قازاقستاندا ميللياردەرلەر قاتارى تاعى ءبىر ادامعا تولىقتى

مينيستر Facebook پاراقشاسىنداعى جازباسىندا، Higgsfield كومپانياسىنىڭ نەگىزىن قالاۋشىلاردىڭ ءبىرى الەكس ماشرابوۆقا قازاقستان ازاماتىنىڭ پاسپورتىن تابىستاعانىن جازعان.

— Higgsfield كومپانياسىنىڭ تەڭ قۇرىلتايشىسى الەكس ماشرابوۆقا قازاقستان ازاماتىنىڭ ءتولقۇجاتىن قۋانا تابىستادىم. بيىلعى 30 -قازاندا مەملەكەت باسشىسى قاسىم-جومارت كەمەل ۇلى توقايەۆ ءتيىستى جارلىققا قول قويدى. وسى ماڭىزدى وقيعامەن قۇتتىقتايمىن.

پرەزيدەنت جاساندى ينتەللەكتىنى دامىتۋعا جانە تالانتتاردى قولداۋعا ەرەكشە ءمان بەرەدى. ءبىز بولاشاق تەحنولوگيالارىن جاسايتىن مامانداردىڭ ءوز جوسپارلارىن قازاقستانمەن بايلانىستىرىپ، يدەيالارىن جۇزەگە اسىرۋعا قاجەتتى مۇمكىندىكتەردى ەلىمىزدەن تاپقانىن قالايمىز، — دەپ جازدى مينيستر.

جاسلان ماديەۆتىڭ ايتۋىنشا، قازاقستان بولاشاق تەحنولوگيالارىن جاساپ جۇرگەن ادامداردىڭ ءوز جوسپارلارىن ەلىمىزبەن بايلانىستىرىپ، وسىندا ءوز يدەيالارىن جۇزەگە اسىرۋعا مۇمكىندىك تاپقانىن قالايدى.

— سىزدەردىڭ تابىستارىڭىز — جاستارىمىز ءۇشىن جارقىن ۇلگى. بۇل قازاقستاندا ەڭبەك ەتە وتىرىپ، الەمدىك دەڭگەيدەگى تەحنولوگيالار جاساۋعا، جەتەكشى كومپانيالارمەن باسەكەگە ءتۇسىپ، حالىقارالىق نارىقتاردى باعىندىرۋعا بولاتىنىن كورسەتەدى.

الەكس، قازاقستانعا سەنىم ءبىلدىرىپ، ەلىمىزدىڭ ازاماتى بولۋدى تاڭداعانىڭىز ءۇشىن راقمەت. بىرلەسە تالانتتاردى قولداپ، جاڭا ونىمدەر جاساپ، قازاقستاننىڭ تەحنولوگيالىق الەۋەتىن نىعايتامىز دەپ سەنەمىن. قازاقستان ازاماتتىعىن الۋىڭىزبەن قۇتتىقتايمىن، الەكس، — دەدى جاسلان ماديەۆ.

الەكس ماشرابوۆ - جاساندى ينتەللەكت سالاسىنداعى تانىمال كاسىپكەر، قازاقستاننىڭ تۇڭعىش «ەدينوروگ» (unicorn) ستارتاپى سانالاتىن Higgsfield AI كومپانياسىنىڭ نەگىزىن قالاۋشىسى جانە باس ديرەكتورى. 

 Higgsfield AI كومپانياسىنداعى ۇلەسى ($1 ميلليارد - $2 ميلليارد)

 2026 -جىلدىڭ تامىز ايىندا Higgsfield AI ستارتاپى حالىقارالىق ينۆەستورلاردان (سونىڭ ىشىندە NVIDIA چيپ الىبى بار) 400 ميلليون دوللار ينۆەستيتسيا تارتىپ، كومپانيانىڭ جالپى نارىقتىق باعاسى 5,4 ميلليارد دوللارعا جەتتى. ساراپشىلاردىڭ باعالاۋىنشا، الەكس ماشرابوۆتىڭ كومپانياداعى ۇلەسى شامامەن %20- 30 قۇرايدى. ونىڭ وسى كومپانياداعى اكسيالارىنىڭ قۇنى عانا 1,08 ميللياردتان 2 ميلليارد دوللارعا دەيىن باعالانادى. بۇل ونى الەمدىك Forbes ميللياردەرلەر تىزىمىنە كىرۋگە ۇمىتكەر ەتەدى.

 كومپانيانىڭ نەگىزگى ينجەنەرلىك حابى الماتى قالاسىندا ورنالاسقان جانە وندا 600-گە جۋىق قازاقستاندىق IT ماماندارى جۇمىس ىستەيدى.

ماشرابوۆتىڭ بايلىعى كلاسسيكالىق شيكىزات نەمەسە مۇناي اكتيۆتەرىنە ەمەس، تولىعىمەن جوعارى تەحنولوگيالار (Deep Tech) مەن جاساندى ينتەللەكت سالاسىنداعى ينتەللەكتۋالدى مەنشىككە نەگىزدەلگەن.

ونىڭ بالالىق شاعى مەن ەرجەتكەن كەزەڭى رەسەيدىڭ چەليابينسك قالاسىندا وتكەن جانە سونداعى №31 فيزيكا-ماتەماتيكالىق ليتسەيىن بىتىرگەن. الايدا، كەيبىر اقپارات كوزدەرى مەن حالىقارالىق سۇحباتتارىندا ونىڭ وزبەكستاننىڭ ءاندىجان قالاسىندا تۋعانى نەمەسە وتباسىنىڭ سول جاقتان شىققانى ايتىلادى. ونىڭ اتا- اناسى ماشينا جاساۋ سالاسىنىڭ عالىمدارى مەن پروفەسسورلارى بولعان.

ول ۇزاق ۋاقىت بويى رەسەي مەن ا ق ش- تا (كرەمنيي القابىندا) تۇرىپ، بيزنەس جاساعان.