قازاق حالىق اندەرىنىڭ تاڭدامالى جيناعى - 4: عايني - جانىمسىڭ
استانا. قازاقپارات- بۇل بەرىلگەن قازاق اندەرىنىڭ انتولوگياسىن (تاڭدامالى جيناق) اندەردىڭ اتى بويىنشا قازىرگى قالىپتاسقان الىپبيلىك رەتپەن توپتاستىرىلىپ وسىعان دەيىن سايتىمىزدا 3 ءبولىمى بەرىلگەن بولاتىن. سول ۇردىسپەن جالعاسىن نازارلارىڭىزعا ۇسىنىپ وتىرمىز.
عايني
ەسىمنەن ەش كەتپەيدى، عايني اتىڭ،
ورتەگەن جۇرەگىمدى پەريزاتىم.
بۇلاقتاي كوگال قۋعان تاۋدان قۇلاپ،
بەرەسىڭ كىمگە ارناپ بال لاززاتىن.
قايىرماسى:
عايني-اۋ، ساۋلەم،
جۇرگەنىم مەنىڭ ءبۇيتىپ سەنىڭ اۋرەڭ.
قاراعىم، وزىڭنەن دە ءسوزىڭ ءتاتتى.
سوزىڭنەن ءوزىڭ ارتىق ءيناباتتى.
قوياننىڭ قولعا تۇسكەن بالاسىنداي،
جاۋتاڭ كوز سەنى قانداي ادام تاپتى.
قايىرماسى.
عايني - عافۋ
دايىم مەنىڭ مىنگەنىم كۇرەڭ دونەن،
توستەن تۇلكى قاشادى سۇمەڭدەگەن.
قايىرماسى:
ەي، اكيگاي، امان بول،
عايني - عافۋ زامان-اي.
ءۇش ۇيىقتاسام ويىمدا بار ما مەنىڭ،
وزدەرىڭنەن ايىرىلىپ جۇرەم دەگەن.
قايىرماسى.
عاليا
ساقينادان تاڭداپ العان ساڭلاعىم،
توپ ىشىندە دارا تۇرار ارداعىم.
ەسكە تۇسسەڭ، سەنى ويلاسام، عاليا-اۋ،
قوزعالادى جان دۇنيەم، زارلارىم. (2 رەت)
تۇسىنبەدىڭ، بالالىقپەن ۇقپادىڭ،
جۇرەگىمنىڭ جالعىز سەن دەپ سوققانىن.
سەزىم ەدى ماحابباتقا بولەنگەن،
كۇندە ورتەيدى سەنەن قالعان وت-جالىن. 2 رەت
قالاي عانا جۇرەگىمدى جاندىردىڭ،
نەگە مۇنشا كوڭىلىمدى قالدىردىڭ.
جۇرەگىمنىڭ جالعىز سەن دەپ سوققانىن،
تۇسىنبەدىڭ، بالالىقپەن ۇقپادىڭ. 2 رەت
عاشىق جار
ءاي، ءتىل - بۇلبۇل، اقىل - داريا، كوڭىل - ءدۇلدۇل،
سايراعان ماۋە اعاشتا سەن ءبىر بۇلبۇل.
ساعىنىپ ءشول الىستان ىزدەپ كەلدىم،
قالقاشىم، جالىندىرماي ەندى ءوزىڭ ءبىل، اح-ۋاي.
عاشىعىم
داريعا، دۇنيەگە نەگە كەلدىم،
كەلدىم دە ءبىر جەمتىكتىڭ سوڭىنا ەردىم.
سەنە الماي، سەندىم دەۋگە دوس تابا الماي،
ەكەنىن ءومىر فاني ەندى ءبىلدىم.
قايىرماسى:
عاشىعىم، اسىلىم،
قايعىڭمەن-اي، جاسىدىم.
عاشىقپىن-اي، تاقات-سابىر ەتە الماعان.
مۇراتقا كوپ ءىزدەنىپ جەتە الماعان.
قايىرسا قارا قارعا كوز المايدى،
جىبەكتى جۇن قىلادى تۇتە الماعان.
قايىرماسى.
دايداي-اۋ
قاتقىلعا جول سالادى شۇبىرعان مال،
قۇيرىعى كەر تورى اتتىڭ ون ەكى تال،
اۋىلىنا جان دوسىمنىڭ، ءاي، بارامىن دەپ،
قالمادى كەر تورى اتتا وكپەدەي جال.
جايناعان قارۋ بولات تاستان شىعار،
جۇلقىنعان ەرەن جۇيرىك جاستان شىعار.
اڭداي باس اياعىڭدى، قۇربىلارىم،
دۇشپانىڭ الىستا ەمەس دوستان شىعار.
دايديداۋ
حات جازدىم قالام الىپ سىزگە، ەركەم،
ءجۇزىڭ بار ون ءتورتىنشى ايداي كوركەم.
ەسىمە سەن تۇسكەندە، بەۋ قاراعىم،
قوزعايسىڭ قاتىپ قالعان ءىشتىڭ دەرتىن.
شىنىڭمەن مەنەن، دوستىم، قالعانىڭ با،
موينىڭا ايرىلىسۋدى العانىن با؟
ەكەۋمىز ايرىلماستاي بولىپ ەدىك،
قايتەيىن ۋادەڭنىڭ جالعانىنا.
دەي سالدىم
سەن دە ارماندا، قالقاتاي-ەي، مەن دە ارماندا،
ەكى ارماندا جىلايدى ايرىلعاندا، دەي سالدىم-اي.
كىشكەنتايدان بىرگە وسكەن-ەي قۇربىم ەدىڭ،
نەڭ كەتەدى ارتىڭا قايىرىلعاندا، دەي سالدىم-اي.
