قازاق تەلەۆيزياسىنىڭ اناسى اتانعان زۇلحيا مۇقان قىزى جۇماتوۆا 106 جاسىندا ومىردەن وزدى

استانا. قازاقپارات - «قازاق ديكتورلارىنىڭ اناسى» اتانعان، قازاق تەلەۆيزياسىنىڭ تۇڭعىش ديكتورلارىنىڭ ءبىرى زۇلحيا مۇقان قىزى جۇماتوۆا 106 جاسىندا ومىردەن وزدى.

Зұлқия Жұматова
Фото: kaz.orda.kz

 زۇلحيا مۇقان قىزى 1920 -جىلى 20-اقپاندا پاۆلودار وبلىسىنىڭ باياناۋىل اۋدانىندا دۇنيەگە كەلگەن. 15 جاسىندا اناسىنان ايىرىلىپ، سەگىز بالانىڭ ۇلكەنى رەتىندە باۋىرلارىنا قامقور بولعان. ءومىردىڭ قيىندىعىنا مويىماي، بىلىمگە، ءسوز ونەرىنە دەگەن قۇشتارلىعى ونى ۇلكەن جولعا الىپ كەلدى. 1958 -جىلى الماتى تەلەستۋدياسى اشىلعاندا ديكتورلىق بايقاۋ جاريالانادى. بايقاۋعا 750 ۇمىتكەر قاتىسىپ، سولاردىڭ ىشىنەن زۇلحيا مۇقان قىزى ۇزدىك شىعىپ، قازاق تەلەۆيزياسىنىڭ العاشقى كاسىبي ديكتورلارىنىڭ ءبىرى اتاندى.

سول جىلدىڭ 8-ناۋرىزىندا ول تاريحتا قالاتىن ساتكە كۋا بولدى. نەللي وماروۆامەن بىرگە قازاق تەلەۆيزياسىنىڭ العاشقى ەفيرىن اشتى: نەللي وماروۆا ورىس تىلىندەگى حاباردى، ال زۇلحيا مۇقان قىزى قازاق تىلىندەگى العاشقى تەلەۆيزيالىق حاباردى «كەش جارىق!» دەپ باستادى.

1958- 1970 -جىلدارى قازاق تەلەۆيزياسىندا قىزمەت اتقارىپ، جاڭالىقتار مەن ءتۇرلى باعدارلامالاردى جۇرگىزدى. ول تەك ديكتور عانا ەمەس، اقىن ءارى اۋدارماشى بولدى. تەلەۆيزيادا جۇمىس ىستەپ جۇرگەن كەزىندە ۇلى جازۋشى مۇحتار اۋەزوۆتەن سۇحبات العان.

زۇلحيا مۇقان قىزى قازاق تىلىندەگى ديكتورلىق ونەردىڭ قالىپتاسۋىنا، ۇلتتىق تەلەحابار تاراتۋ ءىسىنىڭ دامۋىنا ەلەۋلى ۇلەس قوستى. سول سەبەپتى ارىپتەستەرى مەن شاكىرتتەرى ونى قۇرمەتپەن «قازاق ديكتورلارىنىڭ اناسى» دەپ اتادى.

وتاندىق جۋرناليستيكا مەن تەلەۆيزياعا سىڭىرگەن ەڭبەگى ءۇشىن 2026 -جىلعى 28 -ماۋسىمدا مەملەكەت باسشىسى قاسىم-جومارت توقايەۆ ونى «قۇرمەت» وردەنىمەن ماراپاتتادى.

Зұлқия Жұматова
Фото: 24.kz

 قازاقستان رەسپۋبليكاسى مادەنيەت جانە اقپارات مينيسترلىگى مارقۇمنىڭ وتباسى مەن تۋعان-تۋىستارىنا، جاقىندارى مەن ارىپتەستەرىنە قايعىرا كوڭىل ايتتى. مارقۇممەن قوشتاسۋ ءراسىمى 15-قاراشا كۇنى ساعات 11:00-دە ءوتتى. زۇلحيا مۇقان قىزىنىڭ ەسىمى قازاق تەلەۆيزياسىنىڭ تاريحىندا ماڭگى قالادى. مارقۇمنىڭ يمانى سالامات، جانى ءجانناتتا بولسىن. وتباسى مەن جاقىندارىنا قايعىرا كوڭىل ايتامىز.