قازاقستاندا ەڭ جوعارى جالاقىعا ۇمىتكەرلەر - ۇشقىشتار مەن ستيۋاردەسسالار

ماۋسىم ايىمەن سالىستىرعاندا بوس جۇمىس ورىندارىنىڭ سانى %3,8- عا ازايسا، تۇيىندەمەلەر %11,5- عا ءوستى. مۇنداي وزگەرىس جاز مەزگىلىندەگى ەڭبەك نارىعىنىڭ ماۋسىمدىق ەرەكشەلىگىمەن بايلانىستى. وسى ۋاقىتتا وقۋ ورىندارىنىڭ تۇلەكتەرى ەڭبەك نارىعىنا بەلسەندى شىعىپ، جۇمىس ىزدەۋشىلەر سانى ارتادى. سونىڭ ناتيجەسىندە جۇمىس كۇشىنىڭ ۇسىنىسى سۇرانىسقا قاراعاندا جىلدامىراق وسەدى.

— سالالار بولىنىسىندە جۇمىس كۇشىنە ەڭ جوعارى ءسۇرانىس بىلىم بەرۋ سالاسىندا (23,4 مىڭ بوس جۇمىس ورنى تىركەلدى). سونداي-اق وزگە قىزمەتتەر كورسەتۋ سالاسىندا (16,0 مىڭ)، دەنساۋلىق ساقتاۋ جانە الەۋمەتتىك قىزمەت كورسەتۋ (10,3 مىڭ)، اۋىل، ورمان جانە بالىق شارۋاشىلىعى سالاسىندا (8,2 مىڭ)، وڭدەۋ ونەركاسىبىندە (6,8 مىڭ)، قۇرىلىس سالاسىندا (5,7 مىڭ) بوس جۇمىس ورنى ۇسىنىلدى، - دەلىنگەن حابارلامادا.

وڭىرلەر بويىنشا ەڭ كوپ بوس جۇمىس ورنى استانا قالاسىندا (8,8 مىڭ)، تۇركىستان وبلىسىندا (7,6 مىڭ)، پاۆلودار وبلىسىندا (7,1 مىڭ)، الماتى قالاسىندا (7,0 مىڭ) جانە اقمولا وبلىسىندا (6,9 مىڭ) جاريالانعان.

بىلىكتىلىك دەڭگەيى بويىنشا جۇمىس بەرۋشىلەردىڭ سۇرانىسىندا ورتا دەڭگەيدەگى ماماندارعا ارنالعان بوس جۇمىس ورىندارىنىڭ ۇلەسى باسىم بولىپ، بارلىق ۇسىنىستىڭ %38,8- ىن قۇرادى. تومەن بىلىكتىلىكتى قاجەت ەتەتىن جۇمىس ورىندارىنىڭ ۇلەسى %30,7، ال جوعارى بىلىكتى ماماندارعا ارنالعان بوس جۇمىس ورىندارىنىڭ ۇلەسى %30,5 بولدى.

— شىلدە ايىندا جۇمىس ىزدەۋشىلەر 141,2 مىڭ تۇيىندەمە جاريالادى. ولاردىڭ ىشىندە 35 جاسقا دەيىنگى ازاماتتاردىڭ ۇلەسى - %54، بۇل جاز مەزگىلىندە وقۋ ورىندارى تۇلەكتەرىنىڭ ەڭبەك نارىعىنا بەلسەندى شىعۋىمەن بايلانىستى. 35- 44 جاس ارالىعىنداعى ازاماتتار - %25، 45- 54 جاس ارالىعى - %14، 55 جاستان اسقاندار - %7. گەندەرلىك قۇرام بويىنشا تۇيىندەمەلەردىڭ %57- ىن ايەلدەر، %43- ىن ەرلەر ورنالاستىرعان، - دەپ حابارلادى ۆەدومستۆودان.

جۇمىس كۇشى ۇسىنىسىنىڭ بىلىكتىلىك قۇرىلىمى ەڭبەك نارىعىنداعى سۇرانىسقا جالپى سايكەس كەلەدى. ورتا دەڭگەيدەگى بىلىكتىلىگى بار مامانداردىڭ ۇلەسىنە تۇيىندەمەلەردىڭ %38- ى، جوعارى بىلىكتى ماماندارعا - %38، ال تومەن بىلىكتىلىكتى جۇمىس ىزدەۋشىلەرگە %24 تيەسىلى.

ۇسىنىلعان جالاقى مولشەرى بويىنشا شىلدە ايىنداعى ەڭ جوعارى ەڭبەكاقى باعدارلامالىق قامتاماسىز ەتۋ ارحيتەكتورى لاۋازىمىنا (شامامەن 1,12 ميلليون تەڭگە)، ۇشۋ قاۋىپسىزدىگى جونىندەگى ينجەنەر- ينسپەكتورعا (شامامەن 0,91 ميلليون تەڭگە) جانە ماركەتينگ پەن ءونىمدى وتكىزۋ ءبولىمىنىڭ باستىعىنىڭ ورىنباسارىنا (شامامەن 0,90 ميلليون تەڭگە) ۇسىنىلدى.

ال جۇمىس ىزدەۋشىلەر اراسىندا ەڭ جوعارى جالاقى كۇتكەندەر - ۇشقىشتار (شامامەن 2,39 ميلليون تەڭگە)، ستيۋاردەسسالار (شامامەن 1,43 ميلليون تەڭگە) جانە ەلەكتر ستانسياسىنىڭ باستىعى لاۋازىمىنا ۇمىتكەرلەر (شامامەن 1,32 ميلليون تەڭگە) بولدى.

جالپى العاندا، شىلدە ايىنىڭ كورسەتكىشتەرى ەڭبەك نارىعىنداعى ماۋسىمدىق بەلسەندىلىكتىڭ ارتقانىن كورسەتەدى. جاز مەزگىلىندە وقۋ ورىندارىنىڭ تۇلەكتەرى ەڭبەك نارىعىنا جاپپاي شىعىپ، جۇمىس ىزدەۋشىلەر سانىنىڭ ارتۋىنا ىقپال ەتتى. سونىمەن قاتار جۇمىس بەرۋشىلەردىڭ نەگىزگى سۇرانىسى بۇرىنعىسىنشا ءبىلىم بەرۋ، قىزمەت كورسەتۋ جانە دەنساۋلىق ساقتاۋ سالالارىندا ساقتالۋدا. جۇمىس كۇشى ۇسىنىسىنىڭ كوبەيۋى الداعى ايلاردا بوس جۇمىس ورىندارىن قاجەتتى كادرلارمەن قامتاماسىز ەتۋگە قولايلى جاعداي قالىپتاستىرادى.

2026 -جىلدىڭ باسىنان بەرى Enbek.kz پلاتفورماسىندا جالپى 709 مىڭ بوس جۇمىس ورنى جانە 877,2 مىڭ تۇيىندەمە جاريالانعان.

ايتا كەتەيىك، جىل باسىنان بەرى 250 مىڭعا جۋىق ادام جۇمىسپەن قامتىلدى.