قازاقستان 2027-جىلى بەس سپورت تۇرىنەن الەم چەمپيوناتىن وتكىزەدى - پرەزيدەنت
استانا. KAZINFORM - سپورت مەملەكەتتىڭ جاھانداعى ابىرويى مەن بەدەلىنىڭ كورسەتكىشتەرىنىڭ بىرىنە، قوعامدىق ديپلوماتيانىڭ قۇرالىنا اينالدى. بۇل پىكىردى پرەزيدەنت قاسىم-جومارت توقايەۆ ازيا ويىندارى جانە ازيا پاراويىندارىنىڭ جۇلدەگەرلەرىن ماراپاتتاۋ راسىمىندە ايتتى.
مەملەكەت باسشىسى سپورتتىڭ وسى الەۋەتىن تولىعىمەن پايدالانۋ قاجەت ەكەنىن جەتكىزدى.
- قازاقستان سپورت دەرجاۆاسى رەتىندەگى پوزيتسياسىن دايەكتى تۇردە نىعايتىپ، ەلىمىزدە ەڭ جوعارى دەڭگەيدەگى جارىستاردى ۇيىمداستىرىپ كەلەدى. 2027-جىلى بوكس، دزيۋدو، تاەكۆوندو، ۇستەل تەننيسى جانە كيبەرسپورت سەكىلدى تانىمال سپورت تۇرلەرىنەن الەم چەمپيوناتىن وتكىزەمىز. ياعني ەلوردادا جوعارى دەڭگەيدە ءبىرقاتار دودا ۇيىمداستىرىلادى. بۇدان بولەك، قازاقستاندا جاسوسپىرىمدەر اراسىندا شورت-ترەكتەن الەم بىرىنشىلىگى ۇيىمداستىرىلادى. كوكتەمدە استانادا ۋەفا-نىڭ 51-كونگرەسى وتەدى. بۇل بۇكىل الەمدەگى كاسىپقوي فۋتبولشىلار مەن فۋتبولسۇيەر قاۋىمنىڭ قىزىعۋشىلىعىن تۋدىرادى،-دەدى قاسىم-جومارت توقايەۆ.
مۇنداي اۋقىمدى، جۇرتشىلىق نازارىنداعى سپورتتىق ءىس-شارالاردى ۇيىمداستىرۋ سالالىق مينيسترلىك پەن فەدەراتسيانىڭ، جالپى ۇكىمەت پەن ۇلتتىق وليمپيادا كوميتەتىنىڭ بىرلەسە ايانباي جۇمىس ىستەۋىن تالاپ ەتەدى. ويتكەنى مۇندا قازاقستاننىڭ ابىروي-بەدەلى سىنعا تۇسەدى.
- بۇل جارىستاردىڭ ءبارى ەلىمىزدىڭ يميدجىن ارتتىرۋعا، سونداي-اق الەۋمەتتىك ينفراقۇرىلىمدى، ءتۋريزمدى، وتاندىق سپورت مەكتەبىن دامىتۋعا قىزمەت ەتەدى. بيىل ەلوردامىزدا دۇنيەجۇزىلىك دوپينگكە قارسى كۇرەس اگەنتتىگىنىڭ كونگرەسى (WADA - World Anti-Doping Agency) وتەدى. قازاقستان تازا، دوپينگسىز سپورتتى ىلگەرىلەتۋ، وزىق حالىقارالىق ستاندارتتار مەن تاجىريبەلەردى ەنگىزۋ ءۇشىن كۇش سالۋعا ءازىر. سپورتتاعى ادال باسەكەلەستىك قاعيداتتارى مەملەكەتىمىزدىڭ ستراتەگيالىق باعدارىنىڭ نەگىزىنە اينالعان ادىلەتتىلىك يدەياسىنا تولىعىمەن ساي كەلەدى،-دەدى مەملەكەت باسشىسى.
ايتا كەتەيىك، اقوردادا پرەزيدەنت ازيا ويىندارى جانە ازيا پاراويىندارىنىڭ جەڭىمپازدارى مەن جۇلدەگەرلەرىن ماراپاتتادى.
جاپونيادا وتكەن XX جازعى ازيا ويىندارى اياقتالادى. قازاقستان قۇراماسى 84 مەدال (12 التىن، 24 كۇمىس جانە 48 قولا) ولجالاپ، 46 ەلدىڭ ىشىندە جالپىكوماندالىق ەسەپتە 8-ورىنعا تۇراقتادى.
ال ازيا پاراويىندارىندا قازاقستان 50 مەدال جەڭىپ الىپ، ۇزدىك وندىققا ەندى.
بۇعان دەيىن مەملەكەت باسشىسى سپورت سالاسى ءاردايىم مەملەكەتتىڭ باستى نازارىندا بولاتىنىن ايتقان ەدى.