قايىرماسى:
ەي، ەكەۋىم-اي
ەكەۋىم-اي
ۇكىلى كەر جۇرمەيدى
جەتەگىمە، دەي سالدىم-اي.
قوش بولعايسىڭ، قالقاتاي-ەي، قوش بولعايسىڭ،
بوز جورعا اتتىڭ تىزگىنىن بوس سالعايسىڭ،
دەي سالدىم-اي.
ۇمىتپاي ءجۇر، قالقاتاي-ەي، ۇمىتپاي ءجۇر،
ەكىنشى رەت كەز بولساڭ، ەسكە العايسىڭ،
دەي سالدىم-اي.
قايىرماسى.
دەي سالدىم-اي
ءباسى قىمبات بازاردا باس كيىمنىڭ،
مال مەن باسى ونبەيدى قاسكۇنەمنىڭ، دەي سالدىم-اي،
ولەڭ داۋىسىن ساعىنىپ جۇرگەنىمدە،
داۋىسى قايدان شىعادى قوس كۇرەڭنىن، دەي سالدىم-اي.
قايىرماسى:
اينالايىن قاراعىم،
اۋىلىڭا بارامىن.
ە-ەي! ەكەۋىڭە،
ۇكىلى كەر بايلادىم جەتەگىڭە، دەي سالدىم-اي.
جاي بۇراڭ بەل، جاۋتاڭ كوز،
جايدى بىلسەڭ، ايتام ءسوز.
ە-ەي! ەكەۋىڭە،
ۇكىلى كەر بايلادىم جەتەگىڭە، دەي سالدىم-اي.
ءدام تاتايىق بۇيىرسا، شاي قايناسا.
ەتى قىزار شىن جۇيرىك ايقايلاسا، دەي سالدىم-اي.
ورالىڭنىڭ بارىندا وينا دا كۇل.
نە بولادى جاس جىگىت قايعى ويلاسا، دەي سالدىم-اي.
قايىرماسى.
دەلدار-اي
قىزدار قىرشىن ەندەشە قىزدار قىرشىن-ەي،
قىزىقتىرىپ ويناعان وينىڭ قۇرسىن-اي.
كۇندىز ايتقان سوزىڭنەن، تۇندە تانىپ-ەي.
سيپالاتىپ قويدىڭ عوي جۇكتىڭ بۇرىشىن-اي.
قايىرماسى:
دۋاي-دۋاي-دۋاي شەك،
تەكە مويىن اك-ماك.
بولىپ دەدىم دەلدار-اي،
دەل-دال قىلعان قىزدار-اي.
دەپ ايتام
ولەڭ دە جوق ءان دە جوق سالماعانعا-ەي،
ارماندامىن اۋلىڭا بارماعانعا، دەپ ايتام.
جاتسام ۇيقىم كەلمەيدى، تۇرسام كۇلكىم-ەي،
ويناپ-كۇلىپ مەيىرىم قانباعانعا، دەپ ايتام.
قايىرماسى:
جۇگىرىپ شىقتىم بەلەڭگە،
سەن بولماساڭ كەلەم بە؟
ادەيى ىزدەپ مەن كەلدىم،
توي بوپ جاتىر دەگەنگە.
قوش بولعايسىڭ، قۇربىجان، قوش بولعايسىڭ-ەي،
ءوزىم دەگەن قۇربىڭمەن دوس بولعايسىڭ، دەپ ايتام.
ءبىر تاباقتان ءدام تاتقان قۇربىم ەدىڭ-ەي،
سالەم جولداپ بىزدەردى ەسكە العايسىڭ، دەپ ايتام.
قايىرماسى.
دۇنيە
دۇنيە دۇنيەدەن دۇنيە جالعان-ەي،
كۇلمەگەن ويناماعان قاپىل قالعان ءاي-ۋگاي.
كۇل دە وينا، گۇل-گۇل جاينا، وسىندايدا-ەي،
قىزىعى دۇنيەنىڭ انگە سالعان ءاي-ۋگاي.
دۇنيە قۋدىم سەنى بالا جاستان-ەي،
ءومىردىڭ از-كوبىنە قاراماستان ءاي-ۋگاي.
كۇل دە وينا، گۇل-گۇل جاينا، وسىندايدا-ەي،
بۇل دۇنيە ءالى-اق وتەر عازيز باستان ءاي-ۋگاي.
ءدىلداش-اي
مەكەنى ءبىزدىڭ ەلدىڭ قارا تەرەك،
ولەڭگە ون جاسىمنان بولدىم زەرەك.
قايلىلى ءلايلىم،
ءدىلداش-اي
كوپشىلىك قۇرمەتىنە ءان سالايىن،
مۇندايدا بوسقا وتىرىپ نەگە كەرەك.
قايلىلى-ءلايلىم،
ءدىلداش-اي
اسپاندا ۇركەر التاۋ، شولپان جالعىز.
دومبىرا ەكى ىشەكتى قولعا العانبىز.
قايلىلى-ءلايلىم
ءدىلداش-اي.
مۇندايدا بوسقا وتىرىپ جارامايدى،
كوپشىلىك قۇرمەتىنە ءان سالعانبىز.
قايلىلى-ءلايلىم
ءدىلداش-اي
ەدىل بويى
ءار جاعىندا ەدىلدىڭ ءبىر تەرەڭ ساي، القاراي كوك!
سۇيرەتكەن جىبەك ارقان تەلقوڭىر تاي.
جەڭەشاي-اي، وسىلاي ءانىم وزگەشە-اي!
اعاشتىڭ بۇتاعىنا قونىپ الىپ، القاراي كوك!
سايرايدى تاڭ الدىندا بوزشا تورعاي.
جەڭەشاي-اي، وسىلاي ءانىم وزگەشە-اي!
