قازاق ۇلتتىق ۋنيۆەرسيتەتىن «پاكتىك تىزىمىندەگى» ستۋدەنت قىزداردىڭ اتا-اناسى جاۋاپقا تارتپاق

استانا. KAZINFORM - داۋى ءورشىپ تۇرعان «پاكتىك تىزىمىندەگى» ستۋدەنت قىزداردىڭ اتا-انالارى قازاق ۇلتتىق ۋنيۆەرسيتەتىن جاۋاپقا تارتپاق. بۇل تۋرالى DALA INSIDE سايتى جازدى.

ادۆوكاتتارعا العاشقى سۇراۋ ءتۇستى دەيدى، DALA INSIDE دەرەككوزى. قازىر اركىمنەن جەكە شاعىم ەمەس، بىرىككەن ارىز ماسەلەسى شەشىلىپ جاتىر.

«ادۆوكاتتار بىرىككەن ارىزدىڭ ءتيىمدى بولاتىنىن ايتقان. ارىزدانۋشىلار ءمورالدى كومپەنساتسيا كولەمى تۋرالى ورتاق شەشىمگە كەلۋى ءتيىس. ودان كەيىن ارىز سوتقا جىبەرىلەتىن بولادى» - دەلىنگەن حابارلامادا.

ءدال وسى كەزدە جوعارعى ءبىلىم مينيسترلىگى دە قازۇۋ رەكتورىن اۋىستىرۋ ماسەلەسىن ويلاستىرا باستادى. 2019 -جىلدان بەرى ۇلتتىق ستاتۋسى بار ۋنيۆەرسيتەت رەكتورلارىن پرەزيدەنت ەمەس، مينيسترلىك اشىق كونكۋرس ارقىلى سايلاي الادى. سوندىقتان رەكتور جانسەيىت تۇيمەبايەۆ ماسەلەسى مينيستر ساياسات نۇربەكتىڭ قولىندا بولىپ تۇر.

رەكتور تۋرالى سۇراق كۇن تارتىبىنە بەكەر قويىلىپ وتىرعان جوق. ءال-فارابي اتىنداعى قازاق ۇلتتىق ۋنيۆەرسيتەتى سوڭعى ەكى جىلدا ءتۇرلى جانجالداردان كوز اشپاي كەلەدى. ءبىراز جانجالدى رەكتور تۇيمەبايەۆتىڭ ءوزى تۋعىزدى.

«مىسالى، 2023-جىلدىڭ كۇزىندە قازۇۋ «ەسكى قازاقستانداعى» ادەتىنە باسىپ، جۋرناليستيكا فاكۋلتەتىنىڭ بوس اۋديتورياسىنا كەمەل توقايەۆتىڭ اتىن بەرگىزەدى. ول ۋنيۆەرسيتەتتىڭ ءوز باستاماسى بولعان. الايدا، شاراعا كەلگەن تاۋەلسىز ب ا ق - «ازاتتىق راديوسى» الدىندا رەكتور تۇيمەبايەۆ ۇستامسىزدىق تانىتىپ، ول ارەكەتى يۋتۋبتا كەڭ تارالادى. ارتىنان جۋرناليستيكا فاكۋلتەتىنىڭ دەكاناتى «ازاتتىق راديوسىنا» پىكىر بەرگەنى ءۇشىن ءدارىس وقىپ جۇرگەن جاس مۇعالىم داستان قاستايدى قۋدالاي باستايدى. ناقتىراق ايتساق، دەكاناتتاعى حاتشى قىز داستان قاستايعا پاپكاداعى دەلوسىن اكەلىپ بەرىپ، «ءسىز وتپەي قالدىڭىز، ەندى ساباققا كەلمەڭىز» دەگەن. الايدا داستان قاستايدىڭ وسى ماسەلەگە قاتىستى فەيسبۋكتاعى جازباسى ۇلكەن رەزونانس تۋدىرىپ، ىسكە جوعارعى ءبىلىم ءمينيسترى ساياسات نۇربەك ارالاستى. ودان كەيىن جۋرناليستيكا فاكۋلتەتىندەگى دەكاننىڭ مىندەتىن اتقارۋشى جۇمىستان كەتتى» - دەپ جازىلعان اتالعان دەرەككوزدە.

قازۇۋ قازىرگى كۇيىندە ەسكى اۆتوريتارلى- كونسەرۆاتورلىق، بيۋروكراتيالىق مەحانيزمنىڭ جيىنتىق وبرازىنا ۇقسايدى. ۋنيۆەرسيتەتتىڭ ىشكى بيزنەس-پروتسەستەرى اۋىر جانە كۇردەلى بولعاندىقتان، وقۋ ورنىنا سەرپىندى دامۋ وتە قيىن. جاڭا رەكتور جاڭا ەنەرگيا الىپ كەلە الا ما؟ ونى تەك ۋاقىت كورسەتەدى.

اۆتور

باقىتگۇل اباي قىزى