قازاقستان مەن ا ق ش سۋ سالاسىندا كۇش بىرىكتىرەدى
استانا. kazinform - قازاقستان مەن اريزونا ۋنيۆەرسيتەتى سۋ رەسۋرستارىن باسقارۋ، گيدرولوگيالىق مودەلدەردى دامىتۋ جانە ماماندار دايارلاۋ باعىتىنداعى ىنتىماقتاستىقتىڭ جول كارتاسىن ازىرلەپ جاتىر. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
سۋ رەسۋرستارى جانە يرريگاتسيا مينيسترلىگى مەن اريزونا ۋنيۆەرسيتەتى (ASU) ىنتىماقتاستىقتىڭ جول كارتاسىن ازىرلەپ جاتىر. قۇجات اياسىندا قازاقستاندىق ماماندارعا ارنالعان بىرلەسكەن سەمينارلار، وقۋ كۋرستارى مەن تاعىلىمدامالار ۇيىمداستىرۋ، ەلىمىزدىڭ ەرەكشەلىكتەرىن ەسكەرە وتىرىپ، گيدرولوگيالىق مودەلدەردى ازىرلەۋ جانە بەيىمدەۋ، سونداي-اق كليماتتىڭ وزگەرۋى جاعدايىندا سۋ رەسۋرستارىن تۇراقتى باسقارۋ سالاسىنداعى بىرلەسكەن جوبالاردى ىسكە اسىرۋ كوزدەلگەن. ەسكە سالايىق، بيىل سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ اريزونا ۋنيۆەرسيتەتىنىڭ پرەزيدەنتى سۋرەش گاريمەللامەن كەزدەسىپ، ىقتيمال ىنتىماقتاستىق باعىتتارىن تالقىلاعان بولاتىن.
— ءبىز كادرلار دايارلاۋ جانە جۇمىس ىستەپ جۇرگەن مامانداردىڭ بىلىكتىلىگىن ارتتىرۋ سالاسىنداعى حالىقارالىق ىنتىماقتاستىققا ءاردايىم اشىقپىز. ماسەلەن، تاراز قالاسىنداعى قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى ۆەنگريانىڭ جەتەكشى جوعارى وقۋ ورىندارىمەن قوس ديپلومدى ءبىلىم بەرۋ باعدارلاماسىن جۇزەگە اسىرىپ كەلەدى. ال مينيسترلىككە قاراستى ۇيىمدار قىتاي، ا ق ش جانە نيدەرلاند ماماندارىمەن تىعىز بايلانىستا جۇمىس ىستەيدى، — دەدى سۋ رەسۋرستارى جانە يرريگاتسيا ۆيتسە-ءمينيسترى تالعات مومىشيەۆ.
ايتا كەتەيىك، قازىرگى ۋاقىتتا اريزونا ۋنيۆەرسيتەتى قازاقستاندا م. قوزىبايەۆ اتىنداعى سولتۇستىك قازاقستان ۋنيۆەرسيتەتىنىڭ بازاسىندا جۇمىس ىستەيدى. بۇل جوعارى وقۋ ورىندارى بىرلەسكەن قوس ديپلومدى ءبىلىم بەرۋ باعدارلاماسىن جۇزەگە اسىرىپ، ءبىرقاتار عىلىمي- زەرتتەۋ جوبالارىن ىسكە اسىرىپ كەلەدى.
