قازاقستاندا زاڭسىز اڭ اۋلاعاندارعا قانشا ايىپپۇل سالىنادى
استانا. KAZINFORM - قازاقستاندا ەرەكشە قورعالاتىن تابيعي اۋماقتاردا اڭشىلىق قاعيدالارىن بۇزعان ازاماتتارعا 70 ا ە ك مولشەرىندە ايىپپۇل سالۋ نەمەسە ەكى جىلعا دەيىن اڭ اۋلاۋ قۇقىعىنان ايىرۋ جازاسى قاراستىرىلعان، دەپ حابارلايدى ورمان شارۋاشىلىعى جانە جانۋارلار دۇنيەسى كوميتەتى.
ۆەدومستۆو مالىمەتىنشە، ءتيىستى رۇقساتسىز، بەلگىلەنگەن مەرزىمنەن تىس، تىيىم سالىنعان اۋماقتاردا نەمەسە زاڭسىز تاسىلدەرمەن اڭ اۋلاۋ زاڭنامادا كوزدەلگەن جاۋاپكەرشىلىككە اكەپ سوعادى.
اكىمشىلىك قۇقىق بۇزۋشىلىق تۋرالى كودەكستىڭ 382-بابىنىڭ 3-بولىگىنە سايكەس، ەرەكشە قورعالاتىن تابيعي اۋماقتاردا اڭشىلىق قاعيدالارىن بۇزعان جەكە تۇلعالارعا 70 ا ە ك مولشەرىندە ايىپپۇل سالۋ ( 303000 تەڭگە) نەمەسە ەكى جىلعا دەيىن اڭ اۋلاۋ قۇقىعىنان ايىرۋ كوزدەلگەن.
سونىمەن قاتار قۇقىق بۇزۋشىلىق جاساۋعا پايدالانىلعان زاتتار مەن قۇرالدار تاركىلەنەدى.
- زاڭسىز اڭشىلىق جانۋارلار دۇنيەسىنە قاۋىپ ءتوندىرىپ، تابيعي تەپە-تەڭدىككە زيان كەلتىرەدى، - دەپ ەسكەرتتى كوميتەت.
ۆەدومستۆو ازاماتتاردى اڭشىلىق قاعيدالارىن ساقتاۋعا جانە جابايى تابيعاتقا جاۋاپكەرشىلىكپەن قاراۋعا شاقىردى.
ايتا كەتەيىك، بۇعان دەيىن شىعىس قازاقستان وبلىسىنىڭ زايسان قالاسىندا زاڭسىز اڭشىلىققا قاتىسى بولۋى مۇمكىن دەگەن كۇدىكپەن 10 ادام ۇستالعان ەدى. ولاردىڭ توعىزى شەتەل ازاماتى ەكەنى حابارلاندى.
