«قازاق مىستىڭ» سيرەك مەتالداردى «كەن» رەتىندە سىرتقا شىعارىپ جاتقانى راس پا - دەپۋتات ساۋالى

استانا. KAZINFORM - ءماجىلىس دەپۋتاتى ازات پەرۋاشيەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي مەن قۇرىلىس جانە ونەركاسىپ ءمينيسترى ەرسايىن ناعاسبايەۆقا «قازاق مىستىڭ» سىرتقا شىعاراتىن مينەرالدى شيكىزاتى تۋرالى ساۋال جولدادى.

- قازاقستان سەري، لانتان، ليتي سياقتى ونەركاسىپتىڭ جوعارى تەحنولوگيالى سالالارىندا ستراتەگيالىق ماڭىزعا يە سيرەك مەتالداردىڭ ايتارلىقتاي قورىنا يەلىك ەتىپ وتىر. عالام ەكونوميكاسىندا سيرەك كەزدەسەتىن مەتالدار «جاڭا مۇنايعا» اينالىپ بارادى. ونىڭ قورى الەمدەگى كۇشتەردىڭ تەڭگەرىمىنە تىكەلەي اسەر ەتە باستادى. بۇل رەسۋرستاردىڭ باقىلاۋعا الۋ كۇرەسى ۋشىعىپ كەلە جاتقانىن كورىپ وتىرمىز. سيرەك مەتالداردى تۇتىنۋدىڭ كولەمى الەم بويىنشا جىل سايىن ءوسىپ وتىر. كەيبىر ساراپتامالىق بولجامدارعا قاراساق، سۇرانىس الداعى جاقىن جىلدارى 40 ەسەگە دەيىن ءوسۋى مۇمكىن. 2030 -جىلعا قاراي بۇل نارىقتىڭ كولەمى جىلىنا 10 ميلليارد دوللارعا جەتەتىنى تۋرالى بولجامدار بار، - دەپ باستادى ول.

دەپۋتات الەۋمەتتىك جەلى مەن ب ا ق- تا «قازاق مىس» كورپوراتسياسىنىڭ وسى سالاداعى زاڭسىز ارەكەتتەرى تۋرالى اقپارات تاراپ جاتقانىن اتاپ ءوتتى.

- اقپان ايىندا الەۋمەتتىك «قازاق مىس» كورپوراتسياسىنىڭ بۇرىنعى زەرتحاناشىسى تۋرالى اقپارات شىقتى. ايتۋىنشا، كورپوراتسيا توننا-توننا مىس كونسەنتراتى مەن كەندى حيميالىق تالداۋ جۇرگىزبەستەن، قۇرامىنداعى باعالى جانە سيرەك مەتالداردى جاسىرا وتىرىپ سىرتقا شىعارىپ جاتىر. ماماننىڭ پىكىرىنشە، وسى ارقىلى كومپانيا سىرتقا شىعارىلىپ جاتقان رەسۋرستاردىڭ باعاسىن قولدان تومەندەتىپ، وليگارحتاردىڭ پايداسى ءۇشىن ەل ەكونوميكاسىنا شىعىن كەلتىرىپ جاتىر. تاعى ءبىر سۇحباتتا گەولوگيا سالاسىنىڭ ساراپشىسى تاۋ-كەن الپاۋىتى ونداعان جىلدار بويى كەن مەن كونسەنتراتتىڭ تالداۋىن جۇرگىزبەستەن، شەتەلدەگى وندىرىسكە سيرەك مەتالدىڭ شيكىزاتىن شىعارىپ كەلگەن. اتالعان ماتەريالداردىڭ سىلتەمەسىن دەپۋتاتتىق ساۋالمەن بىرگە جولدايمىز، - دەدى ازات پەرۋاشيەۆ.

وسىعان بايلانىستى دەپۋتات سالا باسشىلارىنا بىرنەشە ۇسىنىس ايتتى.

- پايدالى قازبا وندىرەتىن كومپانيالاردىڭ سىرتقا شىعارىپ جۇرگەن كەنى مەن كونسەنتراتتارى حيميالىق تالداۋسىز كەتىپ جاتقانى تۋرالى مالىمەتتى نە راستاڭىزدار، نە تەرىس ەكەنىن ايتىڭىزدار. ەگەر اقپارات جالعان بولسا، كومپانيا مەن تۇتاس سالانىڭ رەپۋتاتسياسىنا زيان كەلتىرگەن جالعان اقپارات ءۇشىن سوتقا بەرىڭىزدەر. ال بۇل مالىمەتتەر راس بولسا، سىبايلاس جەمقورلىققا قارسى تەكسەرۋ جۇرگىزىپ، كىنالىلەردى انىقتاپ، كەلگەن شىعىندى قايتارۋعا كۇش سالىڭىزدار. مينەرالدى شيكىزاتتىڭ ەكسپورتىنا كەدەندىك باقىلاۋدى قاتاڭداتىپ، كەدەن بەكەتتەرىن سيرەك مەتالداردى انىقتايتىن ارنايى قوندىرعىلارمەن جابدىقتاۋدى ۇسىنامىز، - دەدى ازات پەرۋاشايەۆ.

بۇعان دەيىن Kazinform الەمدە سيرەك مەتالدارعا نەگە سۇرانىس ارتقانىن جازعان ەدى.

اۆتور

ەسىمجان ناقتىباي