قازاقستاندا ۇلتتىق ونەردى ناسيحاتتايتىن جاڭا جوبا ءتۇسىرىلىپ جاتىر - ەرلان قارين
استانا. KAZINFORM- قازاقستاندا ۇلتتىق ونەردى دارىپتەپ، ناسيحاتتاۋعا ارنالعان جاڭا جوبانىڭ ءتۇسىرىلىمى باستالدى. وعان بەلگىلى كۇيشىلەر، مۋزىكاتانۋشى عالىمدار جانە ۇلتتىق ونەر تاريحىن زەرتتەيتىن ساراپشىلار شاقىرىلدى. بۇل تۋرالى ق ر ۆيتسە-پرەزيدەنتى ەرلان قارين ءوزىنىڭ Instagram پاراقشاسىنا جازدى.
24 -قازاندا وتكەن يدەولوگيالىق كەڭەس وتىرىسىندا پرەزيدەنت تاپسىرمالارىنىڭ ورىندالۋ بارىسى جان-جاقتى تالقىلاندى. سونىمەن قاتار ەرلان قارين وتاندىق ديزاينەرلەرمەن كەزدەسىپ، ۇلتتىق ايدەنتيكانى دامىتۋ جونىندە پىكىر الماستى.
- جاڭا قوعامدىق ەتيكانى قالىپتاستىرۋ ماسەلەسىنە دە ەرەكشە نازار اۋدارىلدى. مەملەكەت باسشىسى بۇعان دەيىن وسى باعىت بويىنشا ناقتى تاپسىرمالار بەرگەن بولاتىن. كەزدەسۋ بارىسىندا قويىلعان مىندەتتەردى جۇزەگە اسىرۋعا باعىتتالعان قازاقستاندىق قوعامدىق دامۋ ينستيتۋتىنىڭ جاڭا جوبالارى تانىستىرىلدى، — دەپ جازدى ەرلان قارين.
بۇدان بولەك، قازاقستان ۆيتسە-پرەزيدەنتى ۇلتتىق ونەردى دارىپتەپ، ناسيحاتتاۋعا ارنالعان جاڭا جوبانىڭ ءتۇسىرىلىم الاڭىنا باردى.
- وعان ەلىمىزدىڭ بەلگىلى كۇيشىلەرى، مۋزىكاتانۋشى عالىمدار، ۇلتتىق ونەردىڭ تاريحىمەن اينالىساتىن ساراپشى- ماماندار شاقىرىلعان. ءتۇسىرىلىم جۇمىستارى كەشە باستالدى. تاعى بىرنەشە كۇنگە سوزىلادى. بۇل جوبا جونىندە الداعى كۇندەرى كەڭىرەك ايتاتىن بولامىن، — دەدى ەرلان قارين.
بۇعان دەيىن ەرلان قارين قازاقستاننىڭ ىشكى ساياساتىنداعى نەگىزگى ءۇش باسىمدىقتى اتادى.
