قازاقستان حالىق كەڭەسىندە مەملەكەتتىك ءتىلدى ىلگەرىلەتۋ جونىندەگى باستامالار تالقىلاندى

استانا. KAZINFORM - راۋان كەنجەحان ۇلىنىڭ توراعالىعىمەن قازاقستان حالىق كەڭەسىنىڭ مادەنيەت پەن ازاماتتىق بىرەگەيلىكتى دامىتۋ ماسەلەلەرى جونىندەگى كوميسسياسىنىڭ وتىرىسى ءوتتى.

Қазақстан Халық Кеңесінің Мәдениет пен азаматтық бірегейлікті дамыту мәселелері жөніндегі комиссиясының отырысы
Фото: Қазақстан Халық Кеңесі

وتىرىس بارىسىندا كاسىبي ونەردى قولداۋ، مەملەكەتتىك ءتىلدىڭ قولدانىلۋ اياسىن كەڭەيتۋ، ازاماتتىق بىرەگەيلىكتى نىعايتۋ جانە جاستار تاربيەسىنە باعىتتالعان باستامالار ۇسىنىلىپ، تالقىلاندى. جيىنعا سالالىق كوميتەت ءتوراعاسى مارات ءازىلحانوۆ، سونداي- اق وڭىرلەردىڭ ساراپشىلار قاۋىمداستىعىنىڭ وكىلدەرى قاتىستى.

وتىرىستىڭ نەگىزگى بولىگى مەملەكەتتىك ءتىلدى، شىعارماشىلىق ورتانى، ادەبيەت پەن كينونى جۇيەلى قولداۋ ماسەلەلەرىنە ارنالدى.

جەكەلەگەن باستامالار مەملەكەتتىك ءتىلدى دارىپتەۋ مەن شىعارماشىلىق جوبالاردى دامىتۋعا ارنالدى. كوميسسيا ءتوراعاسى راۋان كەنجەحان ۇلى قازاقستان حالىق كەڭەسىنىڭ الاڭىندا «انا ءتىلى» رەسپۋبليكالىق وليمپياداسىن وتكىزۋدى، ءتۇرلى ەتنوس وكىلدەرى اراسىندا قازاق ءتىلى بويىنشا «جارقىن بولاشاق» وليمپياداسىن قولداۋدى جانە «ۇلتتىق ديكتانت» جوباسىن كەڭەيتۋدى ۇسىندى. بۇل ءبىلىم بەرۋ باستامالارى وقۋشىلاردىڭ اۋىزشا جانە جازباشا ساۋاتتىلىعىن ارتتىرىپ، جاستاردىڭ زياتكەرلىك الەۋەتىن دامىتۋعا ىقپال ەتەدى.

В Қазақстан Халық Кеңесі обсудили инициативы по продвижению национальных ценностей и государственного языка
Фото: Қазақстан Халық Кеңесі

ءبىلىم بەرۋ شارالارىمەن قاتار، قازاقستان حالىق كەڭەسىنىڭ مۇشەسى امانجول ءالتاي ءتۇرلى ەتنوس وكىلدەرى اراسىندا جىل سايىن «التىن شاڭىراق» رەسپۋبليكالىق ايتىسىن وتكىزۋدى جانە «بەس اسىل» ۇلتتىق شىعارماشىلىق مەگاجوباسىن ىسكە قوسۋدى ۇسىندى. جوبالار وڭىرلىك ىرىكتەۋ كەزەڭدەرىن، تالىمگەرلەرمەن جۇمىستى جانە رەسپۋبليكالىق فينالدىق بايقاۋلاردى قامتيدى. ولاردىڭ ماقساتى - ءتۇرلى ەتنوس وكىلدەرىنىڭ شىعارماشىلىق الەۋەتىن اشىپ، قوعامدىق كەلىسىمدى نىعايتۋ.

كۇن تارتىبىندە قۇندىلىق باعدارلارى مەن اقپاراتتىق مادەنيەت ماسەلەلەرىنە دە ەرەكشە نازار اۋدارىلدى. ايگۇل سادۋاقاسوۆا «ەتيكا. كەڭىستىك. قۇندىلىقتار» عىلىمي- الەۋمەتتىك جوباسىن ۇسىندى. مارات ءازىلحانوۆ باستامانى «جاڭا قوعامدىق ەتيكا» دەپ اتاۋدى ۇسىنىپ، ونىڭ مەملەكەت باسشىسىنىڭ قوعامدا جاڭا ەتيكالىق باعدارلاردى قالىپتاستىرۋ جونىندەگى مىندەتتەرىمەن ۇندەس ەكەنىن اتاپ ءوتتى. سونداي-اق بۇل باعىتتاعى جۇمىستى كونفەرەنتسيالار مەن پىكىرتالاستار وتكىزۋمەن شەكتەمەي، ءبىلىم بەرۋ ۇيىمدارى مەن سەرىكتەس مەكەمەلەردى تارتا وتىرىپ، جۇيەلى ءارى ۇزاق مەرزىمدى تەتىكتەر نەگىزىندە جۇزەگە اسىرۋ قاجەتتىگىن ايتتى.

قاتىسۋشىلار بارلىق جوبانى پرەزيدەنت ايقىنداعان «ادال ازامات»، «زاڭ مەن ءتارتىپ» جانە «تازا قازاقستان» قاعيداتتارى مەن يدەولوگيالىق باسىمدىقتارىنا سايكەس ىسكە اسىرۋدىڭ ماڭىزىن اتاپ ءوتتى.

بۇدان بولەك، ولگا سپيرينا، الينا كان جانە ەرقانات كوپجاسار ۇلى اقپاراتتىق مادەنيەتتى دامىتۋ مەن ۇلتتىق مۇرانى ساقتاۋ باعىتىنداعى ۇسىنىستارىن ورتاعا سالدى.

وتىرىس قورىتىندىسىن شىعارا وتىرىپ، كوميسسيا ءتوراعاسى راۋان كەنجەحان ۇلى بارلىق باستامانى باعالاۋدىڭ باستى ولشەمى ولاردىڭ ناقتى ناتيجەسى، قوعامعا تيگىزەر پايداسى جانە وڭ وزگەرىستەرگە ىقپالى بولۋى ءتيىس ەكەنىنە ەرەكشە نازار اۋداردى. تالقىلاۋ قورىتىندىسى بويىنشا ۇسىنىلعان جوبالار عىلىمي جانە ساراپشىلار قاۋىمداستىعىمەن، سونداي-اق مەملەكەتتىك ورگاندارمەن بىرلەسىپ، ودان ءارى پىسىقتاۋعا جىبەرىلدى.

قازاقستان حالىق كەڭەسىنىڭ مۇشەلەرى ەل ازاماتتارىنىڭ سۇرانىستارىن ەسكەرە وتىرىپ، قوعامدىق ءومىردىڭ ءتۇرلى باعىتتارى بويىنشا جاڭا وزەكتى باستامالار مەن مەملەكەتتىك ورگاندارعا ارنالعان ۇسىنىمدار ازىرلەۋدى جالعاستىرادى.