قازاقستان مەن رەسەي سوت سالاسىندا جاڭا كەلىسىمگە كەلدى
استانا. KAZINFORM - مەملەكەت باسشىسى رەسەي جوعارعى سوتىنىڭ ءتوراعاسى يگور كراسنوۆتى قابىلدادى.
اقوردانىڭ باسپا ءسوز قىزمەتىنىڭ حابارلاۋىنشا، قاسىم-جومارت توقايەۆ كەزدەسۋ بارىسىندا ورتاق تاريحقا، تاتۋ كورشىلىككە، سونداي-اق قوس حالىق اراسىنداعى ءوزارا قۇرمەت پەن بەرىك بايلانىسقا نەگىزدەلگەن قازاقستان-رەسەي قارىم-قاتىناسىنىڭ ايرىقشا سيپاتىنا نازار اۋداردى.
پرەزيدەنتتىڭ ايتۋىنشا، مەملەكەتارالىق قاتىناستاردىڭ جان-جاقتى ستراتەگيالىق سەرىكتەستىك جانە وداقتاستىق دەڭگەيىنە كوتەرىلۋى بارلىق باعىتتاعى، سونىڭ ىشىندە قۇقىق سالاسىنداعى ىقپالداستىقتىڭ دا دايەكتى تۇردە دامىپ كەلە جاتقانىن كورسەتەدى.
قاسىم-جومارت توقايەۆ ەلىمىزدىڭ بۇكىل مەملەكەتتىك-قۇقىقتىق جۇيەسىن جاڭعىرتۋعا باعىتتالعان اۋقىمدى ساياسي رەفورمالارعا توقتالدى.
ءوز كەزەگىندە رەسەي جوعارعى سوتىنىڭ ءتوراعاسى قازاقستان سوتىمەن بەلسەندى ىقپالداستىق جولعا قويىلعانىن جەتكىزدى.
اتاپ ايتقاندا، تاريحتا تۇڭعىش رەت ەكى ەلدىڭ جوعارى سوت ينستانتسيالارى اراسىندا ىنتىماقتاستىق تۋرالى كەلىسىمگە قول قويىلدى. بۇل قۇجات كاسىبي ديالوگقا، سوت تورەلىگىن سيفرلاندىرۋعا جانە جاساندى ينتەللەكتىنى قولدانىسقا ەنگىزۋگە نەگىز بولادى.
سونىمەن قاتار يگور كراسنوۆ عىلىم جانە ءبىلىم بەرۋ سالالارىندا، اسىرەسە، بىلىكتىلىكتى ارتتىرۋ جانە سوت قىزمەتكەرلەرىنىڭ تسيفرلىق داعدىلارىن دامىتۋ باعىتىندا سەرىكتەستىك اياسىن كەڭەيتۋگە مۇددەلى ەكەنىن راستادى.
ەسكە سالايىق، بۇعان دەيىن قاسىم-جومارت توقايەۆ لاتۆيا پرەزيدەنتىنە قۇتتىقتاۋ حات جولداعانىن حابارلاعانبىز.