قازاق جىلقى شارۋاشىلىعى ينستيتۋتى اشىلدى
استانا. قازاقپارات- پرەزيدەنت قاسىم-جومارت توقايەۆتىڭ اگروفورۋمدا قويعان تاپسىرماسىنا سايكەس، اقتوبە وبلىسىندا قازاق جىلقى شارۋاشىلىعى جانە جەم-ءشوپ ءوندىرۋ عىلىمي-زەرتتەۋ ينستيتۋتى اشىلدى.
بۇل ورتالىق تۇلپارلاردى اسىلداندىرۋمەن جانە جىلقىنىڭ ەت-ءسۇت ونىمدىلىگىن ارتتىرۋمەن اينالىسادى. ەلىمىزدە 4 ميلليون 200 مىڭ جىلقى بار. الايدا اسىل تۇقىمدىلاردىڭ سانى 1 پايىزعا جەتەر-جەتپەس. وسىعان بايلانىستى وتكەن اپتادا مەملەكەت باسشىسى قاسىم-جومارت توقايەۆ اۋىل شارۋاشىلىعى ەڭبەككەرلەرىنىڭ ءبىرىنشى فورۋمىندا جوعارىدا اتالعان ماسەلەگە باسا ءمان بەرگەن ەدى.
قاسىم-جومارت توقايەۆ، قازاقستان رەسپۋبليكاسىنىڭ پرەزيدەنتى - بيىل قازاق جىلقىسىنىڭ تۇقىمىن ساقتاۋ جانە كوبەيتۋ ءۇشىن ارنايى زاڭ قابىلدادىق. ەندى بۇل باعىتتا تاعى ءبىر ماڭىزدى قادام جاسايمىز. مەن ۇكىمەتكە جىلقى شارۋاشىلىعى ينستيتۋتىن قۇرۋدى تاپسىردىم. بۇعان دەيىن ماڭعىستاۋدىڭ اداي جىلقىسى رەسمي تۇردە بولەك تۇقىم رەتىندە تىركەلگەنىن ايتتىق. قازاق قاناتىنا اينالعان قازانات تالاي بايگەدە توپ جارىپ ءجۇر. قازاقپەن بىرگە جاساپ كەلە جاتقان جابىنىڭ دا ورنى ەرەكشە. وعان مۇعالجار، كوشىم جانە قوستاناي تۇقىمدارى كىرەدى.
بۇگىندە ينستيتۋت الدىندا تۇرعان نەگىزگى ماقسات - الداعى 5 جىل ىشىندە اسىل تۇقىمدى جىلقىلار سانىن 6-7 پايىزعا دەيىن كوبەيتۋ. عىلىمي زەرتتەۋ جۇمىستارىن بىرلەسە جۇرگىزۋ ءۇشىن سالانىڭ بىلىكتى ماماندارى ەندى اقتوبەدە باس قوسىپ تۇرادى. وسىعان بايلانىستى اۋىل شارۋاشىلىعى مينيسترلىگى قازىر قارجى كوزدەرىن ناقتىلاپ جاتىر.
