قازاقستاندا ايەلدەر ەرلەردەن 8 جىل ۇزاق ءومىر سۇرەدى
استانا. قازاقپارات - قازاقستاندا ءومىر ءسۇرۋ ۇزاقتىعى 76 جاسقا جەتتى. بۇل - تاۋەلسىزدىك جىلدارىنداعى ەڭ جوعارى كورسەتكىش. 2021 -جىلى ورتاشا ءومىر ءسۇرۋ ۇزاقتىعى 70 جاس بولعان. ءتورت جىلدا كورسەتكىش 6 جىلعا ارتقان.
بۇعان پاندەميادان كەيىنگى دەموگرافيالىق احۋالدىڭ قالپىنا كەلۋىمەن قاتار، مەديتسينالىق كومەكتىڭ قولجەتىمدىلىگى مەن ساپاسىنىڭ جاقسارۋى ىقپال ەتتى. بۇل تۋرالى ساليدات قايىربەكوۆا اتىنداعى ۇلتتىق عىلىمي دەنساۋلىق ساقتاۋدى دامىتۋ ورتالىعى باسقارما ءتوراعاسىنىڭ ورىنباسارى ريتا سارسەنوۆا «24KZ» ارناسىنا بەرگەن سۇقباتىندا ايتتى.
ماماننىڭ ايتۋىنشا، اۋرۋلاردى ەرتە انىقتاۋ جانە ەمدەۋ مۇمكىندىكتەرىنىڭ كەڭەيۋى، انا مەن بالا دەنساۋلىعىن قورعاۋ، جۇرەك-قان تامىرلارى جانە ونكولوگيالىق اۋرۋلارمەن كۇرەس باعىتىنداعى ناتيجەلەر دە ءومىر ءسۇرۋ ۇزاقتىعىنا وڭ اسەر ەتكەن. 2023-2025 -جىلدارى نارەستە ءولىمى 23 پايىزعا تومەندەگەن. 2025 -جىلى ءتىرى تۋعان 1000 نارەستەگە شاققاندا بۇل كورسەتكىش 6 جاعدايدى قۇرادى. ال سوڭعى بەس جىلدا قاتەرلى ىسىكتەن بولاتىن ءولىم-ءجىتىم 20 پايىزعا ازايعان. ونكولوگيالىق ناۋقاستاردىڭ بەس جىلدىق ءومىر ءسۇرۋ كورسەتكىشى 65 پايىزعا، بالالار ونكولوگياسىندا 71 پايىزعا جەتتى، - دەدى ريتا سارسەنوۆا.
مەديسينالىق كومەكتىڭ حالىققا جاقىنداي ءتۇسۋى دە ماڭىزدى. ەلىمىزدە 2019 -جىلدان باستاپ 1263 دەنساۋلىق ساقتاۋ نىسانى سالىندى. اۋىلدىق دەنساۋلىق ساقتاۋدى جاڭعىرتۋ اياسىندا 655 مەديتسينالىق نىسان پايدالانۋعا بەرىلدى. وسىنىڭ ءبارى اۋرۋدى ەرتە انىقتاۋعا، دەر كەزىندە ەمدەۋگە جانە ادام ءومىرىن ساقتاپ قالۋعا مۇمكىندىك بەرەدى. بۇدان بولەك، ەلىمىزدە 85 ينسۋلتتىك ورتالىق جۇمىس ىستەيدى. كۇردەلى كارديوحيرۋرگيالىق وپەراتسيالار جاساۋ مۇمكىندىگى دە كەڭەيگەن.
مامانداردىڭ پىكىرىنشە، مەديسينالىق ينفراقۇرىلىمنىڭ دامۋى حالىققا ساپالى كومەكتى ۋاقىتىلى كورسەتۋگە جول اشادى. ءومىر ءسۇرۋ ۇزاقتىعى بويىنشا قازاقستان ورتالىق ازيا ەلدەرى اراسىندا الدىڭعى ورىندا. دۇنيەجۇزىلىك بانكتىڭ 2024 -جىلعى سالىستىرمالى دەرەكتەرىندە ەلىمىزدىڭ كورسەتكىشى 75 جاس بولعان. ال ۇلتتىق ستاتيستيكا بيۋروسىنىڭ مالىمەتىنشە، 2025 -جىلى بۇل مەجەگە 76 جاسقا دەيىن جەتكەن، - دەدى ريتا سارسەنوۆا.
دەگەنمەن ايەلدەر مەن ەرلەردىڭ ءومىر ءسۇرۋ ۇزاقتىعىندا ايىرماشىلىق بار. 2025 -جىلدىڭ قورىتىندىسى بويىنشا ايەلدەردىڭ ورتاشا ءومىر ءسۇرۋ ۇزاقتىعى 80 جاس بولسا، ەرلەردە 72 جاس. اراداعى الشاقتىق - 8 جىل. بۇعان بيولوگيالىق ەرەكشەلىكتەرمەن قاتار، ءومىر سالتى، تەمەكى مەن الكوگول تۇتىنۋ، جاراقات الۋ جانە پروفيلاكتيكالىق تەكسەرۋلەردەن ۋاقىتىلى وتپەۋ سياقتى فاكتورلار اسەر ەتەدى. سوندىقتان ەرلەر دەنساۋلىعىنا، اسىرەسە جۇرەك-قان تامىرلارى اۋرۋلارىنىڭ الدىن الۋعا جانە ولاردى ەرتە انىقتاۋعا ەرەكشە كوڭىل ءبولۋ قاجەت دەپ ەسەپتەيمىز، - دەدى ريتا سارسەنوۆا.
مامانداردىڭ ايتۋىنشا، ەندىگى مىندەت - ءومىر ءسۇرۋ ۇزاقتىعىن ارتتىرۋمەن قاتار، ازاماتتاردىڭ سول جىلداردى دەنى ساۋ، بەلسەندى وتكىزۋىنە جاعداي جاساۋ.
