قازاقستان پويىزدارىندا ينتەرنەت ىسكە قوسىلدى: قانداي قىزمەتتەر تەگىن بولادى

«قازاقستان تەمىر جولى» ۇلتتىق كومپانياسىنىڭ مالىمەتىنشە، جوبا 108 پويىز قۇرامىنداعى 1500-دەن استام ۆاگوندى قامتيدى. سونىڭ ناتيجەسىندە جىل سايىن 11 ميلليوننان استام جولاۋشى پويىزدا ينتەرنەت پەن تسيفرلىق قىزمەتتەردى پايدالانا الادى.

جولاۋشىلارعا ينتەرنەتتىڭ تەگىن جانە اقىلى پاكەتتەرى ۇسىنىلادى. تەگىن پاكەت ارقىلى مەسسەندجەرلەردە ماتىندىك حابارلاما الماسۋعا بولادى. ال فوتوسۋرەتتەر مەن بەينەلەردى جىبەرۋ، داۋىستىق حابارلامالار جانە ينتەرنەتتىڭ باسقا مۇمكىندىكتەرىن پايدالانۋ ءۇشىن اقىلى پاكەتكە قوسىلۋ قاجەت.

ءانۋار احمەتجانوۆتىڭ ايتۋىنشا، سپۋتنيكتىك ينتەرنەتتى ەنگىزۋدەگى باستى ماقسات - پويىز جولاۋشىلارىنىڭ جول بويى بايلانىستا بولۋىنا جاعداي جاساۋ.

- ەلىمىزدىڭ اۋماعى كەڭ ەكەنىن ءبارىمىز بىلەمىز. پويىزدارىمىز مىڭداعان شاقىرىم جول ءجۇرىپ، حالىق سيرەك قونىستانعان، موبيلدى بايلانىس مۇلدە جوق نەمەسە ناشار ۇستايتىن اۋماقتاردان وتەدى. بۇگىندە ءبىز وسى ماسەلەنىڭ جاڭا شەشىمىن ۇسىنىپ وتىرمىز. ول - سپۋتنيكتىك ينتەرنەت. ەندى جولاۋشىلار جول بويى جاقىندارىمەن بايلانىسىپ، جۇمىس ماسەلەلەرىن شەشىپ، مەملەكەتتىك جانە بانك قىزمەتتەرىن پايدالانا الادى، - دەدى باسقارما ءتوراعاسى.

ونىڭ سوزىنشە، كومپانيا بۇل تەحنولوگيانى بىردەن ەنگىزگەن جوق. سپۋتنيكتىك ينتەرنەت العاش رەت 2024 -جىلدىڭ قاڭتارىندا وسكەمەن جانە الماتى باعىتىنداعى پويىزداردا سىناقتان وتكەن. ول كەزدە OneWeb جۇيەسى پايدالانىلسا، قازىر Starlink تەحنولوگياسى قولدانىلىپ وتىر.

- ءبىز بايلانىس ساپاسىن، ونىڭ تۇراقتىلىعىن جانە ءبىر مەزگىلدە قانشا ادامنىڭ ينتەرنەتكە قوسىلا الاتىنىن تەكسەردىك. جۇيەنىڭ پويىزداردا ءتيىمدى جۇمىس ىستەيتىنىنە كوز جەتكىزگەننەن كەيىن عانا ونى كەڭىنەن ەنگىزۋگە كىرىستىك، - دەدى ءانۋار احمەتجانوۆ.

سونىمەن قاتار ول سپۋتنيكتىك ينتەرنەتتىڭ ساپاسىنا اۋا رايى اسەر ەتۋى مۇمكىن ەكەنىن ەسكەرتتى. اتاپ ايتقاندا، بوران جانە باسقا دا قولايسىز جاعدايلاردا بايلانىس جىلدامدىعى تومەندەۋى نەمەسە ۋاقىتشا ءۇزىلۋى ىقتيمال.

كومپانيا الداعى ۋاقىتتا ينتەرنەت ارقىلى جولاۋشىلارعا ۇسىنىلاتىن قىزمەت تۇرلەرىن كەڭەيتۋدى جوسپارلاپ وتىر. ماسەلەن، پويىزدا وتىرىپ تاماققا تاپسىرىس بەرۋ، ۆوكزالعا الدىن الا تاكسي شاقىرۋ، قاجەتتى فيلمدەر مەن باسقا دا بەينەماتەريالداردى كورۋ مۇمكىندىكتەرى قاراستىرىلعان.

- ينتەرنەت ءبىز ءۇشىن تۇپكى ماقسات ەمەس. بۇل - جاڭا قوسىمشا قىزمەتتەردى دامىتۋدىڭ نەگىزى. تۇراقتى سيفرلىق بايلانىستىڭ پايدا بولۋى بۇرىن بولماعان مۇمكىندىكتەرگە جول اشادى، - دەدى ءانۋار احمەتجانوۆ.

ايتا كەتەيىك، بيىلعى توعىز ايدا ۇلتتىق تاسىمالداۋشى 9 ميلليون جولاۋشى تاسىمالداعان. جىل سوڭىنا دەيىن بۇل كورسەتكىش 13 ميلليوننان اسادى دەپ جوسپارلانعان.

بۇعان دەيىن Kazinform اگەنتتىگى ⁠«پويىزدار مەن ۇشاقتاردى ينتەرنەتپەن قامتاماسىز ەتۋ قارقىنى قالاي؟» دەگەن ماتەريالىندا ەلىمىزدەگى تەمىرجول جانە اۋە كولىكتەرىن ينتەرنەتكە قوسۋ جۇمىستارى تۋرالى جازعان بولاتىن.