قازاقستان مەن بەلگيا اراسىندا شەشىلمەگەن ماسەلە جوق - قاسىم-جومارت توقايەۆ

مەملەكەت باسشىسى بەلگيالىقتار كورولى مەن پاتشايىمىنىڭ قازاقستانعا جاساعان تاريحي مەملەكەتتىك ساپارى ەكىجاقتى قارىم-قاتىناستىڭ جاڭا پاراعىن اشاتىنىن جانە قوس حالىق اراسىنداعى دوستىقتى نىعايتا تۇسەتىنىن اتاپ ءوتتى.

- اسا مارتەبەلى كورول، ءسىزدىڭ پاراساتتى ءارى باتىل باسشىلىعىڭىزدىڭ ارقاسىندا بەلگيا ءوزىنىڭ بىرەگەي سانالۋاندىعىن ساقتاعان ءارى الەمگە اشىق ەل رەتىندە بەلگىلى بولىپ وتىر. حالقىڭىزعا ادالدىعىڭىز بەن بەلگياداعى ءتۇرلى قاۋىم اراسىنداعى ءوزارا تۇسىنىستىكتى نىعايتۋ جولىنداعى تاباندى ەڭبەگىڭىز ءتاجدىڭ ىنتىماققا باستار ءرولىن ايقىندايدى. وسى كۇردەلى كەزەڭدە ادامي قادىر-قاسيەتى بيىك، پەرزەنتتىك پارىزدىڭ پارقىن سەزىنەتىن تۇلعا ەكەنىڭىزدى كورسەتتىڭىز. بۇل ەرەكشە سەنىم ۇيالاتادى ءارى زور قۇرمەتكە لايىق. ۇزاق جىلدار بويعى دوستىعىڭىزعا جانە قازاقستانمەن بايلانىستاردى نىعايتۋ نيەتىڭىزگە ريزامىن. بۇگىن وسى ىقپالداستىقتى تەرەڭدەتۋگە بىرلەسە ۇلەس قوساتىنىمىزعا قۋانىشتىمىن. ءسىزدىڭ كۇش-جىگەرىڭىز بەن قولداۋىڭىزدىڭ ارقاسىندا ىنتىماقتاستىعىمىزدىڭ كەلەشەگىنە ۇلكەن ۇمىتپەن ءارى سەنىممەن قارايمىز، - دەدى پرەزيدەنت.

قاسىم-جومارت توقايەۆ ەمەن-جارقىن دوستىق راۋىشتە ءارى سىندارلى سيپاتتا وتكەن ناتيجەلى كەلىسسوزدەردىڭ قورىتىندىسىنا توقتالدى.

- ءبىز قازاقستان مەن بەلگيا اراسىنداعى كوپجاقتى سەرىكتەستىكتى كۇشەيتۋگە بەيىل ەكەنىمىزدى راستادىق. ەلدەرىمىز اراسىندا قانداي دا ءبىر ساياسي قايشىلىق نەمەسە شەشىلمەگەن ماسەلە جوق. بۇل بارلىق باعىتتا ىنتىماقتاستىقتى كەڭەيتۋگە بەرىك نەگىز قالايدى. ەكونوميكالىق ىقپالداستىق سەرىكتەستىگىمىزدىڭ نەگىزگى تىرەگى بولىپ قالا بەرەدى. بەلگيا قازاقستاننىڭ جەتەكشى ينۆەستيتسيالىق سەرىكتەستەرىنىڭ قاتارىنا كىرەدى. ءسىزدىڭ ەلدىڭ 2005 -جىلدان بەرى ەكونوميكامىزعا قۇيعان ينۆەستيتسيا كولەمى 15 ميلليارد دوللاردان استى. كولىك-لوگيستيكا، اسا ماڭىزدى مينەرالدار، ەنەرگەتيكا، ونەركاسىپ، اۋىل شارۋاشىلىعى، بيوتەحنولوگيا، سيفرلاندىرۋ جانە عارىش تەحنولوگيالارى سالالارىندا ىقپالداستىقتى جانداندىرىپ، جاڭا مۇمكىندىكتەردى قولعا الۋعا ۋاعدالاستىق. تاريحي ساپارعا بەلگيالىق جەتەكشى كومپانيا وكىلدەرى قاتىسۋدا. بۇل بەلگيانىڭ ەلىمىزدىڭ ەكونوميكالىق الەۋەتىنە زور سەنىم ارتاتىنىن كورسەتەدى. ۇكىمەت تاراپىنان بەلگيا ينۆەستورلارىنىڭ قازاقستاندا قىزمەت اياسىن كەڭەيتۋىنە جانە جاڭا پەرسپەكتيۆتى جوبالاردى ىسكە اسىرۋىنا قولايلى جاعداي جاسالادى. ونىڭ تولىق ءارى ۋاقىتىلى ورىندالۋىن ءوزىم قاداعالاپ وتىرامىن، - دەدى مەملەكەت باسشىسى.

پرەزيدەنتتىڭ ايتۋىنشا، ەرتەڭگە جوسپارلانعان قازاقستان- بەلگيا ىسكەرلىك كەڭەسى، رەكتورلار فورۋمى جانە اسا ماڭىزدى ماتەريالدار بويىنشا دوڭگەلەك ۇستەل ورتاق ماقساتتار مەن ناقتى ناتيجەلەرگە قول جەتكىزەتىن ماڭىزدى الاڭ بولماق.

اتالعان ءىس-شارالاردىڭ قورىتىندىسى بويىنشا سەرىكتەستىكتى دامىتۋعا تىڭ سەرپىن بەرەتىن ونداعان كەلىسىم مەن قۇجاتقا قول قويىلادى.

ايتا كەتەيىك، بۇعان دەيىن 11-14-قازان كۇندەرى بەلگيالىقتار كورولى فيليپپ جانە پاتشايىم ماتيلدانىڭ قازاقستانعا مەملەكەتتىك ساپارى وتەتىنى حابارلاندى.

ساپار باعدارلاماسى ءتورت نەگىزگى باعىتتى قامتيدى. ولار - اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.

بەلگيانىڭ فەدەرالدىق ءمينيسترى جان-ليۋك كريۋيكە قازاقستاندىقتار قىزمەتتىك پاسپورتپەن ەۋروپانىڭ ءۇش ەلىنە ۆيزاسىز بارا الاتىنىن مالىمدەگەن ەدى.

عىلىم جانە جوعارى ءبىلىم ءمينيسترى ساياسات نۇربەك بەلگيانىڭ 12 ۋنيۆەرسيتەتىمەن كەلىسىمشارت ورناتىلاتىنىن ايتتى.