قازاقستاندا اۋىل شارۋاشىلىعى كاسىپورىندارىنا 5 پايىزبەن جەڭىلدەتىلگەن نەسيە بەرىلەدى
استانا. KAZINFORM - قازاقستاندا ازىق-تۇلىك وندىرۋشىلەر، اۋىل شارۋاشىلىعى ونىمدەرىن قايتا وڭدەيتىن كاسىپورىندار مەن مال شارۋاشىلىعى كەشەندەرى «اگروبيزنەس» باعدارلاماسى ارقىلى اينالىم قاراجاتىن تولىقتىرۋ ءۇشىن جىلدىق 5 پايىزبەن جەڭىلدەتىلگەن نەسيە الا الادى، دەپ حابارلايدى اۋىل شارۋاشىلىعى مينيسترلىگى.
باعدارلاما اۋىل شارۋاشىلىعى كاسىپورىندارىن قولجەتىمدى قارجىلاندىرۋمەن قامتاماسىز ەتۋگە جانە ءوندىرىستىڭ ۇزدىكسىز جۇمىس ىستەۋىنە باعىتتالعان.
جەڭىلدەتىلگەن نەسيەنىڭ جىلدىق سىياقى مولشەرلەمەسى 5 پايىزدى قۇرايدى. جىلدىق ءتيىمدى سىياقى مولشەرلەمەسى دە 5 پايىزدان باستالادى.
ءبىر ترانش بويىنشا قارجىلاندىرۋ مەرزىمى 12 ايعا دەيىن، ال كرەديتتىك جەلىنىڭ قولدانىلۋ مەرزىمى 36 ايعا دەيىن بەلگىلەنگەن.
نەسيەنى وتەۋ كەستەسى قارىز الۋشىنىڭ قىزمەت ەرەكشەلىگى مەن بيزنەس-جوسپارىنا قاراي جەكە جاسالادى.
- مال بورداقىلاۋمەن اينالىساتىن شارۋاشىلىقتار ءۇشىن نەسيە سوماسىنىڭ كەمىندە %70- ى كەيىننەن بورداقىلاۋ ماقساتىندا مال ساتىپ الۋعا باعىتتالۋى ءتيىس، - دەپ ءتۇسىندىردى مينيسترلىك.
ال ەتتى جانە ءسۇتتى باعىتتاعى اسىل تۇقىمدى مال وسىرەتىن شارۋاشىلىقتار نەسيە قاراجاتىن جەم-ءشوپ پەن جەم -ءشوپ قوسپالارىن، جانار-جاعارماي ماتەريالدارىن، ۆەتەريناريالىق پرەپاراتتاردى ساتىپ الۋعا جۇمساي الادى.
سونداي- اق قارجىنى جەم -ءشوپ دايىنداۋ جانە تاراتۋ تەحنيكاسى مەن جابدىقتارىنا قاجەتتى قوسالقى بولشەكتەر الۋعا، قىزمەتكەرلەردىڭ ەڭبەكاقىسىن تولەۋگە پايدالانۋعا رۇقسات ەتىلەدى.
مينيسترلىك مالىمەتىنشە، باعدارلاما قايتا وڭدەۋ كاسىپورىندارى مەن مال شارۋاشىلىعى كەشەندەرىنىڭ اينالىم قاراجاتىنا دەگەن قاجەتتىلىگىن وتەۋگە، وندىرىستىك پروتسەستەردىڭ تۇراقتىلىعىن ساقتاۋعا جانە سالانى دامىتۋعا مۇمكىندىك بەرەدى.
ايتا كەتەيىك، بۇعان دەيىن قازاقستاندا مال شارۋاشىلىعىن مەملەكەتتىك قولداۋ جۇيەسى وزگەرىپ، فەرمەرلەردى سۋبسيديالاۋدان جەڭىلدەتىلگەن نەسيەلەۋگە كەزەڭ- كەزەڭىمەن كوشىرۋ باستالعانى حابارلانعان ەدى. اۋىل شارۋاشىلىعى كاسىپورىندارىنا جىلدىق %5- بەن نەسيە الۋ مۇمكىندىگى قاراستىرىلعان.
