قازاقشا كىتاپتاردىڭ ساۋداسى قىزىپ تۇر

تالعامعا قاراي جانر دا، فورمات تا ءارتۇرلى. قىزىققان دۇنيەسىن كىتاپحانادان ىزدەيدى، دۇكەننەن ساتىپ الادى. ەندى ماركەتپلەيستەردىڭ قىزمەتى تىپتەن وڭتايلى بولدى.

 كىتاپ وقۋ ترەند پە؟ جوق. مۇنى ۋاقىتشا قۇبىلىس دەۋگە كەلمەيدى. ارنايى ساۋالناماعا قاتىسقانداردىڭ جارتىسىنان استامى كىتاپتى تۇراقتى وقيتىنىن ايتقان. دەمەك، بۇگىنگى تاڭدا كىتاپ وقۋ ءسان عانا ەمەس، جاقسى ادەت، ءتىپتى مادەنيەتكە اينالىپ كەلەدى. ماسەلەن، بىلتىر ەلدە قازاق تىلىندەگى 400 مىڭنان اسا كىتاپ ساتىلعان. ءتىپتى كەيىنگى 4 جىلدا كورسەتكىش 2 ەسە ءوستى. بۇل كىتاپ پالاتاسىنىڭ دەرەگى. باسپا ۇيلەرى دە تالعامپاز وقىرمان سانى جىلدان-جىلعا ارتىپ جاتقانىن بايقاعان.

قانات بيسەنعازين، Foliant باسپاسىنىڭ قوعاممەن بايلانىس بويىنشا رەسمي وكىلى:

- ەڭ شىنشىل، ەڭ ءادىل ستاتيستيكا بۇل نارىق قوي. ءبىز ءوزىمىزدىڭ شىعارىپ جاتقان ونىمدەرىمىزبەن دە ايتا الامىز. سەبەبى ونىمدەرىمىزگە سۇرانىس تومەندەگەن جوق، سول دەڭگەيدە. كەيبىر پوزيتسيالار بويىنشا قايتا كوتەرىلىپ جاتىر. سوندىقتان قوعامدا كىتاپ سالاسىنا، كىتاپ اينالىمىنا، كىتاپ ساتىپ الۋعا دەگەن قىزىعۋشىلىقتىڭ جوعارى ەكەنىن ايتا الامىز. وسى قارقىندى باسەڭدەتپەۋ ءۇشىن كىتاپتىڭ قولجەتىمدى بولۋى ماڭىزدى.

 دەگەنمەن، وزىندىك قۇن سىرتتان كەلەتىن قاعاز، بوياۋ جانە پوليگرافيالىق بۇيىمدارعا تاۋەلدى. سوعان قاراماستان باسپالار باعانى مۇمكىندىگىنشە تۇراقتى ۇستاۋعا تىرىسادى. بۇعان مەملەكەتتىڭ دە قولداۋى بار. قازىر كىتاپتى باسىپ شىعارۋ جانە اينالىمعا ەنگىزۋ قىزمەتتەرى قوسىمشا قۇن سالىعىنان بوساتىلعان. مەملەكەتتىك تاپسىرىس تا بار. بۇدان بولەك ساۋدا ءتاسىلى دە وزگەرىپ جاتىر.

قانات بيسەنعازين، Foliant باسپاسىنىڭ قوعاممەن بايلانىس بويىنشا رەسمي وكىلى:

- ماركەتپلەيستەر ارقىلى ساتىلاتىن 25-30 پايىز عانا، قالعاندارى تىكەلەي كوتەرمە ساۋدا ارقىلى ساتىپ الىنادى. بىزدەن ءىرى ساۋدا ورىندارى ساتىپ الىپ، وزدەرىنىڭ دۇكەندەرىندە، دۇكەندەر جەلىسىندە ءارىقاراي تاراتادى. وقىرماندار بىزدەن تىكەلەي الۋ ءۇشىن ماركەتپلەيستەر ارقىلى تاپسىرىس بەرە الادى.

