قازاقستاندا جارتى ميلليونعا جۋىق ادام قۇمار ويىننىڭ قۇرىعىنا ىلىككەن
استانا. قازاقپارات - ەلدە جارتى ميلليونعا جۋىق ازامات قۇمار ويىن وينايدى. ولاردىڭ 15 مىڭىندا تاۋەلدىلىك بولۋى مۇمكىن. اقىلعا كەلىپ، ءباس تىگۋدەن ءوز ەركىمەن باس تارتقاندار دا بار. ءبىراق سونىڭ 269 مىڭىنىڭ عانا شەكتەۋى كۇشىندە. بۇلاردى تەجەيتىن ءبىر امال - ءبىرىڭعاي ەسەپكە الۋ جۇيەسى جۇمىس ىستەيدى. جۇيە قۇمار ويىنعا اۋەس ادامداردى ويىنعا قاتىستىرمايدى.
قايرات بەرىكبول قۇمار ويىننىڭ قۇرىعىنا ستۋدەنتتىك شاقتا تۇسكەن. فۋتبولعا قىزىققان ول، العاشىندا دوستارىمەن بىرگە ماتچتاردى تاماشالاپ، كەيىن ويىندارعا ءباس تىگە باستاعان. مۇنىسىن العاشىندا جاي قىزىعۋشىلىق دەپ ويلاعان. ۋاقىت وتە كەلە تاۋەلدىلىك كۇشەيىپ، 10 ميلليون تەڭگەدەن استام قارىزعا باتادى. ءتىپتى ءباس تىگۋ ءۇشىن ۇيىندەگى زاتتارىن ساتىپ، ۇرلىققا دا بارعان. ءبىر ساتتىك ۇتىسقا دەگەن ءۇمىت ونى قايتا-قايتا ويىنعا يتەرمەلەپ، جاعدايدى ودان ءارى ۋشىقتىردى.
قايرات بەرىكبول، كومەك وڭالتۋ ورتالىعىنىڭ كەڭەسشى-ادديكتولوگى:
- مىسالى، مەنىڭ ءوزىمنىڭ تاجىريبەمدە ەسىرتكى بولدى. ىشىمدىك تە بولدى، ويىن دا بولدى. ۇيقىمنان تۇرسام، تەلەفونىمدا ون بەس قوڭىراۋ، ءبارى مەنى ىزدەپ ءجۇر، قارىزىمدى قايتار دەگەن قوڭىراۋ. ۇيدەگىلەرىم ايقاي-شۋ شىعارىپ جاتىر: «سەن قايداسىڭ؟ ۇيگە قايت!» دەگەن سياقتى. بۇدان شىعۋدىڭ جولى كەلەسى كەزەكى ءباستى تىگۋ، اقىرىن-اقىرىن بۇدان شىعۋعا بولادى دەيتىن سونداي ءبىر الدامشى سەزىم بولدى.
بۇگىندە كەيىپكەرىمىز ءوزى ەم قابىلداعان ورتالىقتا كەڭەسشى- ادديكتولوگ بولىپ جۇمىس ىستەيدى. تاۋەلدىلىكتىڭ بىرنەشە ءتۇرىن باستان وتكەرگەن ول ءبىر جارىم جىل بۇرىن قالىپتى ومىرگە ورالعان. قازىر پسيحولوگ ماماندىعىن دا مەڭگەرىپ ءجۇر. ەندىگى ماقساتى - ءوز تاجىريبەسىمەن ءبولىسىپ، وزگەلەرگە كومەك كورسەتۋ. قازىر مۇندا قىرىققا جۋىق ازامات ەم الىپ جاتىر.
قايرات بەرىكبول، كومەك وڭالتۋ ورتالىعىنىڭ كەڭەسشى-ادديكتولوگى:
- مەديسينالىق تۇرعىدا ايتقاندا، ادام بالاسىن ۇيقىسىنان تۇرعاندا مىنا ومىرگە قۇلشىندىراتىن بۇل - گورموندار. قاراپايىم ادامدارعا بەلگىلى ءبىر مەجەدەگى ءبىر گورموندار كۇندەلىكتى ءومىر سۇرۋگە جەتكىلىكتى. ال لۋدوماندار مىناۋ ويىن ويناۋ كەزىندە، ۇتىسقا قول جەتكىزگەن كەزدە سول ءبىر گورموندار اسقاقتاپ، شەكتەن تىس ءبولىنىپ كەتەدى دە، بۇلار سوسىن سوعان تاۋەلدى بولىپ قالادى. قاراپايىم ءومىر ولار ءۇشىن ءبىر ادام توزگىسىز ءبىر حالگە جەتەدى دەپ ايتساق بولادى.
مەملەكەت قۇمار ويىن نارىعىن باقىلاۋدى كۇشەيتتى. شەتەلدىك ونلاين- كازينولاردىڭ قىزمەتىنە توسقاۋىل قويۋ ءۇشىن زاڭسىز سايتتار بۇعاتتالىپ، تولەم ارنالارى شەكتەلەدى. بۇدان بولەك ەلدە قۇمار ويىنداردى جارنامالاۋعا تىيىم سالىنعان. زاڭسىز پلاتفورمالارعا اقشا اۋدارىمدارىن بانكتەر مەن قارجىلىق مونيتورينگ اگەنتتىگى قاداعالايدى.
نۇرمەت بازىل، قۇمار ويىنداردى مونيتورينگىلەۋ جانە تالداۋ ورتالىعىنىڭ باس ديرەكتورى:
- بۇگىنگە دەيىن شامامەن 211 مىڭ زاڭسىز سايتتىڭ قىزمەتى توقتاتىلدى. قازىر اي سايىن 40 مىڭعا جۋىق ينتەرنەت رەسۋرس بۇعاتتالىپ جاتىر. ءبىرىڭعاي ەسەپكە الۋ جۇيەسى ىسكە قوسىلعالى 220 مىڭنان استام ازاماتقا قۇمار ويىن ويناۋعا شەكتەۋ قويىلدى.
بۇل شارالار زاڭسىز ويىن پلاتفورمالارىنىڭ قىزمەتىنە توسقاۋىل قويىپ، ونى باقىلاۋعا مۇمكىندىك بەرەدى. بۇعان دەيىن بۋكمەكەرلىك كەڭسەلەر ءار ادامنىڭ قۇمار ويىن ويناۋعا قۇقىعى بار-جوعىن وزدەرى قاداعالايتىن. ەندى جاڭا جۇيە ءار ءباس الدىندا ازاماتتىڭ دەرەكتەرىن ءجىتى تەكسەرەدى. ەگەر ويىنعا تىيىم سالىنسا، جۇيە قاراجاتتى قابىلداۋعا جول بەرمەيدى. ال تالاپتى بۇزعان بۋكمەكەرلىك كەڭسەلەر جاۋاپقا تارتىلادى.
24.kz
