قازاقستان ومان ارقىلى جاڭا نارىقتارعا جول اشپاق

- ەنەرگەتيكا جانە تاۋ- كەن ونەركاسىبىندەگى كوپجىلدىق تابىستى سەرىكتەستىگىمىز وڭ ناتيجەسىن بەرە باستادى. ءبىز مۇنى ماقتان تۇتامىز. ومىرلىك ماڭىزى بار وسى سالالاردا الەۋەتىمىزدى بىرىكتىرۋ ەكى ەلدىڭ يگىلىگىنە قىزمەت ەتەتىن بىرلەسكەن جاڭا كاسىپورىنداردىڭ پايدا بولۋىنا سەپتىگىن تيگىزەدى، - دەدى مەملەكەت باسشىسى.

پرەزيدەنت كولىك-لوگيستيكا سالاسىندا ىنتىماقتاستىق الەۋەتى زور ەكەنىن ايتتى.

- ءبىز وماندى كولىك-لوگيستيكا سالاسىنداعى ماڭىزدى سەرىكتەس رەتىندە قاراستىرامىز. ويتكەنى، بۇل -ستراتەگيالىق تۇرعىدان ۇتىمدى ورنالاسقان، پورت ينفراقۇرىلىمى ىلگەرى، تاياۋ شىعىس پەن افريكا نارىقتارىنا شىعاتىن جولى بار ەل. ال قازاقستان - تابيعي رەسۋرسى مول، ءوندىرىس بازاسى دامىعان، ازيا مەن ەۋروپا اراسىنداعى كولىك باعدارلارىندا ستراتەگيالىق ءرول اتقاراتىن ءارى كولىك بايلانىسىن وركەندەتۋ جونىندە ناقتى جوسپارعا يە مەملەكەت، - دەدى قاسىم-جومارت توقايەۆ.

بۇدان بولەك، مەملەكەت باسشىسى اۋىل شارۋاشىلىعى مەن ازىق-تۇلىك قاۋىپسىزدىگى سالالارىنداعى ىنتىماقتاستىقتى نىعايتۋعا ۇندەدى.

- ەلىمىزدىڭ جازيرالى دالاسىندا اۋىل شارۋاشىلىعىمەن اينالىسۋعا مول مۇمكىندىك بار. سوندىقتان بۇكىل شىعاناق ايماعىنىڭ ازىق-تۇلىك قاۋىپسىزدىگىن قامتاماسىز ەتۋدە سەنىمدى سەرىكتەس بولا الامىز، - دەدى پرەزيدەنت.

قاسىم-جومارت توقايەۆ ءسوز سوڭىندا قازىرگى ۋاقىتتا ساياسي دەڭگەيدە قول جەتكىزىلگەن ۋاعدالاستىقتاردى ناقتى ىسكە ۇلاستىرۋ جانە ەكونوميكالىق بايلانىستاردى قازاق- ومان سەرىكتەستىگىنىڭ تىرەگىنە اينالدىرۋ باستى مىندەت ەكەنىن ايتتى.

- قازاقستان مەن ومان كاسىپكەرلەرىن سەرىكتەستىك بايلانىس ورناتۋ، كەلەشەگى زور جوبالاردى پىسىقتاۋ جانە ينۆەستيتسيا اۋقىمىن كەڭەيتۋ ماقساتىندا ىسكەرلىك كەڭەس مۇمكىندىكتەرىن كەڭىنەن پايدالانۋعا شاقىرامىن. ىسكەر توپتار بەلسەندى ۇلەس قوسسا، ەكونوميكالىق ارىپتەستىگىمىز جاڭا دەڭگەيگە كوتەرىلەتىنى انىق، - دەدى مەملەكەت باسشىسى.

سونداي-اق فورۋمدا ا ح ق و باسقارۋشىسى رەنات بەكتۇروۆ، «سامۇرىق- قازىنا» ا ق باسقارما ءتوراعاسى نۇرلان جاقىپوۆ جانە Oman Investment Authority پرەزيدەنتى ابدۋلسالام بەن مۇحاممەد ءال-مۋرشيدي ءسوز سويلەدى.

ايتا كەتەيىك، پرەزيدەنت قازاق-ومان بيزنەس فورۋمىندا ءسوز سويلەپ، ءوزارا سەنىم مەن تۇسىنىستىك سيپاتىندا وتكەن جوعارى دەڭگەيدەگى كەلىسسوزدەردىڭ اشىق، وبەكتيۆتى ءارى شىن مانىندە مازمۇندى بولعانىن ايتتى.