قايىرماسى:
القاراي كوك جاز جايلاپ،
سالى ورامال ءبىر بايلاپ.
ساعىنىپ ساۋلەم كەلگەندە،
قايدا كەتتىڭ ا-اي، توي-تويلاپ.
ار جاعىندا ەدىلدىڭ ءبىر اسقان بەل، القاراي كوك!
سىرىن اشقان كوڭىلدىڭ كوك سامال جەل.
جەڭەشاي-اي، وسىلاي ءانىم وزگەشە-اي!
ىراس، ايداي، كوڭىلىڭ مەندە بولسا، القاراي كوك!
اۋزىڭدى اشىپ، قالقاتاي، ءتىلىڭدى بەر.
جەڭەشاي-اي، وسىلاي ءانىم وزگەشە-اي!
قايىرماسى.
ەي اينا-اۋ
جانعان وتتاي جالتىلداپ ەكى كوزىڭ،
ءالى ەسىمنەن كەتپەيدى،
ەي اينا-اۋ، ايتقان ءسوزىڭ-اي.
قايتىپ ايتسام ءوزىڭدى كەلىسەدى،
جارالعان ءساتتى كۇنى
ەي، اينا-اۋ، جانسىڭ ءوزىڭ-اي.
ەي، اينام
مۇمكىن ەمەس ەل-جۇرتقا تۇگەل جاقپاق،
باي، كەدەيدىڭ كوڭىلىن، ەي، اينام،
بىردەي تاپپاك، ءاي ۋاي.
قارا قىلدى قاق جارىپ وتىرساڭ دا،
بىرەۋ ماقتاپ جاتادى، ەي، اينام
بىرەۋ داتتاپ، ءاي ۋاي.
كەي اعايىن كورىنەر كوزگە ءتاۋىر،
شىم تولى وكپە ەمەس، ەي، اينام
وڭكەي باۋىر، ءاي ۋاي.
دالدەپ سالعان جاۋىڭنىڭ قانجارىنان،
ساۋساعىمەن دوسىڭنىڭ، ەي اينام
شەرتكەنى اۋىر، ءاي ۋاي.
ەي، اقمارال
باسىلماس قارتايعانشا-ەي جاستىق سەرپىن،
جاسىمنان ەركەلەدىم ەمىن ەركىن.
قايىرماسى:
ەي، اق مارال،
سۇلۋ بيكەش،
جان ساۋلەم.
كەلمەيدى تۇرسام كۇلكىم-ەي، جاتسام ۇيقىم،
سىڭىرمەس ىشكەن استى سەنىڭ دەرتىڭ.
قايىرماسى.
بۇلبۇلدىڭ داۋسى جاقسى-ەي سايراعاندا،
تارانتاس قوزعالادى مايلاعاندا.
قايىرماسى.
وتپەيدى ىشسەم اسىم-ەي تاماعىمنان،
قالقاتاي نە بولار دەپ ويلاعاندا.
قايىرماسى.
ەي-اۋ
(1- ءتۇرى)
ءان دەگەندە جاسىمنان اتتاي جەلەم-اي،
ار جاعىمنان ءان سالسام ەي-اۋ كەلەدى ولەڭ-اۋ.
اتا-بابام جاسىنان ولەڭ قۋعان-اي،
مەن سوندىقتان ولەڭگە ەي-اۋ، كوڭىل بولەم-اۋ.
اكە-شەشەم ولەڭگە بولدى قۇمار-اي،
كەي بىرەۋلەر بولادى-ەي-اۋ، انمەن سىڭار-اۋ.
ءان دەگەندە جالىقپاي ايتۋشى ەدى-اي،
ءان اتاسى بولعاندا ەي-اۋ ءوزى شىنار-اۋ.
ەي-اۋ
(2- ءتۇرى)
كوك الا ۇيرەك ۇشادى، ەي-اۋ، كول دەگەندە،
سىرنە تاتىر سىلەكەي شولدەگەندە-اۋ.
باعالاسام باعاڭا، ەي-اۋ، جان جەتپەيدى،
ۇشار قانات مەندە جوق سەن دەگەندە-اۋ.
ءبىر قامشى بار قولىمدا، ەي-اۋ، التىنداعان،
ۇستاي الماي كەي جامان قالتىلداعان-اۋ.
جاي بىلەتىن جاعدايدى، ەي-اۋ، ءبىر بالاسىڭ،
جاۋاپ بەرشى جاعدايلاپ سالتىڭمەنەن-اۋ.
ءىسىڭ تۇسسە جامانعا، ەي-اۋ، جالتارادى،
ءبىر جاقسىلىق باسىنان ارتىلماعان-اۋ.
جاقسى ادامنىڭ مىنەزى، ەي-اۋ، ءسوزدى ورادى،
بالعاسىنداي ۇستانىڭ شارتىلداعان-اۋ.
ەي، احاۋ
(1- ءتۇرى)
كەلەدى جوعارىدان-اي، وي-وۋ، تايدى مىنگەن-اي.
جۇرمەيدى جوتا جولمەن ، ەي، احاۋ، سايدى بىلگەن-اي.
وزىڭە تۇسىنەر دەپ-اي، وي-وۋ، ايتامىن-اي-اۋ،
بالاسى تەكتى اۋىلدىڭ، ەي، احاۋ، جايدى بىلگەن-اي.
ۇستادىم جيرەنىمدى-اي، وي-وۋ، جيرەنىمدى-اي،
كوردىڭ بە سۇلۋ جيرەن، ەي احاۋ، مىنگەنىمدى-اي.
قالقاتاي، اۋىر بولسا، وي-وۋ، ويىڭا الما-اي،
مەن ايتامىن كوڭىلدەگى، ەي، احاۋ، تۇيگەنىمدى-اي.
