قازاقستاندا قار باسۋ قاۋپى بار جولدار 400 شاقىرىمعا قىسقاردى
استانا. KAZINFORM - سوڭعى ءۇش جىلدا رەسپۋبليكالىق ماڭىزى بار اۆتوموبيل جولدارىنىڭ قار باسۋ قاۋپى جوعارى ۋچاسكەلەرى 400 شاقىرىمنان استامعا قىسقاردى. قازىر مۇنداي جولداردىڭ جالپى ۇزىندىعى 2,2 مىڭ شاقىرىمعا جۋىق. بۇل تۋرالى «قازاۆتوجول» ۇ ك» ا ق باسقارما ءتوراعاسى دارحان يماناشيەۆ ورتالىق كوممۋنيكاتسيالار قىزمەتىندە وتكەن بريفينگىدە مالىمدەدى.
كومپانيا دەرەگىنە سايكەس، 2023 -جىلى قار باسۋ قاۋپى بار جولداردىڭ ۇزىندىعى 2,6 مىڭ شاقىرىم بولعان. قازىر بۇل كورسەتكىش 16 پايىزعا ازايعان.
جولداردى قاردان قورعاۋ ءۇشىن ارنايى قورشاۋلار مەن جاسىل بەلدەۋلەر ورناتىلىپ جاتىر. ماسەلەن، تۇراقتى تەمىربەتون قار توقتاتقىش قورشاۋلاردىڭ ۇزىندىعى 403 شاقىرىمنان 832 شاقىرىمعا دەيىن ۇلعايعان.
بۇدان بولەك، رەسپۋبليكالىق جولداردىڭ بويىندا جالپى ۇزىندىعى 6063 شاقىرىم بولاتىن قار توقتاتاتىن ورمان بەلدەۋلەرى جانە 101 شاقىرىم ۋاقىتشا قورعانىش قالقانى بار.
— بۇل قورشاۋلار جەل ايداپ اكەلگەن قاردى جولعا جەتكىزبەي توقتاتادى. سونىڭ ارقاسىندا جولدى قاردان قايتا-قايتا تازارتۋ قاجەتتىلىگى ازايادى، - دەدى دارحان يماناشيەۆ.
ونىڭ سوزىنشە، مۇنداي شارالار قىس مەزگىلىندە جولداردىڭ اشىق بولۋىنا جانە كولىك قوزعالىسىنىڭ قاۋىپسىزدىگىن ساقتاۋعا باعىتتالعان.
بۇعان دەيىن رەسپۋبليكالىق ماڭىزى بار اۆتوموبيل جولدارىن قىسقى كۇتىپ ۇستاۋعا ارنالعان تەحنيكانىڭ دايىندىعى جونىندە جازعان ەدىك.
