قازاقستاندا 70 كە جۋىق جاڭا مەديسينالىق نىسان سالىنادى - مينيستر

- مەملەكەت باسشىسىنىڭ تاپسىرماسىن ورىنداۋ اياسىندا مينيسترلىك وڭىرلەردەگى مەديسينالىق-دەموگرافيالىق جاعدايدى جانە تيىمدىلىك ولشەمشارتتارىن ەسكەرە وتىرىپ، دەنساۋلىق ساقتاۋ نىساندارىن سالۋ قاجەتتىلىگىنە تالداۋ جۇرگىزۋدى باستادى، - دەدى مينيستر.

ونىڭ ايتۋىنشا، جوسپارعا 1700 توسەككە ارنالعان سەگىز زاماناۋي پەريناتالدىق ورتالىق كىرەدى. ولار استانا، الماتى، شىمكەنت، قاراعاندى، قاسكەلەڭ، قىزىلوردا جانە ورال قالالارىندا سالىنادى.

سونىمەن قاتار اتىراۋ، اقتوبە، الماتى، شىمكەنت، قاسكەلەڭ، سەمەي جانە اقتاۋ قالالارىندا جالپى 1550 توسەككە ارنالعان جەتى كوپبەيىندى بالالار اۋرۋحاناسىن سالۋ كوزدەلگەن. استانادا 200 توسەككە ارنالعان بالالارعا شۇعىل كومەك كورسەتۋ ورتالىعى مەن 350 توسەككە ارنالعان بالالار حيرۋرگياسى ورتالىعى بوي كوتەرەدى.

- بالالارعا كورسەتىلەتىن مەديسينالىق كومەكتى كەڭەيتۋ جانە مامانداندىرىلعان، جوعارى تەحنولوگيالىق مەديسينالىق كومەكتىڭ قولجەتىمدىلىگىن ارتتىرۋ كوزدەلىپ وتىر، - دەدى اقمارال ءالنازاروۆا.

بۇدان بولەك، الماتى، اقتاۋ، اتىراۋ، قىزىلوردا جانە سەمەي قالالارىندا جالپى 750 توسەككە ارنالعان بالالاردى وڭالتۋدىڭ ۇلتتىق ورتالىعىنىڭ بەس ءوڭىرارالىق فيليالى اشىلادى.

سونداي-اق وسكەمەن، اباي جانە تۇركىستان وبلىستارىندا ءارقايسىسى 300 توسەككە ارنالعان كوپبەيىندى اۋرۋحانالار، ال جامبىل وبلىسىندا 325 توسەككە ارنالعان جۇقپالى اۋرۋلار اۋرۋحاناسى مەن مامانداندىرىلعان كورپۋستار سالۋ جوسپارلانعان.

ءمينيستردىڭ مالىمەتىنشە، جاڭا نىساندار قاتارىندا 25 امبۋلاتوريالىق-ەمحانالىق مەكەمە، اۋداندىق اۋرۋحانالار، جەدەل مەديسينالىق جاردەم نىساندارى، قان ورتالىقتارى جانە باسقا دا مامانداندىرىلعان مەكەمەلەر بار.

- ناتيجەسىندە شامامەن 1,8 ميلليون شارشى مەتر مەديسينالىق ينفراقۇرىلىمدى قۇرۋ جانە جاڭارتۋ، ستاتسيونارلارداعى توسەك سا نىن 9,2 مىڭعا ۇلعايتۋ جانە جاڭعىرتۋ، سونداي-اق امبۋلاتوريالىق كومەك قۋاتىن اۋىسىمىنا 5,3 مىڭنان استام كەلۋشىگە كوبەيتۋ جوسپارلانىپ وتىر، - دەپ اتاپ ءوتتى ۆەدومستۆو باسشىسى.

ايتا كەتەيىك، ولجاس بەكتەنوۆ پرەزيدەنت جاريالاعان «حالىقتىق قۇرىلىس» جۇمىسپەن قامتۋدىڭ وسۋىنە جانە ازاماتتاردىڭ ءال-اۋقاتىنىڭ ارتۋىنا سەرپىن بەرەدى دەگەن ەدى.