ەي احاۋ
(2- ءتۇرى)
ەي، احاۋ،
ات جەتىم، ورەن جۇيرىك شابىلماسا،
توپ كورىپ، اشتى تەرى ارىلماسا.
قايىرماسى:
قاۋ-لىلىلايىم،
قاي- لىلىلايىم-اي
ەي، احاۋ،
بولادى تەڭدەسى جوق كارى جەتىم،
باس تارتار كىرەرگە ءۇي تابىلماسا.
قايىرماسى.
ەي، احاۋ،
كول جەتىم داريا شالقار، ەل قونباعان،
شەتىنەن مىڭ جىلقى اكەپ سۋارماعان.
قايىرماسى.
ەي، احاۋ،
قۇس جەتىم قوپانداعى، قورىستاعى،
سالاتىن ساياتشىسى تابىلماعان.
قايىرماسى.
ەي احاۋ
(3- ءتۇرى)
جىلقىمدى ايداپ سالدىم ءشيلى وزەككە،
جىعىلدىم اتىم تايىپ قۋ تەزەككە-اي.
بارىندا تىرشىلىكتىڭ كۇلىپ، وينا.
قالايىق ويناپ-كۇلىپ ءبىر كەزەككە-اي.
ەي-احاۋ، احاۋ بيكەش،
قوزى كورپەش،
سالا ءجۇر وسى انىمە،
ەرتەندى-كەش-اي.
ەي، احاۋ
(4- ءتۇرى)
قىس ءوتىپ، كوكتەم كەلسە، ەي، جاز بولادى،
كەيبىرەۋ كۇنى وتكەنگە، ءاي، احاۋ، ءماز بولادى-اۋ،
ومىردە جاسىڭ جۇزگە، ەي، جەتسە داعى،
ءبارى ءبىر اجال كەلسە، ەي، از بولادى-اۋ.
جەرگە ەگىن شىقپايدى ءوزى، ءاي، ەكپەسەڭىز،
كەلمەيدى ارمان ءوزى، ەي، احاۋ، كەتپەسەڭىز-اۋ.
كونبەيتىن دۇرىس ىسكە، ەي، ادام بولماس،
ابايلاپ اقىلمەنەن، ەي، احاۋ، ەپتەسەڭىز-اۋ.
ەي، اياۋلىم-اي
بۇل جالعان-اۋ وپا قىلماس پەندەسىنە.
جاقسى اتتىڭ جان تاڭ قالار جەم جەسىنە، ەي، اياۋلىم-اي.
بۇرىنعى-اۋ وتكەندەردەن قالعان مۇرا
ەركەلەر جاقسى قايىن جەڭگەسىنە، ەي، اياۋلىم-اي.
كەتەيىن-اۋ جاسىم جەتىپ قالعاننان سوڭ،
كارى ولەڭ تۇسپەي وتىر ەندى ەسىمە، ەي اياۋلىم-اي.
پىرادار-اي، ەسىڭ بولسا ەسكەر مۇنى،
اركىم-اق نازىن ايتار تەڭدەسىنە، ەي، اياۋلىم-اي.
ەي، ءالالىم-اي
بولعاندا، ءاي، جازعىتۇرىم قار كەتەدى،
باقپاسا، قاراماسا مال كەتەدى.
ەي، ءالالىم-اي.
وزىڭە، ءاي، تەڭ قۇربى دەپ ايتتىم ءبىر ءسوز،
ءسوزىمدى قوستاي سالساڭ نەڭ كەتەدى؟
ەي، ءالالىم-اي.
جايلاۋدان، اي، جۇعىمى جوق ەل كەتەدى،
بىلمەگەن اتتىڭ بابىن تەرلەتەدى.
ەي، ءالالىم-اي.
ءوزىڭدى، ءاي، قۇربىلاس دەپ سالدىم قولقا،
كوڭىلىمدى اۋلاي سالساڭ نەڭ كەتەدى؟
ەي، ءالالىم-اي.
ەي، يگاي
ەي، يگاي!
باق قايدا تويدا ولەڭ باستاعانداي،
جاستىقتى ۇرماي-سوقپاي جاسقاعانداي
ءاي، ءۋاي.
جاقسىنىڭ ءوزى ولسە دە، ءسوزى ولمەيدى.
ارتىنا التىن ءۇيىپ تاستاعانداي
ءاي، ءۋاي.
ەي، يگاي!
ءىشى التىن ولەڭىمنىڭ سىرتى كۇمىس،
جاقسى اتقا بىردەي بىتەر جورعا، جۇرىس،
ءاي، ءۋاي.
ولەڭىم - جاقسىلاردىڭ جان ازىعى
تابامىن ەكى قولعا تاعى ءبىر ءىس.
ءاي، ءۋاي.
ەي، يگاي!
ايتا ءبىل ولەڭىڭدى ورنەكپەنەن،
جاقسىنى ءبىر عانيبەت كورمەك دەگەن.
ءاي، ءۋاي.
قونار باق، ەر جىگىتكە بىتەر داۋلەت
اق ادال، ەلگە ەتكەن ەڭبەكپەنەن،
ءاي، ءۋاي.
ەي، بۇلبۇل-اي
قۇلا كەرمەن اۋلىڭا اياڭدايىن،
جۇرەك سىرىن وزىڭە باياندايىن.
ۇعا الماساڭ جۇرەكتىڭ ءلاززاتىن،
جان ساۋلەم دەپ ايتۋدان ايالدايىن.
قايىرماسى:
ەي بۇلبۇل-اي، بۇلبۇل-اي،
التىننان سىرعا قيما بەل،
ساۋىقشىل سايران ءبىزدىڭ ەل،
ەۋ، ايداي.
كوكالا ۇيرەك ۇشادى اسپانمەنەن،
تاڭ اتا ما مەزگىلسىز ساسقانمەنەن.
