قازاقستان قىتايدان ەۋروپاعا دەيىنگى جۇك تاسىمالىن سيفرلاندىرۋدى ۇسىندى

ونىڭ سوزىنشە، كولىك سالاسىن سيفرلاندىرۋداعى نەگىزگى مىندەتتەردىڭ ءبىرى — ءارتۇرلى اقپاراتتىق جۇيەلەردى ءوزارا بايلانىستىرىپ، جۇك تاسىمالى تۋرالى مالىمەتتەردى ءبىر جەرگە جيناقتاۋ.

— قازىر وسى باعىتتا Smart Data Transport سالالىق دەرەكتەر پلاتفورماسى دامىتىلىپ جاتىر. وعان كولىك سالاسىنداعى ءبىرقاتار اقپاراتتىق جۇيە قوسىلعان. جاڭا دەرەككوزدەردى بىرىكتىرۋ جۇمىسى جالعاسۋدا، — دەدى سپيكەر.

 قازاقستان قىتايدان ەۋروپاعا دەيىنگى حالىقارالىق كولىك دالىزدەرىندە ەلەكتروندى قۇجاتتاردى ءوزارا تانۋ جانە جۇك تاسىمالى تۋرالى دەرەكتەردى بىرىكتىرۋ جۇيەسىن ەنگىزۋدى ۇسىندى.

ونىڭ سوزىنشە، بۇگىندە جۇك تاسىمالىنداعى كەشىگۋدىڭ باستى سەبەپتەرىنىڭ ءبىرى — قۇجات راسىمدەۋ مەن اقپارات الماسۋعا كەتەتىن ۋاقىت.

— بۇگىندە جۇك تاسىمالى كوبىنە قۇجاتتاردىڭ راسىمدەلۋىن كۇتىپ كەشىگەدى. كونتەينەردى ءارى قاراي جونەلتۋ ءۇشىن ءتيىستى راستاۋ نەمەسە جۇك تۋرالى اقپارات قاجەت بولادى. ءار شەكارا مەن پورتتا ءبىر مالىمەت قايتا-قايتا ەنگىزىلەدى. مۇنىڭ ءبارى ۋاقىت جوعالتۋعا جانە كاسىپكەرلەر شىعىنىنىڭ ارتۋىنا اكەلەدى، — دەدى ۆيتسە- مينيستر.

وسى ماسەلەنى شەشۋ ءۇشىن قازاقستان حالىقارالىق سەرىكتەستەرگە ءۇش باعىت بويىنشا بىرلەسىپ جۇمىس ىستەۋدى ۇسىندى.

ءبىرىنشىسى — قىتايدان ەۋروپاعا دەيىنگى بۇكىل باعىتتا ەلەكتروندى قۇجاتتاردى ءوزارا تانۋ جانە كولىك دەرەكتەرىن ورتاق ستاندارتتارعا سايكەستەندىرۋ. بۇل رەتتە ءار مەملەكەت ءوز دەرەكتەرىن ءوزى ساقتايدى، ءبىراق جۇكتىڭ قوزعالىسى تۋرالى قاجەتتى اقپارات تاسىمالعا قاتىسۋشى تاراپتارعا قولجەتىمدى بولادى.

ەكىنشىسى — جاساندى ينتەللەكت نەگىزىندەگى دايىن شەشىمدەردى ءوزارا ءبولىسىپ، ولاردى حالىقارالىق كولىك دالىزدەرىنىڭ ناقتى ۋچاسكەلەرىندە بىرلەسىپ سىناقتان وتكىزۋ.

ءۇشىنشى باعىت شەكاراداعى راسىمدەردى ۇيلەستىرۋدى، تاۋەكەلدەردى باعالاۋدىڭ ورتاق تاسىلدەرىن ازىرلەۋدى جانە جۇكتى جەتكىزۋ جىلدامدىعىن ارتتىرۋدى قامتيدى.

— بىردە-ءبىر ەل كولىك ءدالىزىن ءوز كۇشىمەن تولىق سيفرلاندىرا المايدى. كونتەينەردىڭ جەتكىزىلۋ ۋاقىتى جولداعى ەڭ باياۋ ۋچاسكەگە بايلانىستى. سوندىقتان حالىقارالىق دەڭگەيدە بىرلەسىپ ارەكەت ەتۋ ماڭىزدى، — دەدى جانىبەك تايجانوۆ.

ۆيتسە-مينيستر قازاقستان حالىقارالىق كولىك دالىزدەرىنىڭ ءبىرىڭعاي سيفرلىق كەڭىستىگىن سەرىكتەس مەملەكەتتەرمەن بىرلەسىپ دامىتۋعا دايىن ەكەنىن جەتكىزدى.

ۆيتسە-ءمينيستردىڭ ايتۋىنشا، بولاشاقتا جۇك تاسىمالىنا قاتىستى مالىمەتتى ءبىر رەت ەنگىزىپ، ونى تاسىمالدىڭ بارلىق كەزەڭىندە پايدالانۋ مۇمكىندىگى جاسالۋى ءتيىس. بۇل قۇجات راسىمدەۋگە كەتەتىن ۋاقىتتى قىسقارتىپ، لوگيستيكالىق ۇدەرىستەردى جەڭىلدەتۋگە مۇمكىندىك بەرەدى.

سونىمەن قاتار جينالعان دەرەكتەردى تالداۋ ءۇشىن جاساندى ينتەللەكت تەحنولوگيالارىن پايدالانۋ ماڭىزدى.

— جاساندى ينتەللەكت جۇك تاسىمالىنىڭ قاي جەردە كەشىگۋى مۇمكىن ەكەنىن الدىن الا انىقتاۋعا، ينفراقۇرىلىمدى ءتيىمدى پايدالانۋعا جانە ىقتيمال قاۋىپتەردىڭ الدىن الۋعا كومەكتەسەدى، — دەدى جانىبەك تايجانوۆ.

ونىڭ ايتۋىنشا، حالىقارالىق جۇك تاسىمالىن جەدەلدەتۋ ءۇشىن جاڭا جولدار مەن كولىك نىساندارىن سالۋ عانا جەتكىلىكسىز. قولدانىستاعى ينفراقۇرىلىمدى ءتيىمدى پايدالانۋ، اقپارات الماسۋدى جەدەلدەتۋ جانە تاسىمالدىڭ ءار كەزەڭىندەگى كىدىرىستەردى ازايتۋ دا ماڭىزدى.

وسىعان بايلانىستى قازاقستان كولىك سالاسىنداعى تسيفرلىق جۇيەلەردى بىرىكتىرۋ جانە جاساندى ينتەللەكت تەحنولوگيالارىن قولدانۋ باعىتىنداعى جۇمىستى جالعاستىرىپ جاتىر.

بۇعان دەيىن قازاقستان قىتايدان ەۋروپاعا دەيىنگى جۇك تاسىمالىن سيفرلاندىرۋدى ۇسىنعان ەدى.