ماناپ مەيىرجان قىزى ءۇشىن كىتاپ وقۋ جاي عانا حوببي ەمەس، ءومىرىنىڭ ءبىر بولىگى. ول ەلەكتروندى كىتاپ پەن قاعاز كىتاپتى قاتار وقۋدى داعدىعا اينالدىرعان.

ماناپ مەيىرجان قىزى، وقىرمان:

 - بىزدە «پاراقتا» دەگەن قوسىمشا بار. ول جەردە ءبىز ءوزىمىزدىڭ وقىعان كىتاپتارىمىزدى ەلەكتروندى تۇردە جۇكتەپ قويامىز. ول وتە پايدالى. ول جەردەن ءبىز ەلەكتروندى تۇردە قانشا كىتاپ وقىدىق، ءبارىن كورە الامىز. 

قازىر ول «وي وردا» كىتاپ تالقىلاۋ كلۋبىنىڭ مۇشەسى. مۇندا 300-گە تارتا وقىرمان تىركەلگەن. ولار ءار ايدىڭ اياعىندا باس قوسىپ، بىردەن ءۇش كىتاپتى تالداپ ۇلگەرەدى.

جانسۇلتان عيزات ۇلى، «وي وردا» قاۋىمداستىعىنىڭ ۆيتسە-پرەزيدەنتى:

- ءبىزدىڭ ماقساتىمىز سول. وقىرماندار بىرگە ءجۇرۋ كەرەك. وي الماسۋ كەرەك، ءبىر كىتاپ ۇناماسا، وعان سىني پىكىر ايتا الۋ كەرەك. وقىرماننىڭ ەڭ نەگىزگى مىندەتى ءبىز ويلايمىز، ويلانۋ دەپ. ياعني ءبىز ءبىر كىتاپتى وقىدىق. ول جاقتاعى ويلار ءبىزدى، قوعامدى جاقسارتۋعا كومەكتەسۋ كەرەك.

كىتاپ وقيتىن ورتا قالىپتاستىرۋدىڭ تاعى ءبىر الاڭى - الەۋمەتتىك جەلى. اسىرەسە جاستار اراسىندا كىتاپ تۋرالى پىكىر الماسۋ، وقىعان تۋىندىسىن تالقىلاۋ جانە وزگەلەرگە ۇسىنۋ ءۇردىسى قالىپتاسقان. مۇنى مۇعالىمدەر ۇتىمدى پايدالانادى.

 ولجاس سەمسەرحان ۇلى تيكتوك ارقىلى جاقسى داعدىنى وقۋشىلارىنىڭ بويىنا ءسىڭىرىپ ءجۇر.

 ولجاس سەمسەرحان ۇلى، رايىمبەك باتىر اتىنداعى №50 «قازعارىش» مەكتەپ-ليتسەيى ديرەكتورىنىڭ ورىنباسارى:

 - كىتاپ تالقىلايتىن كەزدە ءبىر كىتاپتى الىپ، قاتە جىبەرىپ قويساڭىز، وعان نەشەتۇرلى كوممەنتاريلەر جازادى. ونداي ادامدار سول كىتاپتى وقىعان. ەگەر وقىمايتىن بولسا، ول ادامدار ونداي پىكىر بىلدىرمەۋشى ەدى. سول ارقىلى سول كىتاپتىڭ قانشالىقتى دەڭگەيدە ترەندتە ەكەنى، قانشالىقتى وقىلىپ جاتقانىن، سودان بىلۋگە بولادى.

ءيا، كىتاپ وقۋ مادەنيەتىن ىلگەرىلەتۋگە كىتاپحانا عانا ەمەس، ارنايى كلۋبتار، ءتىپتى ونلاين ەلەكتروندى پلاتفورمالار دا ىقپال ەتىپ جاتىر. سوعان قاراعاندا بۇگىنگى كۇنى جۇرت كىتاپ وقىمايدى دەۋگە كەلمەيدى. كىتاپتىڭ كوپتەپ ساتىلعانى وقىرماننىڭ دا از ەمەستىگىنىڭ ايقىن دالەلى.

  24.kz