كىسى جارى كىسىگە جار بولمايدى،
قانشا ماقتاپ ولەڭگە قوسقانمەنەن.
قايىرماسى.
ەي-ەي، اققۋ
كورىنەدى ال قىزىل-ەي قاشقان تۇلكى،
قايدا قالماس جىگىتتىڭ جيعان مۇلكى.
قايىرماسى:
ەي ەي اققۋ
ەي-ەي اققۋ
ەي ەي-اي
ويدا تۇرىپ بيىككە قول سەرمەيمىن،
كوڭىل شىركىن بولسىن دەپ كوتەرىڭكى.
قايىرماسى.
ا، دەگەندە داۋىسىم ەي شاڭىرقاعان،
ەستىگەن جان ءانىمدى تاڭىرقاعان.
قايىرماسى.
اقىندىقپەن ولەڭدى ەي، مەن ايتپايمىن،
كوتەرەمىن كوڭىلدى جابىرقاعان.
قايىرماسى.
ەي-ەي اۋ
سەن ار جاقتا، قاراعىم-ەي، مەن بەر جاقتا-ەي،
قارا ارعىماق شۇلعيدى.
ەي-اۋ-ەي-ەي-اۋ،
باۋشارباقتا ەي-ەي-اۋ.
قۇنان اتان-ەي قولىمدا ءشۇيىنشىم بار،
جان قالقانىڭ اۋىلى ەي-اۋ-ەي-ەي-اۋ دال قاي جاقتا.
قايىرماسى:
سىزدەر اقىن
بىزدەر جاقىن.
جاڭا زاكون باياۋلا،
ەي-اۋ، ەي-ەي-اۋ،
كەلدىڭ جاقىن، ەي-ەي-اۋ.
ەي-ەي، كوكەم
دايىم مەنىڭ مىنگەنىم قارا كەرىم،
جۇردەك تە ەمەس قارا كەر ءالىم پەرىم-اي.
تىرشىلىكتىڭ بارىندا كۇل دە وينا،
كۇندە دۋمان، كۇندە توي جۇرگەن جەرىم-اي.
قايىرماسى:
ەي-ەي كوكەم،
وتكەن ءىسكە ءوكىنبە
دەگەن ەكەن-اي.
ءدام تاتايىق بۇيىرسا، شاي قايناسا،
بويى قىزار جۇيرىكتىڭ ايعايلاسا-اي.
تىرشىلىكتىڭ بارىندا كۇل دە وينا،
نە بولادى ەر جىگىت قايعى ويلاسا-اي.
قايىرماسى.
ەي، قالقا-اۋ
بايگەگە قوسىپ جۇرگەن-ەي جۇيرىك جيرەن-ەي،
ۇكىلەپ جال-قۇيرىعىن-اي، ەي قالقام، ءوزىم تۇيگەن-اي.
قالىقتاپ ۇلى تويدا-ەي ءان سالعاندا-ەي،
كورە الماي كەتىپ قالار-ەي-ەي، قالقاۋ، ءىشى كۇيگەن-اي.
ەي، قارعاش-اۋ
كەتەمىن ولەڭ دەسە-ەي مەن دە قىزىپ،
جۇرەدى-اي كەيبىر جامان-ەي، قارعاش-اۋ، جيىن بۇزىپ-اي.
بىرەۋدىڭ قۇتتى تويىن-ەي قۇرمەتتەيىك،
تابىلماس كۇندە بىزگە، قارعاش-اۋ، مۇنداي قىزىق-اي
ەي، قۇربىم-اي
العىزبايدى ادامزات الداعانعا-اي،
شىركىن كوڭىل ارماندا بارماعانعا.
ءاي، قۇربىم-اي،
ءسىزدى ويلاي ءجۇردىم-اي.
اتىپ العان قويانداي ارماندامىن-اي.
ويىن-كۇلكىم ءبىر ءجۇرىپ قانباعانعا.
ءاي، قۇربىم-اي،
ويلاي-ويلاي ءجۇردىم-اي.
ەي، قۇربىم
كيگەنىم اياعىما كەبىس ەدى-ەي،
قوس كۇرەڭ جىلقى ىشىندە تەبىسەدى.
ەي، قۇربىم، ەي ساۋلەم.
ولەڭدى بۇدان بۇرىن ايتقامىن جوق،
قۇربىلار نە دەپ ايتسام كەلىسەدى.
ەي، قۇربىم، ەي، ساۋلەم.
ەي لاحاۋ، ءلاريداي
دايىم مەنىڭ مىنگەنىم ەي كوك جال شابدار،
جانۋاردىڭ جەلىسى شاپقانداي بار.
ەي لاحاۋ، ءلاريداي
ءبىر-ەكى اۋىز جاقسىمەن-ەي سويلەسكەنىم،
قۇشاقتاسىپ جامانمەن جاتقانداي بار.
ەي لاحاۋ، ءلاريداي
اي دا باتپان جىگىتكە ەي، كۇن دە باتپان،
شابا المايمىن تولىقسىپ جايداق اتپەن.
ەي لاحاۋ، ءلاريداي
جولداس بولساڭ، جىگىتتەر-ەي، جاقسىمەن بول،
سەكسەۋىلدىڭ شوعىنداي جايناپ جاتقان.
ەي لاحاۋ، ءلاريداي.
ەي، ساۋلەم
شىرقاپ سالسا كەلەدى ءاننىڭ سانى-ەي
سىبىزعىشى، سىرنايشى دومبىراشى-ەي، ساۋلەم-اي،
توي-دۋماندى مەرەكە بولعان جەردە-ەي،
قىز-بوزبالا جيىلىپ ءان شىرقاشى-ەي، ساۋلەم-اي.
