قازاقستان ارقىلى وتكەن جۇك پويىزىنان 1019 نوۋتبۋك ۇرلاعاندار سوتتالدى
اتىراۋ. KAZINFORM - قازاقستان اۋماعى ارقىلى باتىس ەۋروپاعا باعىت العان ترانزيتتىك جۇك كونتەينەرلەرىنەن قىمبات تەحنيكا ۇرلاعان ءتورت ادام سوتتالدى. كەلتىرىلگەن ماتەريالدىق زالال - 632,9 ميلليون تەڭگە.
كولىكتەگى پوليتسيا دەپارتامەنتى باستىعىنىڭ ءبىرىنشى ورىنباسارى تەمىرجان رامازانوۆتىڭ ايتۋىنشا، جەدەل-ىزدەستىرۋ ءىس-شارالارى بارىسىندا اباي وبلىسىنىڭ ءتورت تۇرعىنى ۇستالعان. تەرگەۋ مالىمەتىنشە، ولار الدىن الا ءسوز بايلاسىپ، جۇك پويىزدارىنىڭ كونتەينەرلەرىنە بىرنەشە رەت زاڭسىز كىرىپ، نوۋتبۋكتەر مەن ويىن پريستاۆكالارىن ۇرلاعان.
— بىلتىر مامىر ايىندا جەتىسۋ وبلىسىنداعى تورپالدى ستانسياسىندا قىتاي — پولشا باعىتىمەن كەلە جاتقان كونتەينەردەن 1019 نوۋتبۋك ۇرلانعان. كەيىن ۇرلانعان تەحنيكانىڭ ءبىر بولىگى الماتىدا ساتىلعان. ۇرلىق سالدارىنان جۇك تيەسىلى كومپانيالارعا جالپى سوماسى 632,9 ميلليون تەڭگە كولەمىندە ماتەريالدىق زالال كەلتىرىلدى، — دەدى تەمىرجان رامازانوۆ.
سوتقا دەيىنگى تەرگەپ-تەكسەرۋ بارىسىندا كولىك پوليتسەيلەرى قاجەتتى تەرگەۋ ارەكەتتەرىن جۇرگىزىپ، ۇرلانعان تەحنيكانىڭ ءبىر بولىگىن تاركىلەدى. قىلمىستىق ءىس بويىنشا فيگۋرانتتاردىڭ كىناسى تولىق دالەلدەندى.
— جەتىسۋ وبلىسى الاكول اۋداندىق سوتىنىڭ ۇكىمىمەن ءتورت سوتتالۋشى اسا ءىرى مولشەردە ۇرلىق جاساعانى ءۇشىن كىنالى دەپ تانىلدى. ولارعا 6 جىل 7 ايعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى، — دەپ حابارلادى كولىكتەگى پوليتسيا دەپارتامەنتىنىڭ باسپا ءسوز قىزمەتى.
بۇعان دەيىن اتىراۋدا «حاكەر اتىراۋ» لاقاپ اتىمەن تانىلعان نۇرلان جاڭبىربايەۆقا قاتىستى قىلمىستىق ءىس قارالىپ جاتقانىن جازعان ەدىك. وعان بىرنەشە مارتە الاياقتىق جاسادى دەگەن ايىپ تاعىلىپ وتىر.
