قازاقستان ۇلتتىق پاركتەرگە بەنزينمەن جۇرەتىن كولىكتەردىڭ كىرۋىنە تىيىم سالۋى مۇمكىن
استانا. KAZINFORM — قازاقستان ۇلتتىق پاركتەرگە بەنزينمەن جۇرەتىن كولىكتەردىڭ كىرۋىن شەكتەۋى مۇمكىن. بۇل ماسەلە ەريەۆاندا قازاقستان مەن ارمەنيا وكىلدەرىنىڭ كەزدەسۋىندە تالقىلاندى. ناقتى شەشىم ازىرگە قابىلدانعان جوق. بۇل تۋرالى ەكولوگيا مينيسترلىگى ءمالىم ەتتى.
ەريەۆان قالاسىندا ب ۇ ۇ- نىڭ بيولوگيالىق ارتۇرلىلىك تۋرالى كونۆەنسياسى تاراپتارىنىڭ 17- كونفەرەنسياسى (COP17) اياسىندا قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى الىبەك قۋانتىروۆ ارمەنيا رەسپۋبليكاسىنىڭ اۋماقتىق باسقارۋ جانە ينفراقۇرىلىم ءمينيسترى داۆيد حۋداتيانمەن كەزدەستى.
كەزدەسۋ بارىسىندا تاراپتار قالدىقتاردى باسقارۋ جۇيەسىن جەتىلدىرۋ، قالدىقتاردى بولەك جيناۋ، سۇرىپتاۋ جانە قايتا وڭدەۋدى دامىتۋ، سونداي-اق وسى سالادا زاماناۋي تەحنولوگيالاردى قولدانۋ مۇمكىندىكتەرى بويىنشا ىنتىماقتاستىق ماسەلەلەرىن تالقىلادى.
جاڭارتىلاتىن ەنەرگيا كوزدەرىن پايدالانۋ جانە ەلەكتر كولىگىن دامىتۋ، ونىڭ ىشىندە ەلەكتر كولىگىن پايدالانۋعا ارنالعان ينفراقۇرىلىمدى كەڭەيتۋ پەرسپەكتيۆالارىنا ەرەكشە نازار اۋدارىلدى.
سونىمەن قاتار ەرەكشە قورعالاتىن تابيعي اۋماقتارعا كولىك قۇرالدارىنىڭ تيگىزەتىن جۇكتەمەسىن ازايتۋ ماسەلەلەرى قاراستىرىلدى.
اتاپ ايتقاندا، جەكەلەگەن تابيعات قورعاۋ اۋماقتارىنا ىشتەن جانۋ قوزعالتقىشتارى بار اۆتوكولىكتەردىڭ كىرۋىن شەكتەۋ جانە كەلۋشىلەر ءۇشىن ەكولوگيالىق قاۋىپسىز بالامالى قوزعالىس تاسىلدەرىن دامىتۋ مۇمكىندىكتەرى تالقىلاندى.
مۇنداي تاسىلدەر اتموسفەراعا شىعارىلاتىن لاستاۋشى زاتتاردىڭ كولەمىن ازايتۋعا، تابيعي ەكوجۇيەلەرگە تۇسەتىن جۇكتەمەنى تومەندەتۋگە جانە تۇراقتى ەكولوگيالىق ءتۋريزمدى دامىتۋعا ىقپال ەتۋى مۇمكىن.
كەزدەسۋ قورىتىندىسى بويىنشا تاراپتار تالقىلانعان ماسەلەلەر بويىنشا الداعى ۋاقىتتا تاجىريبە الماسۋدى جالعاستىرۋعا مۇددەلىلىك ءبىلدىردى.
ايتا كەتەيىك، قازاقستاندا كولىك سانى 6 ميلليوننان استى.