ساۋلە بەرىپ تۇندەگى تۋعان ايداي-ەي.
اسىر سالعان ورىستە قۇلىن-تايداي-ەي، ساۋلەم-اي.
ءجۇز قۇبىلتىپ، سىزىلتىپ ءان شىرقاسا-ەي
ساۋلەم ايداي ءان بولماس قوڭىر مايداي-ەي، ساۋلەم-اي.
ەي، توبىلعى-اي
بولعاندا اقىل - داريا، كوڭىل - كولمەك،
تاتا الماي كول داريادان ءجۇرمىز شولدەپ.
قايىرماسى:
ەي، توبىلع(ى)-اي،
اكەل بەرى قولىڭد(ى)-اي!
استىنا قارا جەردىڭ ءبىر تۇسكەن سوڭ،
بەكىنىپ وڭاي ەمەس شىعىپ كەلمەك.
قايىرماسى.
بۇگىندە جۇك ارتامىن قاسقا جورعا،
جاقسى ەكەن اق بىلەگىڭ جاستانارعا.
قايىرماسى.
ولەڭدى ايتۋشى ەدىم ءبىر كىسىدەي،
قارتايىپ ايتا المادىم ءدۇر كىسىدەي.
قايىرماسى.
جاس كۇنىڭ قانداي جاقسى كەلمەيتۇعىن،
قۇناننىڭ قارا جورعا جۇرىسىندەي.
قايىرماسى.
ەي-ەي، شىركىن
ەندەشە ءان باياۋلى-ەي، ءان باياۋلى-ەي،
جىگىتتىڭ جارلى بولار-ەي، شىركىن-اۋ، جانى اياۋلى-ەي.
وتكىزبە ءومىرىڭدى-ەي بوستان بوسقا-ەي.
بارادى ءوتىپ جالعان-ەي، شىركىن-اۋ، كۇن ساناۋلى-اي.
جىگىتكە ولەڭ دە ونەر-ەي، ونەر دە ونەر-ەي،
شىن جۇيرىك ورگە سالسا-ەي، شىركىن-اۋ، ورشەلەنەر-اي.
جىگىتتەر وسىندايدا-ەي تالپىنىپ قال-ەي،
شىراعىڭ جانىپ تۇرعان-ەي، شىركىن-اۋ، بىر كۇن سونەر-اي.
ەكەۋىم-اي
(1 - ءتۇرى)
قولىمدا ءبىر قامشىم بار ورىلمەگەن،
بىرەۋگە ءورىپ بەر دەپ بەرىلمەگەن.
ءجونىڭدى ايتشى، قالقاتاي، تانىسايىق،
قانداي جانسىڭ كوزىمە كورىنبەگەن.
ەكەۋىم-اي
(2- ءتۇرى)
ەندەشە، سىلدىر ۇزبە، سىلدىر ۇزبە، ەكەۋىم-اي،
قاسىڭا ءبىز كەلگەندە ءبىلدىڭىز بە، اي،
تۇسىنا اۋىلىڭنىڭ، اي كەلىپ قالدىق، ەكەۋىم-اي
ەتەسىز قانداي سىيدى ەندى بىزگە، اي (2 رەت)
ەندەشە قۋ ىرعايلى، قۋ ىرعايلى، ەكەۋىم-اي،
قۋ ىرعاي وتقا سالسا، دۋىلدايدى، اي،
مەن ءسىزدى كورگەنىم جوق، اي، ەستۋىم بار، ەكەۋىم-اي،
سىرتىڭنان كورگەن جاندار شۋىلدايدى، اي. (2 رەت)
ەندەشە، قارا اتىمدى، اي قارا اتىمدى، ەكەۋىم-اي،
جيامىن سىزگە قاراي قاناتىمدى، اي.
الاشتى التى بولىس ارالادىم، ەكەۋىم-اي.
تاپپادىم سىزدەن وزگە جاراتىمدى، اي. (2 رەت)
ەكەۋىڭ دە اق سۇڭقار
ايت دەسەڭىز ايتايىن ايداي ون بەس-ەي.
اساۋىنان ۇيرەتكەن تايداي ون بەس، ساۋلەم-اي.
تىرشىلىكتىڭ بارىندا وينا دا كۇل-ەي،
قايتا اينالىپ كەلمەيتىن قايران ون بەس، ساۋلەم-اي.
قايىرماسى:
ءبىرىڭ - قايىڭ، ءبىرىڭ - تال.
ءبىرىڭ - شەكەر، ءبىرىڭ - بال.
قايسىنىڭدى قالايىن،
ەكەۋىڭ دە اق سۇڭقار.
مەن ۇيرەندىم ولەڭدى ون جاسىمنان-ەي،
دەنەم اۋىر تارتادى قورعاسىننان، ساۋلەم-اي.
جەر-سۋ باسپاس تايپالعان جورعا داعى-ەي،
كارتەيگەن سوڭ تانباي ما جورعاسىنان، ساۋلەم-اي.
قايىرماسى.
ەكى-اي كوز
باسىندا-ەي جىرعىلتىنىڭ ءبىر توپ ميا-ەي،
كەلەمىن كەربەستىمەن جىلقى جيا-اۋ.
بولعاندا-ەي كەلۋ وڭاي، كەتۋ قيىن،
قالقاتاي-ەي، كەتە المادىم كوڭىلىن قيا-اۋ.
ەكى-اي كوز، قاسىڭىز،
جايدارى-اي جايما شۋاق مىنەزىڭىز-اي.
ەكى-اي كوك
ەسىك الدى قارا سۋ وتكەلى جوق، ساۋلەم-اۋ،
وتكەلى جوق سۋىڭنان وتكەنىم جوق.
ەكى-اي كوك،
اينالىپ جالعان كەلەر جوق-اي.
