قازاقستانعا رەسەيدەن اكەلىنگەن تاقتايدان قاۋىپتى كارانتيندىك زيانكەس تابىلدى

وسى دەرەك بويىنشا ءونىمدى ەلگە كىرگىزگەن كاسىپكەرگە قاتىستى اكىمشىلىك شارالار قولدانىلدى. سوت شەشىمىمەن وعان 30 ايلىق ەسەپتىك كورسەتكىش مولشەرىندە، ياعني 130 مىڭ تەڭگە شاماسىندا ايىپپۇل سالىندى.

اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ س ق و اۋماقتىق ينسپەكتسياسىنىڭ باس مامانى گۇلنار اۋباكىروۆانىڭ ايتۋىنشا، فيتوسانيتارلىق كارانتيندىك باقىلاۋ قاۋىپتى زيانكەستەردىڭ ەل اۋماعىنا ەنۋى مەن تارالۋىنىڭ الدىن الۋعا باعىتتالعان. سوندىقتان كارانتينگە جاتاتىن ونىمدەردى اكەلۋ كەزىندە فيتوسانيتارلىق تالاپتاردى ساقتاۋ مىندەتتى. بۇل ەلىمىزدىڭ فيتوسانيتارلىق قاۋىپسىزدىگىن قامتاماسىز ەتۋگە مۇمكىندىك بەرەدى.

مامانداردىڭ ايتۋىنشا، بۇل بيىلدىققا تىركەلگەن العاشقى وسىنداي جاعداي. وتكەن جىلى وڭىردە كارانتيندىك نىسانداردىڭ بەس دەرەگى انىقتالعان. ولاردىڭ باسىم بولىگىندە دە زيانكەستەر شەتەلدەن اكەلىنگەن تاقتايلاردان تابىلعان.

اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ مالىمەتىنشە، قارا سۇگەن قوڭىزى اعاشقا زيان كەلتىرەتىن اسا قاۋىپتى تەحنيكالىق زيانكەستەردىڭ ءبىرى. بۇل جاندىكتەردىڭ 1,5 مىڭ ءتۇرى كەزدەسەدى. ولار اعاشتىڭ قابىعىن، سۇرەگىن زاقىمدايدى. اسىرەسە دەرناسىلدەرى اعاش ىشىندە دامىپ، ورمان جانە اۋىل شارۋاشىلىعىنا ەلەۋلى زيان كەلتىرەدى.

بۇل جاندىكتەر اعاشتى ءبۇلدىرىپ قانا قويماي، ورمانعا اسا قاۋىپتى پارازيت - قاراعاي دىڭگەك نەماتوداسىن تاراتادى. سونداي-اق ولار اعاشتىڭ كوگەرۋ اۋرۋىن تۋدىراتىن ساڭىراۋقۇلاق سپورالارىن دا تاسىمالدايدى. سوندىقتان ورمان اۋماقتارىن تازالاۋ، اعاش قالدىقتارىن دەر كەزىندە جويۋ جانە سۇرەكتى ۇزاق ۋاقىت قابىعىمەن ساقتاماۋ سەكىلدى الدىن الۋ شارالارىن ساقتاۋ ماڭىزدى.

بۇعان دەيىن ەلگە زاڭسىز اكەلىنگەن كارانتيندىك ونىمدەردىڭ جولى كەسىلگەنىن جازعان ەدىك.