قازاقستان 2,3 ميلليون توننا استىق ەكسپورتتادى: قىتاي مەن اۋعانستانعا جەتكىزىلىم كۇرت ءوستى
استانا. KAZINFORM — قازاقستاندىق استىققا شەتەل سۇرانىسى ارتىپ كەلەدى. 2026 -جىلدىڭ قىركۇيەك- قازان ايلارىندا ەل 2,26 ميلليون توننا جاڭا ءونىم استىعىن ەكسپورتتاپ، وتكەن جىلعى كورسەتكىشتەن %2- عا اسىپ ءتۇستى. اسىرەسە قىتاي مەن اۋعانستانعا جەتكىزىلىم كۇرت وسكەن. ال قازاقستاندىق بيداي ەكسپورتى توعىز ايدا 6,1 ميلليون تونناعا جەتتى. بۇل تۋرالى ا ش م ءمالىم ەتتى.
«قازاقستان تەمىر جولى» ۇ ك» اكسيونەرلىك قوعامى دەرەكتەرىنە سايكەس، 2026 -جىلعى قىركۇيەك -قازان ارالىعىندا شەتەلگە 2 ميلليون 262 مىڭ توننا استىق جونەلتىلدى. بۇل وتكەن ماۋسىمنىڭ سايكەس كەزەڭىندەگى كورسەتكىشتەن %2- عا جوعارى.
ا ش م مالىمەتىنشە بىلتىر اتالعان مەرزىمدە 2 ميلليون 219 مىڭ توننا استىق ەكسپورتتالعان ەكەن.
ەكسپورت كولەمىنىڭ ءوسىمى قالىپتاسقان وتكىزۋ نارىقتارىندا دا، جاڭا باعىتتاردا دا بايقالادى.
ماسەلەن، ءداستۇرلى ەكسپورت نارىقتارىنا استىق جەتكىزۋ كولەمى %1,2- عا ارتىپ، 1 ميلليون 430 مىڭ توننانى قۇرادى. اتاپ ايتقاندا، وزبەكستانعا جونەلتىلگەن استىق كولەمى %1,3- عا ءوسىپ، 1 ميلليون 63 مىڭ تونناعا، تاجىكستانعا جەتكىزىلىم %19- عا ارتىپ، 351 مىڭ تونناعا جەتتى.
قىتاي مەن اۋعانستان باعىتتارىندا دا ايتارلىقتاي قارقىن تىركەلدى. قىتايعا استىق ەكسپورتى 2,6 ەسەگە ارتىپ، 145 مىڭ توننادان 373 مىڭ تونناعا دەيىن، ال اۋعانستانعا جەتكىزىلىم 1,9 ەسەگە ءوسىپ، 104 مىڭ توننادان 200 مىڭ تونناعا دەيىن ۇلعايدى.
قازاقستاندىق بيداي ەكسپورتى بويىنشا دا ءوسىم ساقتالىپ وتىر. مەملەكەتتىك كىرىستەر كوميتەتىنىڭ مالىمەتىنشە، 2026 -جىلعى قاڭتار- قىركۇيەك ايلارىندا بيداي ەكسپورتىنىڭ كولەمى 6,1 ميلليون تونناعا جەتىپ، وتكەن جىلدىڭ سايكەس كەزەڭىمەن سالىستىرعاندا %15- عا ارتتى (5,3 ميلليون توننا).
قازاقستاندىق بيدايدىڭ نەگىزگى ساتىپ الۋشىلارى قاتارىندا وزبەكستان، تاجىكستان جانە اۋعانستان بار. وزبەكستانعا ەكسپورت %49- عا ءوسىپ، 3,8 ميلليون توننانى، تاجىكستانعا جەتكىزىلىم %13,6- عا ارتىپ، 1 ميلليون توننانى قۇرادى. ال اۋعانستانعا بيداي ەكسپورتى 3,4 ەسەگە ۇلعايىپ، 663 مىڭ تونناعا جەتكەن.
سونىمەن قاتار قازاقستاندىق بيداي ەكسپورتتالاتىن ەلدەردىڭ اۋماعى دا كەڭەيىپ كەلەدى. تۋنيسكە 23,3 مىڭ توننا، فرانسياعا 6 مىڭ توننا بيداي جونەلتىلدى. يرانعا ەكسپورت كولەمىنىڭ دە ەداۋىر وسكەنى بايقالادى. بۇل ەلگە جەتكىزىلگەن بيداي كولەمى 67 مىڭ توننانى قۇرادى.
استىق ەكسپورتىنىڭ ۇلعايۋى قازاقستاندىق استىققا دەگەن تۇراقتى سۇرانىستى جانە وتاندىق ءونىمنىڭ حالىقارالىق نارىقتارداعى پوزيتسياسىنىڭ نىعايىپ كەلە جاتقانىن كورسەتەدى.