ءبىر قۇدايعا شەت بولساڭ، ءوزىڭ شەت بول، ساۋلەم-اۋ،
سەنى تاستاپ ەشقايدا كەتكەنىم جوق.
ەكى-اي كوك،
اينالىپ جالعان كەلەر جوق-اي.
اينالايىن كوزىڭنەن كۇلىمدەگەن، ساۋلەم-اۋ،
باسقان ءىزىڭ ارتىڭنان بىلىنبەگەن.
ەكى-اي كوك،
اينالىپ جالعان كەلەر جوق-اي.
ءۇش ۇيىقتاسام ويىمدا بار ما مەنىڭ، ساۋلەم-اۋ،
سەنەن، ساۋلەم، ايىرىلىپ قالام دەگەن.
ەكى-اي كوك،
اينالىپ جالعان كەلەر جوق-اۋ!
ەكى-اي، قالقام
بارادى اۋلىم كوشىپ ىلايكولگە،
جاراسار ءدۇريا بەشپەنت قىناي بەلگە-اي.
قايىرماسى:
ەكى-اي قالقام،
سىزدەن، قورقام.
قايتەيىن قىلىعىڭدى اتتەڭ، قالقام.
كەتكەندە اۋلىڭ الىس، قۇربىلارىم،
قۇشاقتاپ قۇس جاستىقتى جىلاي كورمە-اي.
قايىرماسى.
ەكى دە بالا زامانداس-اي
كوشكەندە جىلقى ايدايمىن جالباسپەنەن-اي،
بىتەدى ورتان جىلىك جامباسپەنەن-اي.
ەكى دە بالا زامانداس-اي،
ەبىن ءبىر تاۋىپ امانداس-اي.
كوپ كۇننىڭ كورمەگەلى ءجۇزى بولدى-اي.
امان با اۋىل-ايماق، مال-باسپەنەن-اي.
ەكى دە بالا زامانداس-اي،
ايىندا كەلىپ امانداس-اي.
ەلپەتىم-اي
بۇلعىننىڭ تاۋى بيىك، باۋىرى دالا،
بوكتەرى بەدەرلەنگەن سالا-سالا-ەي.
قايىرماسى:
ەلپەتىم ايداي سىرنايداي،
تالابىم توقتاپ تۇرمايدى-اي.
ەگىلگەن ماۋە اعاشى ءار تۇرمەنەن،
ولكەگە ءوڭ بەرەدى جاڭا قالا-ەي.
قايىرماسى.
مەكەندەپ وتىر ەلىم بۇلعىن بويىن،
وسىرگەن مىڭعىرىلتىپ شوپان قويىن-ەي.
قايىرماسى.
بەس تۇلىك مال سالاسى تۇگەل ءوسىپ،
ىستەلدى ىلايىقتى بۇگىن تويىم-ەي.
قايىرماسى.
ەلىم قۇلجادا-اي
قارايعانعا قارايمىن قابان با دەپ-اۋ،
قامشىلايمىن اتىمدى شابام با دەپ، اۋ ۋگاي.
ەلىم قۇلجاد(ا)-اي،
كوڭىلىم ءسىزدى بولجاد(ى)-اي.
ەسىمدە بار، وسكەن جەر، وي مەن قىرىڭ،
كىم ويلاعان قولدا دەپ سەنى بۇرىن، اۋ، ۋگاي.
ەلىم قۇلجاد(ا)-اي،
كوڭىلىم ءسىزدى بولجاد(ى)-اي.
كۇلسەڭ كۇلكى جاراسقان قۇربىلارىم،
ايىڭ ءوتتى ساعىنىپ، مىنە، بۇگىن، اۋ، ۋگاي.
ەلىم قۇلجاد(ا)-اي،
كوڭىلىم ءسىزدى بولجاد(ى)-اي.
ەندى امان بول
التىن ەردى كوتەرىپ اتقا سالدىم ەي،
قازينە دەپ اتىندى حاتقا سالدىم-ەي.
ەندى امان بول-اي.
جاتسام ۇيقىم كەلمەيدى، تۇرسام كۇلكىم-ەي،
ءبىر سەن ءۇشىن جانىمدى وتقا سالدىم-ەي.
ەندى امان بول-اي.
سەن دە ارماندا، قالقاتاي، مەن دە ارماندا-ەي،
ەكى ارماندا جىلايدى ايرىلعاندا-ەي.
ەندى امان بول-اي.
قاراي-قاراي ارتىما موينىم تالدى-ەي،
نەڭ كەتەدى ارتىڭا قايرىلعاندا-ەي.
ەندى امان بول-اي.
ەندى امان بول، جەڭەشە-اي
دايىم مەنىڭ مىنگەنىم ۇزىن قۇلا ات،
ەكى جاعى قوبدانىڭ مالعا سۋات.
ەي ماشينە ماراش-اي.
ەندى امان بول، جەڭەشە-اي.
اۋلىڭ الىس كەتكەندە تۋىستارىم،
وسى انىمە سالا ءجۇر داتكە قۋات.
ەي ماشينە ماراش-اي،
ەندى امان بول، جەڭەشە-اي.
ەركەم
دۇني(ە) وپا بولمايدى پەندەسىنە، احوۋ،
جان تاڭ قالار جاقسى اتتىڭ جەم جەسىنە.
ەركەم، ەركەم، ەركەم!
ايتقانمەنەن جامانعا ءسوز جەتپەيدى، احوۋ،
قۇداي ءوزى سالماسا زەردەسىنە.
ەركەم، ەركەم، ەركەم!
قايىرماسى:
قادىرلەسىم، ەركەم،
قادىرىڭە جەتسەم،
ەركەم، ەركەم.
