قازاقستاندا جۇك كولىكتەرىنىڭ جول اقىسى وزگەرۋى مۇمكىن: جاڭا تاسىلدەر ۇسىنىلدى
استانا. KAZINFORM - قازاقستاندا كوممەرتسيالىق جۇك كولىكتەرىنىڭ اقىلى جولداردى پايدالانعانى ءۇشىن تولەم ءتارتىبىن جەتىلدىرۋ ۇسىنىلدى. جاڭا باستامالار تاريفتەردى سارالاۋدى، جىلدىق ابونەمەنت ەنگىزۋدى جانە شەتەلدىك تاسىمالداۋشىلارعا قاتىستى تولەم تەتىكتەرىن قاراستىرۋدى قامتيدى. جەكە جەڭىل كولىك يەلەرى ءۇشىن ەشتەڭە وزگەرمەيدى. بۇل تۋرالى ۇكىمەت ءمالىم ەتتى.
ۇكىمەتتە پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن اۆتوموبيل جولدارىندا اقى تولەۋ جونىندەگى جۇمىس توبىنىڭ ءبىرىنشى وتىرىسى ءوتتى. قاتىسۋشىلار جول الىمدارىنىڭ قولدانىستاعى جۇيەسىن جەتىلدىرۋ جانە جول ينفراقۇرىلىمىن كۇتىپ ۇستاۋ مەن جوندەۋدى قارجىلاندىرۋدىڭ تۇراقتىلىعىن ارتتىرۋدى قارادى.
كوممەرتسيالىق جۇك كولىگىنىڭ، ونىڭ ىشىندە وتاندىق جانە شەتەلدىك تاسىمالداۋشىلاردىڭ جول اقى تولەۋدەگى ىقتيمال تاسىلدەرىنە باستى نازار اۋدارىلدى. بۇل رەتتە ۇسىنىلىپ وتىرعان شارالار ازاماتتاردىڭ جەكە جەڭىل كولىگى ءۇشىن جول ءجۇرۋ شارتىن وزگەرتۋدى كوزدەمەيدى.
— ءبىز اۆتوموبيل جولدارىن سالعانىمىزبەن، ولاردى كۇتىپ ۇستاۋ جانە جوندەۋ شىعىنىن بيۋدجەت ەسەبىنەن جابۋدى جالعاستىرۋدامىز. جول ينفراقۇرىلىمى ءوزىن قامتاماسىز ەتەتىن جۇيەنى قۇرۋ قاجەت، — دەپ اتاپ ءوتتى سەرىك جۇمانعارين.
وتىرىس بارىسىندا جۇمىس توبى ءبىرقاتار باستاما ۇسىندى. ساقتاندىرۋ سالاسىنداعى تاۋەلسىز ساراپشى ايگەرىم قارابىيىكوگلۋ قازاقستان مەن كورشى مەملەكەتتەردىڭ اقىلى جول تاريفىندەگى ايىرماشىلىققا نازار اۋداردى. وسىعان بايلانىستى جول اقىسىن ايماقتىق دەڭگەيگە جاقىنداتۋ مۇمكىندىگىن زەرتتەۋدى، سونداي-اق وتاندىق تاسىمالداۋشىلار ءۇشىن بولەك شارت قاراستىرۋدى ۇسىندى.
سونىمەن قاتار ساراپشى مەملەكەتتىك شەكارادان ءوتۋ كەزىندە شەتەلدىك جۇك اۆتوموبيلدەرىن ساقتاندىرۋ تەتىگىن پىسىقتاۋدى ۇسىندى. ونىڭ پىكىرىنشە، بۇل ءتاسىل جۇك كولىگىنىڭ جول ينفراقۇرىلىمىنا اسەرىن وتەۋدىڭ قوسىمشا قۇرالى، سونداي-اق ونى كۇتىپ ۇستاۋ مەن جوندەۋدى قارجىلاندىرۋ كوزى بولا الادى.
«قازاۆتوجول» ۇ ك» ا ق بيزنەس- تالداۋشىسى فارحاد نۇركامالوۆ كولىك كومپانيالارى ءۇشىن جىلدىق ابونەمەنتتەردى ەنگىزۋ مۇمكىندىگىن قاراستىرۋدى ايتادى. مۇنداي تەتىك تاسىمالداۋشىلارعا جوسپارلى شاقىرىمدى الدىن الا تولەۋگە جانە ۇزاق ساپار كەزىندەگى ۇلكەن شىعىندى وڭتايلاندىرۋعا مۇمكىندىك بەرەدى. سونىمەن قاتار بۇل تولەمدەر جيىنتىعىنىڭ جوعارىلاۋىنا جانە قارىزدىڭ ازايۋىنا ىقپال ەتۋى مۇمكىن.
تاعى ءبىر ۇسىنىس كولىك قۇرالدارىنىڭ سيپاتتامالارىن ەسكەرە وتىرىپ، تاريفتەردى جەتىلدىرۋ بولدى. VIII سايلانعان ق ر پارلامەنتى ءماجىلىسىنىڭ دەپۋتاتى، لوگيستيكا جانە كولىك سالاسىنداعى ساراپشى بولاتبەك ناجىمەتدين ۇلى اۆتوموبيلدەردىڭ ەكولوگيالىق سىنىبىنا، شىعارىندىلار دەڭگەيىنە جانە جول توسەمىنە جۇكتەمەگە بايلانىستى تاريفتەردى سارالاۋدى ۇسىندى.
سونداي-اق قاتىسۋشىلار جۇك تاسىمالىنىڭ اشىقتىعىن ارتتىرۋ جانە جول اقىسىن تولەۋ تالابىن ساقتاۋ ماسەلەسىن تالقىلادى. اتاپ ايتقاندا، جۇك كولىگى قوزعالىسىن، ونىڭ ىشىندە اۆتوموبيل جولىنىڭ اقىلى ۋچاسكەلەرىندە مونيتورينگ جۇرگىزۋ ءۇشىن سيفرلىق قۇرالداردى قولدانۋدى ارتتىرۋ ۇسىنىلدى.
وتىرىس قورىتىندىسى بويىنشا ۆيتسە-پرەمەر مەملەكەتتىك ورگاندارمەن، سالالىق قاۋىمداستىقتارمەن جانە بيزنەس وكىلدەرىمەن بىرلەسىپ، ۇسىنىستاردى ەگجەي-تەگجەيلى پىسىقتاۋدى تاپسىردى.
تاسىلدەردى زەردەلەۋ كەزىندە تاسىمالداۋشىلار مەن بيزنەستىڭ مۇددەسىن ەسكەرۋ، سونداي-اق جول ينفراقۇرىلىمىن ۇستاۋعا ارنالعان شىعىستاردى ءادىل ءبولۋدى قامتاماسىز ەتۋ قاجەت. بۇل رەتتە ازاماتتاردىڭ جەكە جەڭىل كولىگىنە اسەر ەتپەي، كوممەرتسيالىق جۇك كولىگىنە باستى نازار اۋدارۋ ۇسىنىلادى.
ۇسىنىستاردى قاراشانىڭ سوڭىنا دەيىن ازىرلەپ، جۇمىس توبىنىڭ كەلەسى وتىرىسىندا قاراۋ تاپسىرىلدى.
ايتا كەتەيىك، الماتىدا بيىلعى جىلدىڭ ون ايىندا جول قوزعالىسى ەرەجەلەرىن بۇزعان 25996 جۇك كولىگىنىڭ جۇرگىزۋشىسى اكىمشىلىك جاۋاپكەرشىلىككە تارتىلدى.
