قازاقستان 28 ەلدىڭ ستۋدەنتتەرىنە شاكىرتاقى، عالىمدارىنا گرانت بەرۋگە دايىن
باكۋ. KAZINFORM - قاسىم-جومارت توقايەۆ ا و س ش ك VII سامميتىندە 28 ەلدىڭ ستۋدەنتتەرى مەن عالىمدارىنا قولداۋ كورسەتۋدى ۇسىندى، دەپ حابارلايدى اقوردانىڭ باسپا ءسوز قىزمەتى.
- بۇدان مىڭ جىلدان استام ۋاقىت بۇرىن ۇلى فيلوسوف ءارى عالىم ءال-فارابي قوعامنىڭ قۋاتى ونىڭ حالقىنىڭ ءبىلىمى مەن ادامگەرشىلىك قاسيەتتەرىندە ەكەنىن ايتقان. سوندىقتان ۇيىمعا مۇشە مەملەكەتتەردى ا و س ش ك- ءنىڭ ادامي كاپيتال سالاسىنداعى ارىپتەستىك ورناتۋعا شاقىرامىن. ماقسات - جاس ۇرپاقتى تەحنولوگيالىق، ەكونوميكالىق جانە گەوساياسي جاڭعىرۋلار ەكپىنىمەن ءسات سايىن وزگەرىپ جاتقان الەمگە بەيىمدەۋ. ءبىز وسى ماڭىزدى ماسەلەنى شەشۋگە ۇلەس قوسۋ ءۇشىن ساراپشىلىق تاجىريبەمىزدى، ماڭدايالدى ۋنيۆەرسيتەتتەر مەن عىلىمي-زەرتتەۋ ۇيىمدارىنىڭ الەۋەتىن ۇسىنۋعا دايىنبىز. كەلەسى جىلى قاۋىپسىزدىك پەن سەنىمدى نىعايتۋ سالاسىنداعى عىلىمي زەرتتەۋگە ارنالعان ستيپەنديالىق باعدارلاما ىسكە قوسىلۋى ىقتيمال. قازاقستان ۇيىمعا مۇشە 28 مەملەكەتتىڭ ستۋدەنتتەرىنە شاكىرتاقى ۇسىنۋعا، سونداي-اق عالىمدارعا زەرتتەۋ گرانتتارىن بەرۋگە ءازىر، - دەدى مەملەكەت باسشىسى.
قازاقستان پرەزيدەنتى ءسوز سوڭىندا ازەربايجاننىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە ءتوراعالىعىن تابىستى جالعاستىرۋىنا تىلەكتەس ەكەنىن جەتكىزدى. سونداي-اق بۇگىن قابىلدانعان باكۋ دەكلاراتسياسى الداعى جۇمىسقا بەرىك نەگىز قالايتىنىنا سەنىم ءبىلدىردى.
