قازاقستاندا 180 مىڭنان استام ادامنىڭ قۇمار ويىندارعا قاتىسۋى شەكتەلدى
استانا. قازاقپارات - قازاقستاندا قۇمار ويىندار نارىعىن باقىلاۋ سيفرلىق فورماتقا كوشىرىلە باستادى. ءبىرىڭعاي ەسەپكە الۋ جۇيەسى ىسكە قوسىلعالى بەرى 180 مىڭنان استام ازاماتتىڭ قۇمار ويىندارعا قاتىسۋىنا شەكتەۋ قويىلعان، دەپ حابارلايدى 24KZ.
بۇل تۋرالى قۇمار ويىنداردى مونيتورينگىلەۋ جانە تالداۋ ورتالىعى مالىمدەدى. ورتالىقتىڭ دەرەگىنشە، 23 مىڭنان استام ادام قۇمار ويىندارعا قاتىسۋدى ءوز ەركىمەن شەكتەۋ تەتىگىن پايدالانعان. ال 31 مىڭنان استام كامەلەتكە تولماعان ازامات ويىندارعا قاتىسۋعا جىبەرىلمەگەن.
ءبىرىڭعاي ەسەپكە الۋ جۇيەسى 2026 -جىلعى 27 -ناۋرىزدا ىسكە قوسىلدى. ول بۋكمەكەرلىك كەڭسەلەر مەن توتاليزاتورلارمەن اقپارات الماسۋدى، وپەراتسيالاردى ەسەپكە الۋدى جانە زاڭدا بەلگىلەنگەن شەكتەۋلەردىڭ ساقتالۋىن تەكسەرۋدى قامتاماسىز ەتەدى. ورتالىقتىڭ تۇسىندىرۋىنشە، جۇيەنىڭ ءوزى جاڭا تىيىم ەنگىزبەيدى. ول زاڭدا بەلگىلەنگەن شەكتەۋلەر مەن ۋاكىلەتتى ورگانداردىڭ شەشىمدەرىنىڭ ورىندالۋىن قامتاماسىز ەتەدى.
سونىمەن قاتار جۇيە ينتەرنەتتەگى زاڭسىز قۇمار ويىن رەسۋرستارىن انىقتاپ، ولار تۋرالى اقپاراتتى جيناۋعا جانە تالداۋعا مۇمكىندىك بەرەدى. زاڭ بويىنشا 21 جاسقا تولعان قازاقستان ازاماتى قۇمار ويىندار مەن ءباس تىگۋگە قاتىسۋىن 6 ايدان 10 جىلعا دەيىن ءوز ەركىمەن شەكتەي الادى.
