قازاقستاننان ءبىرجولا كوشەتىندەر ءۇشىن جاڭا تالاپتار ەنگىزىلدى

ءتيىستى بۇيرىققا ىشكى ىستەر ءمينيسترى 2026 -جىلعى 30 -قازاندا قول قويدى.

قۇجاتقا سايكەس، بۇل مەملەكەتتىك قىزمەت قازاقستان ازاماتتارىنا، سونداي-اق قازاقستاندا تۇراقتى تۇراتىن شەتەلدىكتەر مەن ازاماتتىعى جوق ادامدارعا كورسەتىلەدى.

قۇجاتتاردى «ازاماتتارعا ارنالعان ۇكىمەت» مەملەكەتتىك كورپوراتسياسى نەمەسە eGov.kz پورتالى ارقىلى راسىمدەۋگە بولادى. قىزمەت كورسەتۋ مەرزىمى — 20 جۇمىس كۇنى. ول ءۇشىن 1 ايلىق ەسەپتىك كورسەتكىش مولشەرىندە مەملەكەتتىك باج تولەنەدى.

وزگەرىستەردىڭ ءبىرى قۇجاتتاردى قابىلداۋ تارتىبىنە قاتىستى.

— قىزمەت الۋشىعا انىقتالعان كەمشىلىكتەردى تۇزەتۋ ءۇشىن 15 جۇمىس كۇنى بەرىلەدى. بۇل مەرزىم مەملەكەتتىك قىزمەت كورسەتۋ مەرزىمىنە كىرمەيدى جانە ودان اسپاۋى ءتيىس، — دەلىنگەن قۇجاتتا.

ەگەر ءوتىنىش بەرۋشى كورسەتىلگەن مەرزىمدە ەسكەرتۋلەردى تۇزەتسە، ءوتىنىش قابىلدانعان كۇن رەتىندە العاشقى جۇگىنگەن كۇنى ەسەپتەلەدى. ال بەلگىلەنگەن مەرزىمدە كەمشىلىكتەر جويىلماسا، قۇجاتتاردى قابىلداۋدان باس تارتىلادى.

ءوتىنىشتى قاراۋ كەزىندە كوشى-قون قىزمەتى ۇلتتىق قاۋىپسىزدىك كوميتەتى، باس پروكۋراتۋرا، ادىلەت مينيسترلىگى، قارجى مينيسترلىگى جانە قورعانىس مينيسترلىگى سياقتى ۋاكىلەتتى مەملەكەتتىك ورگاندارعا كەلىسۋ ءۇشىن سۇراۋ جىبەرەدى. كەلىسۋ ءراسىمى 10 جۇمىس كۇنى ىشىندە جۇرگىزىلەدى.

وڭ شەشىم قابىلدانعاننان كەيىن ءوتىنىش بەرۋشى ءبىر جۇمىس كۇنى ىشىندە جەكە كۋالىگىن، تۇرۋعا ىقتيارحاتىن نەمەسە ازاماتتىعى جوق ادامنىڭ كۋالىگىن تاپسىرۋ ءۇشىن مەملەكەتتىك كورپوراتسياعا جۇگىنۋى قاجەت. وسىدان كەيىن ول تۇرعىلىقتى جەرى بويىنشا تىركەۋدەن شىعارىلادى جانە شەتەلگە تۇراقتى تۇرۋعا كەتۋ قۇجاتتارىن راسىمدەۋ تۋرالى شەشىم بەرىلەدى.

ەگەر ءوتىنىش eGov.kz پورتالى ارقىلى بەرىلسە، قىزمەت ناتيجەسى باسشىنىڭ ەلەكتروندىق سيفرلىق قولتاڭباسىمەن راستالعان ەلەكتروندىق قۇجات تۇرىندە جەكە كابينەتكە جىبەرىلەدى.

مەملەكەتتىك قىزمەتتى كورسەتۋدەن، اتاپ ايتقاندا، سالىق بەرەشەگى بولعان، سوت الدىنداعى مىندەتتەمەلەر ورىندالماعان، ازامات مەرزىمدى اسكەري قىزمەت وتكەرىپ جۇرگەن، قىلمىستىق قۋدالاۋعا الىنعان نەمەسە كورىنەۋ جالعان مالىمەتتەر ۇسىنعان جاعدايدا باس تارتىلۋى مۇمكىن.

بۇيرىق العاشقى رەسمي جاريالانعان كۇنىنەن كەيىن 10 كۇنتىزبەلىك كۇن وتكەن سوڭ كۇشىنە ەنەدى.

بۇعان دەيىن ىشكى ىستەر مينيسترلىگى شەتەل ازاماتتارى مەن ازاماتتىعى جوق ادامدارعا جەكە سايكەستەندىرۋ ءنومىرىن (ج س ن) راسىمدەۋ كەزىندە ولاردىڭ قازاقستاندا زاڭدى تۇردە جۇرگەنىن تەكسەرۋدى ۇسىنعان بولاتىن.