قازاقستاندا كىمدەر ميلليون تەڭگەدەن ارتىق جالاقى الادى

 Kazinform ءتىلشىسى ۇلتتىق ستاتيستيكا بيۋروسىنىڭ دەرەكتەرىن زەردەلەپ، ەلدەگى جالاقى دەڭگەيىنە قانداي فاكتورلار اسەر ەتەتىنىن انىقتادى.

جاريالانعان مالىمەتتەرگە سايكەس، قازاقستاندا ورتاشا ساعاتتىق جالاقى 2508 تەڭگەنى قۇرايدى. ەر ادامدار ساعاتىنا ورتا ەسەپپەن 2859 تەڭگە السا، ايەلدەردىڭ جالاقىسى — 2180 تەڭگە، ياعني زەرتتەلگەن دەرەكتەر بويىنشا ايەلدەردىڭ ساعاتتىق ەڭبەكاقىسى ەرلەرگە قاراعاندا شامامەن 24 پايىزعا تومەن.

جالاقى مولشەرىنە قىزمەتكەرلەردىڭ جاسى دا اسەر ەتەدى. ەڭ جوعارى ورتاشا ساعاتتىق جالاقى 35- 44 جاس ارالىعىنداعى قازاقستاندىقتارعا تيەسىلى — 2773 تەڭگە. ال 45- 54 جاس توبىندا بۇل كورسەتكىش ءسال تومەندەپ، 2658 تەڭگەنى قۇرايدى. 25- 34 جاستاعى قىزمەتكەرلەر ساعاتىنا ورتا ەسەپپەن 2396 تەڭگە الادى. 16- 24 جاس ارالىعىنداعى جاستاردىڭ ساعاتتىق جالاقىسى — 1757 تەڭگە. ال 65 جاستان اسقان جۇمىسشىلاردا بۇل كورسەتكىش 1947 تەڭگەگە تەڭ.

الايدا جالاقى ايىرماشىلىعى تەك جاس پەن جىنىسقا بايلانىستى ەمەس. وڭىرلەر اراسىندا دا ايتارلىقتاي الشاقتىق بار. ماسەلەن، ورتاشا ساعاتتىق جالاقىنىڭ ەڭ جوعارى كورسەتكىشى الماتى قالاسىندا تىركەلگەن — 3471 تەڭگە. ەكىنشى ورىندا استانا قالاسى — 3286 تەڭگە. جالاقىسى جوعارى وڭىرلەر قاتارىندا ماڭعىستاۋ وبلىسى (3188 تەڭگە)، ۇلىتاۋ وبلىسى (3186 تەڭگە) جانە اتىراۋ وبلىسى (3134 تەڭگە) بار.

ال ءبىرقاتار وڭىردە ساعاتتىق ەڭبەكاقى الدەقايدا تومەن. مىسالى، تۇركىستان وبلىسىندا بۇل كورسەتكىش 1771 تەڭگە، سولتۇستىك قازاقستان وبلىسىندا — 1823 تەڭگە، جەتىسۋ وبلىسىندا 1847 تەڭگە. سالىستىرساق، الماتى مەن تۇركىستان وبلىسىنداعى ساعاتتىق جالاقىنىڭ ايىرماشىلىعى ەكى ەسەگە جۋىق.

ۇلتتىق ستاتيستيكا بيۋروسى جەكەلەگەن ماماندىقتار بويىنشا دا مالىمەت ۇسىنعان. ولاردىڭ اراسىندا ورتاشا ايلىق اتاۋلى جالاقى مولشەرى بويىنشا ۇيىم باسشىلارى كوش باستاپ تۇر. ولاردىڭ تابىسى — 1101149 تەڭگە. سەح باسشىلارى ورتا ەسەپپەن 938340 تەڭگە، ال مامانداندىرىلعان بولىمشەلەردىڭ باسشىلارى 715233 تەڭگە الادى.

ينجەنەرلىك ماماندىقتار اراسىندا ەڭبەكتى قورعاۋ جونىندەگى ينجەنەرلەردىڭ جالاقىسى 645015 تەڭگەنى، ينجەنەر-تەحنولوگتاردىڭ جالاقىسى 616991 تەڭگەنى، ينجەنەر-ەنەرگەتيكتەردىڭ جالاقىسى 615093 تەڭگەنى قۇرايدى.

الەۋمەتتىك سالاداعى مامانداردىڭ جالاقىسى بۇدان تومەن. دارىگەرلەر ورتا ەسەپپەن 491385 تەڭگە، جوعارى وقۋ ورىندارىنىڭ وقىتۋشىلارى 467729 تەڭگە، مەكتەپ مۇعالىمدەرى 415042 تەڭگە الادى. مەدبيكەلەردىڭ ورتاشا جالاقىسى — 264636 تەڭگە، تاربيەشىلەردىكى — 271309 تەڭگە.

باسقا دا سۇرانىسقا يە ماماندىقتار بويىنشا ايىرماشىلىق بايقالادى. زاڭگەرلەردىڭ ورتاشا ايلىق جالاقىسى 541967 تەڭگەگە، ەكونوميستەردىكى 511843 تەڭگەگە، ساتۋشىلاردىكى 474611 تەڭگەگە جەتەدى. ال قوعامدىق تاماقتانۋ سالاسىندا اسپازدار ورتا ەسەپپەن 192626 تەڭگە، داياشىلار 223510 تەڭگە الادى. قوسالقى جۇمىسشىلاردىڭ جالاقىسى — 217448 تەڭگە.

ەكونوميكا سالالارى بويىنشا سالىستىرعاندا دا وسىعان ۇقساس كورىنىس بايقالادى. ورتاشا ايلىق جالاقى مولشەرى بويىنشا قارجى جانە ساقتاندىرۋ قىزمەتى كوش باستاپ تۇر - 1021234 تەڭگە. ەكىنشى ورىندا اقپارات جانە بايلانىس سالاسى، مۇندا قىزمەتكەرلەر ورتا ەسەپپەن 846260 تەڭگە الادى. كولىك جانە قويمالاۋ سالاسىندا بۇل كورسەتكىش 559627 تەڭگە، ال تۇرۋ جانە تاماقتانۋ قىزمەتتەرىندە 519215 تەڭگەنى قۇرايدى.

كوتەرمە جانە بولشەك ساۋدا سالاسىنداعى ورتاشا ايلىق جالاقى — 473705 تەڭگە، جىلجىمايتىن مۇلىكپەن وپەراتسيالار سالاسىندا — 438188 تەڭگە. مەملەكەتتىك باسقارۋ سالاسىندا قىزمەتكەرلەر ورتا ەسەپپەن 335276 تەڭگە، دەنساۋلىق ساقتاۋ جانە الەۋمەتتىك قىزمەت كورسەتۋ سالاسىندا 355102 تەڭگە الادى. ءبىلىم بەرۋ سالاسىنداعى كورسەتكىش — 327723 تەڭگە، ونەر، ويىن-ساۋىق جانە دەمالىس سالاسىندا — 315248 تەڭگە.