قازاقشانى ەركىن سويلەي الاتىن جاساندى ينتەللەكت ازىرلەندى

استانا. KAZINFORM - ەلىمىزدە Kaz-LLM تىلدىك مودەلى ازىرلەندى. بۇل جاساندى ينتەللەكت قازاقشانى ەمىن-ەركىن تۇسىنەدى جانە سويلەي الادى، دەپ حابارلايدى 24KZ.

جاڭا جوبانىڭ شەتەلدىك ءىرى پلاتفورمالاردان ارتىقشىلىعى كوپ. Kaz-LLM تانىمال چات- GPT پلاتفورماسىنا ۇقساس. الايدا جاڭا جۇيە قازاق دۇنيەتانىمىنا تولىق بەيىمدەلگەن.

«ويتكەنى ونى ازىرلەۋ بارىسىندا ۇلتتىق مادەنيەتىمىزدى تانىتاتىن ادەبي جانە عىلىمي شىعارمالار قولدانىلدى»، - دەيدى ماماندار.

اسپانديار نۇريمانوۆ، ISSAI دەرەكتەر تالداۋشىسى:

- ءبىز 150 ميلليارد استام «توكەن» جينادىق. ول تەك قازاق ينتەرنەتىنەن ەمەس، باسقا دا تىلدىك ينتەرنەتتەن دەرەكتەردى الىپ، سول دەرەكتەر ارقىلى ءبىزدىڭ مودەلىمىزدى ۇيرەتتىك سول تىلگە. سول ۇيرەتكەنىمىز بويىنشا قازاقتىڭ سالت-داستۇرىمەن، قالاي دۇرىس ستيلدە جازۋ كەرەك ەكەنىن ءبارىن تۇسىنەدى. جاڭا مودەل قازاق، ورىس، اعىلشىن جانە تۇرىك تىلدەرىن ءتۇسىنىپ، كەز كەلگەن ءماتىندى ەمىن-ەركىن اۋدارادى.

دەگەنمەن ەڭ باستى ارتىقشىلىق بۇل ەمەس. جوبا اۆتورلارىنىڭ ايتۋىنشا، دەرەكتەر مۇقيات قورعالادى. مىسالى، حالىقارالىق پلاتفورمالاردى قولدانعان كەزدە مەملەكەتتىك ماڭىزدى مالىمەتتەر شەتەل اسىپ كەتەدى. ال وتاندىق مودەلدە اقپاراتتىڭ بارلىعى ەل اۋماعىندا ساقتالادى.

مادينا ابدۋراحمانوۆا، ISSAI اعا دەرەكتەر تالداۋشىسى:

- وكىنىشكە قاراي، قازىر ءتۇرلى اقپاراتتىق سانكسيالار بار. ەلىمىز كوپۆەكتورلى ساياسات ۇستانعانىمەن، ينتەرنەت ماسەلەسىنە نەمەسە ءتۇرلى ساياسي شەشىمدەرگە بايلانىستى كەيبىر سەرۆيستەر جۇمىسىن توقتاتۋى مۇمكىن. سوندىقتان جاساندى ينتەللەكت مودەلىمىزدى دايىنداۋ ۇلتتىق اقپاراتتىق دەربەستىگىمىزدى قامتاماسىز ەتەدى. قازىر باعدارلاما سىناقتاپ ءوتىپ جاتىر. ونىڭ نەگىزىندە مەملەكەتتىك پورتالدار ءۇشىن دىبىستىق كومەكشىلەر، ءماتىندى اۋدارۋ جانە تالداۋ قۇرالدارى، قۇجاتتاردى اۆتوماتتاندىرۋ جۇيەسى جاسالىپ جاتىر.

جاۋاپتى مينيسترلىكتىڭ بولجامىنشا، ق«از للم» سان سالانى قامتيتىن سيفرلىق ونىمگە اينالادى.

دارحان مىرزابايەۆ، ق ر سيفرلىق دامۋ، يننوۆاتسيالار جانە ايروعارىش ونەركاسىبى مينيسترلىگىنىڭ كوميتەت ءتوراعاسىنىڭ ورىنباسارى:

- مىسالى، مەديتسينا سالاسىنىڭ مامانى ءبىر ءونىم دايىنداۋ ءۇشىن چات-بوت نەمەسە كومەكشى قاجەت دەلىك. ءدارى-دارمەكتەردى تەكسەرۋ ءۇشىن بۇل دەرەكتەردىڭ نەگىزىندە ءوز مودەلىن بەيىمدەي الادى. وسىلاي فارماتسيەۆتيكالىق پرەپاراتتار تۋرالى بەلگىلى ءبىر دەرەكتەردى قوسىپ، ءوز باعدارلاماسىن جاساۋىنا بولادى.

جوبانى ازىرلەۋگە تەك قازاقستاندىق ІТ-ماماندار، تالداۋشىلار مەن زەرتتەۋشىلەر جۇمىلدىرىلدى. نەگىزگى جۇمىستار 8 ايعا جالعاسقان. تىلدىك مودەل بارلىق قازاقستاندىق ءۇشىن قولجەتىمدى بولادى.