قازاقستان مەن قىتاي «قورعاس» ورتالىعىنداعى قاۋىپسىزدىكتى كۇشەيتپەك
استانا. KAZINFORM - قازاقستان مەن قىتاي «قورعاس» حالىقارالىق شەكارا ماڭى ىنتىماقتاستىعى ورتالىعىندا قاۋىپسىزدىك پەن قوعامدىق ءتارتىپتى قامتاماسىز ەتۋ ءۇشىن بىرلەسىپ جۇمىس ىستەمەك. وسىعان قاتىستى كەلىسىمدى راتيفيكاتسيالاۋ تۋرالى زاڭ جوباسى «اشىق ن ق ا» پورتالىندا جاريالاندى.
كەلىسىم قازاقستان مەن قىتايدىڭ قۇزىرلى ورگاندارىنىڭ ورتالىق اۋماعىندا قاۋىپسىزدىك پەن قۇقىقتىق ءتارتىپتى قامتاماسىز ەتۋ باعىتىنداعى ىنتىماقتاستىعىنا قۇقىقتىق نەگىز قالىپتاستىرادى.
قۇجاتتا ورتالىق اۋماعىندا جاسالۋى مۇمكىن قۇقىق بۇزۋشىلىقتاردىڭ الدىن الۋ، ولاردى انىقتاۋ، جولىن كەسۋ جانە تەرگەپ-تەكسەرۋ كەزىندە ەكى ەلدىڭ قۇزىرلى ورگاندارىنىڭ ءوزارا ءىس-قيمىل جاساۋ ءتارتىبى قاراستىرىلعان.
سونداي-اق تاراپتار ۇلتتىق قاۋىپسىزدىكتى قامتاماسىز ەتۋ، ىزدەۋدە جۇرگەن ادامداردى ىزدەستىرۋ جانە ۇستاۋ، ورتالىق اۋماعىنداعى ازاماتتار مەن ۇيىمداردىڭ مۇلكىن قورعاۋ ماسەلەلەرى بويىنشا بىرلەسەدى.
بۇدان بولەك قوعامدىق ءتارتىپتى ساقتاۋ، جول قوزعالىسىن رەتتەۋ، ورتالىقتىڭ ينفراقۇرىلىمىن كۇتىپ ۇستاۋ جانە ونىڭ جۇمىسىن باقىلاۋ ماسەلەلەرى بويىنشا كونسۋلتاتسيالار وتكىزۋ كوزدەلگەن.
ەكى ەلدىڭ قۇزىرلى ورگاندارى ءوز زاڭنامالارىنا سۇيەنە وتىرىپ، ءبىر-بىرىنە رەسمي ساۋال جولداۋ ارقىلى جۇمىس ىستەيدى. ال ۇلتتىق قاۋىپسىزدىككە قاتىستى ماڭىزدى اقپاراتتى قاجەت بولعان جاعدايدا ساۋال كۇتپەي-اق ءوزارا بولىسە الادى.
زاڭ جوباسى قوعامدىق تالقىلاۋعا شىعارىلدى. تالقىلاۋ 18-قاراشاعا دەيىن جالعاسادى.
بۇعان دەيىن قازاقستان مەن قىتاي «قورعاس» ورتالىعىنداعى قاۋىپسىزدىك ماسەلەلەرىمەن قاتار، جۇرگىزۋشى كۋالىكتەرىن ءوزارا تانۋ جونىندە دە كەلىسىمگە كەلگەن بولاتىن.
