قازاقستاندا تۋريزمنەن تۇسكەن سالىق تۇسىمدەرى 303 ميلليارد تەڭگەگە جەتتى
استانا. KAZINFORM - قازاقستاندا تۋريزم سالاسىنان تۇسەتىن سالىق تۇسىمدەرى 303 ميلليارد تەڭگەگە جەتتى. ال شەتەلدىك تۋريستەر ەل اۋماعىندا 1,4 ميلليارد ا ق ش دوللارىن جۇمساعان. بۇل تۋرالى ق ر سپورت جانە تۋريزم ءمينيسترى ەربول مىرزابوسىنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا مالىمدەدى.
ءمينيستردىڭ ايتۋىنشا، سوڭعى كەزەڭدە تۋريزم سالاسىنىڭ نەگىزگى كورسەتكىشتەرى بويىنشا وڭ ديناميكا قالىپتاسقان. سالا ەل ەكونوميكاسىنداعى ۇلەسىن ارتتىرىپ، جۇمىسپەن قامتۋ مەن ينۆەستيتسيا تارتۋدىڭ ماڭىزدى باعىتتارىنىڭ بىرىنە اينالىپ كەلەدى.
- 2026 -جىلدىڭ ءبىرىنشى جارتىجىلدىعىندا ورنالاستىرۋ ورىندارىندا 5 ميلليونعا جۋىق ادامعا قىزمەت كورسەتىلدى. بۇل وتكەن جىلدىڭ سايكەس كەزەڭىمەن سالىستىرعاندا 5 پايىزعا كوپ. ال كورسەتىلگەن قىزمەت كولەمى 15 پايىزعا ءوسىپ، 173,7 ميلليارد تەڭگەنى قۇرادى، - دەدى ەربول مىرزابوسىنوۆ.
ونىڭ دەرەگىنشە، بۇگىندە تۋريزم سالاسىندا 565 مىڭنان استام ادام ەڭبەك ەتەدى. بۇل ەلىمىزدەگى جالپى جۇمىسپەن قامتىلعان حالىقتىڭ 6 پايىزىنا تەڭ.
سالا بيۋدجەت كىرىسىنە دە ەلەۋلى ۇلەس قوسىپ وتىر. اتاپ ايتقاندا، تۋريستىك قىزمەتتەن تۇسكەن سالىق تۇسىمدەرىنىڭ كولەمى 303 ميلليارد تەڭگەگە جەتكەن. بۇل جالپى سالىق تۇسىمدەرىنىڭ 2,1 پايىزىن قۇرايدى.
بۇدان بولەك، شەتەلدىك تۋريستەردىڭ قازاقستاندا جۇمساعان قاراجاتى 1,4 ميلليارد ا ق ش دوللارىنا جەتكەن. مينيستر بۇل كورسەتكىش ەلىمىزگە كەلەتىن تۋريستەردىڭ ۇلتتىق ەكونوميكاعا قوساتىن ۇلەسى ارتىپ كەلە جاتقانىن اڭعارتاتىنىن اتاپ ءوتتى.
تۋريزم سالاسىنا ينۆەستيتسيا تارتۋ باعىتىندا دا ءوسىم بايقالادى. بيىلعى توعىز ايدا نەگىزگى كاپيتالعا سالىنعان ينۆەستيتسيا كولەمى 1 تريلليون 319 ميلليارد تەڭگەنى قۇراعان. بۇل 2025 -جىلدىڭ سايكەس كەزەڭىندەگى كورسەتكىشتەن 68 پايىزعا جوعارى.
ءمينيستردىڭ سوزىنشە، الداعى كەزەڭدەگى نەگىزگى مىندەت - قازاقستاننىڭ تۋريستىك الەۋەتىن تولىق پايدالانىپ، سالانىڭ ەكونوميكالىق تيىمدىلىگىن ارتتىرۋ جانە ەلدى حالىقارالىق تۋريستىك باعىت رەتىندە دامىتۋ.
ايتا كەتەيىك، ىشكى تۋريزم %84,4 ءوستى.