قازاقستان الەم بويىنشا اسكەري قۋات رەيتينگىندە 58-ورىندا تۇر

الەم بويىنشا 145 مەملەكەت قامتىلعان تىزىمدە ەلىمىز 58-ورىنعا يە بولدى. ال ورتالىق ازيا ەلدەرى اراسىندا ەلىمىز جان باسىنا شاققانداعى اسكەري شىعىن كولەمى بويىنشا ءبىرىنشى ورىندا تۇر.

Global Firepower ۇيىمىنىڭ دەرەكتەرىنە سايكەس، قازاقستاننىڭ اسكەري قۋات يندەكسى (PwrIndx) 1.0433 دەڭگەيىندە باعالاندى. بۇل كورسەتكىش نولگە نەعۇرلىم جاقىن بولعان سايىن، سوعۇرلىم مەملەكەتتىڭ اسكەري الەۋەتى جوعارى دەپ ەسەپتەلەدى.

الەمدىك رەيتينگتە كوشباسشىلىق ورىندى 0.0741 يندەكسىمەن ا ق ش ساقتاپ وتىر. ەكىنشى ورىندا رەسەي (0.0791) ، ءۇشىنشى ورىندا قىتاي (0.0919) ورنالاسقان.

العاشقى وندىققا ءۇندىستان (0.1346)، وڭتۇستىك كورەيا (0.1642)، فرانسيا (0.1798)، جاپونيا (0.1876)، تۇركيا (0.1975)، يتاليا (0.2211) جانە برازيليا (0.2374) ەندى.

رەيتينگتىڭ ەڭ سوڭعى ورىندارىن ليبەريا (3.9275)، سۋرينام (4.0538)، ورتالىق افريكا رەسپۋبليكاسى (4.2381)، بەليز (4.3602) جانە بۋتان (5.7991) يەلەندى.

سونىمەن قاتار، قورعانىس بيۋدجەتى بويىنشا قازاقستاننىڭ كورسەتكىشى 5,836 ميلليارد ا ق ش دوللارىن قۇرادى.

ەلىمىزدە حالىق سانىنا شاققانداعى اسكەري شىعىن جىلىنا ءبىر ادامعا شامامەن 284 ا ق ش دوللارىن قۇرايدى. بۇل - ورتالىق ازياداعى ەڭ جوعارى كورسەتكىش.

سالىستىرمالى تۇردە العاندا، تۇرىكمەنستاندا بۇل كورسەتكىش شامامەن 209 دوللاردى، وزبەكستاندا - 162 دوللار، قىرعىزستاندا - 88 دوللار، ال تاجىكستاندا 42 دوللاردان ءسال اسادى.

ايتا كەتەيىك، Global Firepower رەيتينگتى ازىرلەۋ بارىسىندا 60-تان استام كورسەتكىش ەسكەرىلەدى. ولاردىڭ قاتارىندا اسكەر سانى، قارجىلىق مۇمكىندىك، لوگيستيكا، گەوگرافيالىق ورنالاسۋ، اسكەري تەحنيكامەن قامتىلۋ جانە ەكونوميكالىق تۇراقتىلىق بار.

وسىعان دەيىن قازاقستان اسكەرى قانداي تەحنيكامەن جابدىقتالعانىنا شولۋ جاساعان ەدىك.