قازاقستاندا ەۋروپالىق وداق ستراتەگيالىق رەسۋرس رەتىندە تانىعان 34 شيكىزاتتىڭ 21 ى بار - توقايەۆ
استانا. KAZINFORM - قاسىم-جومارت توقايەۆ قازاقستان- گەرمانيا بيزنەس فورۋمىندا ەنەرگەتيكا ينفراقۇرىلىمىن جاڭعىرتۋ بويىنشا بىرلەسكەن جوبالار ءتىزىمىن جاساقتاۋدى ۇسىندى. بۇل تۋرالى اقوردا حابارلادى.
مەملەكەت باسشىسى اسا ماڭىزدى ماتەريالدار سالاسىنداعى ىنتىماقتاستىققا توقتالدى. قازاقستاندا ەۋروپالىق وداق ستراتەگيالىق رەسۋرس رەتىندە تانىعان 34 شيكىزات ءتۇرىنىڭ 21 ى بار.
- گەرمانياعا سەنىمدى جانە ءبىر باعىتقا تاۋەلدى بولمايتىن شيكىزات جەتكىزۋ جولدارى قاجەت. ال قازاقستان قوسىلعان قۇنى جوعارى ءونىم تىزبەگىن قالىپتاستىرۋ ءۇشىن ينۆەستيتسيا مەن وزىق تەحنولوگياعا مۇددەلى. وسىعان ارقا سۇيەپ، مىقتى ستراتەگيالىق سينەرگيا جاساۋعا بولادى. گەولوگيالىق بارلاۋدان جانە كەن وندىرۋدەن باستاپ ونى وڭدەۋ جانە قازاقستاندا جوعارى تەحنولوگيالىق ماتەريالدار شىعارۋ ساتىلارىن تولىق قامتيتىن ءىرى جوبالاردى ايقىنداۋ ىنتىماقتاستىقتىڭ كەلەسى كەزەڭى بولۋعا ءتيىس، - دەدى قاسىم-جومارت توقايەۆ.
پرەزيدەنتتىڭ پىكىرىنشە، اۋىل شارۋاشىلىعىنداعى سەرىكتەستىكتى كەڭەيتۋگە ايتارلىقتاي الەۋەت بار.
- 2025 -جىلى اۋىل شارۋاشىلىعى ونىمدەرىنىڭ الىس-بەرىسى 23 پايىزعا ۇلعايعان، ال قازاقستاننان گەرمانياعا ەكسپورتتالاتىن اگرارلىق ونىمدەر 38 پايىزعا ارتقان. ەندىگى قادام - قوسىلعان قۇنى جوعارى ءونىم شىعارۋدىڭ بۇكىل تىزبەگى ەنەتىن ورتاق جوبالاردى ىسكە اسىرۋ. ياعني عىلىمي نەگىزدەگى ەگىن شارۋاشىلىعى مەن سۋ ۇنەمدەيتىن وندىرىستەن باستاپ، ءونىمدى قايتا وڭدەۋ، ساقتاۋ جانە ەكسپورت ساتىلارى تولىق قامتىلۋعا ءتيىس، - دەدى مەملەكەت باسشىسى.
بىرلەسكەن جۇمىستىڭ تاعى ءبىر ماڭىزدى باعىتى - ەنەرگەتيكا. پرەزيدەنتتىڭ ايتۋىنشا، قازاقستان ەۋروپاعا مۇناي جەتكىزۋشى ەلدەردىڭ ءبىرى رەتىندە ەنەرگەتيكالىق قاۋىپسىزدىككە ەلەۋلى ۇلەس قوسىپ كەلەدى.
- Siemens Energy كومپانياسىمەن ىنتىماقتاستىعىمىز، سونىڭ ىشىندە KEGOC ۇلتتىق ەلەكتر جەلىلەرىنىڭ وپەراتورىمەن بىرلەسە اتقارىپ جاتقان جۇمىسى بۇل باعىتتا ايتارلىقتاي الەۋەت بار ەكەنىن كورسەتەدى. ءبىز اتالعان سالاداعى سەرىكتەستىك اياسىن كەڭەيتىپ، ەنەرگەتيكا ينفراقۇرىلىمىن جاڭعىرتۋ بويىنشا بىرلەسكەن جوبالار ءتىزىمىن جاساقتاۋدى ۇسىنامىز. ەگەر اتالعان جوبالار ەكونوميكالىق تۇرعىدان ءتيىمدى بولسا، كەيبىر قۇرال- جابدىقتاردى سىرتتان اكەلمەي، قازاقستاندا وندىرگەن ءجون. ناقتى ينۆەستيتسيالىق جوبانى ىسكە اسىرۋ ارقىلى ورتالىق ازيا ەلدەرى نارىعىنا شىعۋعا بولادى، - دەدى پرەزيدەنت.
قاسىم-جومارت توقايەۆ ەكى ەلدىڭ قارىم-قاتىناسىن ورتالىق ازيا مەن ەۋروپا اراسىنداعى ەكونوميكالىق بايلانىستاردى نىعايتاتىن كوپىرگە بالادى.
https://kaz.inform.kz/news/kazakstanda-europalik-odak-strategiyalik-resurs-retnde-tanigan-34-shikzat-turnn--a6d36881
