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، اسكەري بولىمدەردىڭ 60-70 پايىزىندا وپەراتور لاۋازىمى بار.
بۇعان دەيىن حابارلاعانىمىزداي اسكەردەگى ءتارتىپ بۇزۋشىلىقتىڭ %70-80 بەينەباقىلاۋ كامەراسىنىڭ كومەگىمەن انىقتالادى.
ايتا كەتەيىك، وتاندىق اسكەردە ءولىم-ءجىتىم توقتاماي تۇر، ءبىر اپتا بۇرىن سارى وزەكتە (جەتىسۋ وبلىسى) قاتارداعى جاۋىنگەر وقۋ-جاتتىعۋ كەزىندە مەرت بولدى.
سونىمەن قاتار بريفينگ بارىسىندا اسكەردە ساربازداردان اقشا جيناۋ ماسەلەسى كوتەرىلدى.
اۆتور
داۋلەت ىزتىلەۋ