سۋ اعادى ارىقتان شىر اينالىپ، احوۋ،
ەر جىگىتكە مال بىتەر ءبىر اينالىپ.
ەركەم، ەركەم، ەركەم!
ورالىڭنىڭ بارىندا وينا دا كۇل، احوۋ،
كىم بار، كىم جوق كەلگەنشە جىل اينالىپ.
ەركەم، ەركەم، ەركەم!
قايىرماسى.
ەركەم-اي
(1- ءتۇرى)
ايت دەگەندە ولەڭدى اڭىرمايمىن،
كولدەن ۇشقان اققۋداي مامىرلايمىن.
قايىرماسى:
ەركەم-اي،
بۇگىن بولعان مەرەكەڭ
بولسىن تاعى ەرتەڭ-اي.
قايدا جۇرسەم جاقسىنىڭ جانىندامىن،
ىزدەگەنمەن جامانعا تابىلمايمىن.
قايىرماسى.
انشىلەردىڭ سەرىگى دومبىرا ما،
تارتا بەرسەڭ دومبىرا بولدىرا ما.
قايىرماسى.
دومبىرانى باپپەنەن قولعا الىپ،
شارىقتاتا انگە سال وڭ بۇرا دا.
قايىرماسى:
ەركەم-اي،
بۇگىنگى كۇنىڭ تاماشا،
ەرتەڭ بۇدان كوركەم-اي،
ەركەم-اي،
بۇگىن بولعان تاماشا،
بولسىن تاعى ەرتەڭ-اي.
ەركەم-اي
(2 - ءتۇرى)
ءبىزدىڭ اۋىل اقسايدىڭ قاقپاسىندا، جان ساۋلەم.
كۇمىس جۇگەن جارقىلدار ات باسىندا، ەركەم-اي.
شىنىمەنەن كوڭىلىڭ بولسا بىزدە،
شاپان-ىشىك جامىلىپ جات قاسىمدا، ەركەم-اي.
اي قاراڭعى، كەش جارىق،
ەبىن تاۋىپ كەلسەڭشى-اي.
ىلە دەيمىن، ەندەشە ىلە دەيمىن، جان ساۋلەم،
وتە شىقسام ىلەدەن مىنە دەيمىن، ەركەم-اي.
كىسى جارى كىسىگە جار بولمايدى،
ءوز جارىڭنىڭ تىلەۋىن تىلە دەيمىن، ەركەم-اي.
اي بولماسا، جۇلدىز بار،
ەبىن تاۋىپ كەلسەڭشى-اي.
ەر مالاي
جۇمساپ ءجۇر مالايلىققا ەي، قاجى، مولدا-ەي،
سۋ قۇيىپ وتىن الىپ-ەي جۇرەمىن سوندا-اي.
ايتقانى مولدامىزدىڭ-ەي ءبارى وتىرىك-ەي،
اۋزىڭدا قۇدايى بار-ەي، قۇران قولدا-اي.
ايىما سەركەش الىپ-ەي ءجۇرمىن جالعا-اي،
بولا ما كۇن تۋاتىن-ەي، ناشارلارعا-اي.
جارقىراپ ءبىر جارىققا ەي، شىعا المادىق-اي،
ناداندىق قاراڭعىلىق-اي، امال بار ما-اي.
ەستەن كەتپەس جيىرما بەس
ەندەشە-اي، جەز باۋىرلىق، جەز باۋىرلىق-اي،
جاز كۇنى-اي كيە المايمىن توندى اۋىرلاپ-اي.
تۇسكەندە-اي ەلىم ەسكە، سەنەر بولساڭ-اي،
جىلايمىن-اۋ جاتا قالىپ جەر باۋىرلاپ-اي.
وي، توبا-اي، شاپانىم بار، شاپانىم بار-اۋ،
ەتەگى-اي ەلۋ ءبىر كەز، كەۋدەسى تار-اي.
بۇرىنعى-اي ءوتىپ كەتكەن جيىرما بەس-اي،
سول جاسقا-اي ءوتىپ كەتكەن بولامىز زار-اي.
ارجاعى-اۋ الماتىنىڭ مويىل تالدى-اي،
جيىلىپ قىز-كەلىنشەك ويىن سالدى-اي.
ويلاساق-اي جيىرما بەس ەستەن كەتپەس-اي،
قايىرىلىپ-اي قارشىعاداي مويىن تالدى-اي.
ەسىل جار
قارا تاۋدىڭ باسىنا قاراي جاتتىم-ەي،
قارا ايدارىم بەلىمە وراي جاتتىم-ەي.
ەسىل جار،
ءبىر كورۋگە بولدىم زار.
اۋلىڭ شالعاي كەتكەندە، قالقاتايىم-ەي،
جولاۋشىدان جول توسىپ سۇراي جاتتىم-ەي.
ەسىل جار،
ءبىر كورۋگە بولدىم زار.
ەۋ-ايداي
(1-ءتۇرى)
كوشىپ اۋلىم بارادى قاۋدان كولگە، ەۋ ايداي،
قاشان كوشىپ جەتەمىز تاۋداعى ەلگە-اي.
قايتا اينالىپ كورگەنشە كىم بار، كىم جوق، ەۋ-ايداي،
قوش ايتايىن قول قىسىپ بۇراڭ بەلگە-اي.
كوشىپ اۋلىم بارادى ىلاي كولگە، ەۋ-ايداي،
كامشات بورىك جاراسار قىناي بەلگە-اي.
ايرىلعانى ەكى ەلدىڭ قوسىلماي ما ەۋ ايداي،
اينالايىن كوزىڭنەن جىلاي كورمە-اي.
ەۋ-ايداي
(2 - ءتۇرى)
جايلاۋشى ەدى ءبىزدىڭ ەل قوبدا بويىن ەي،
بيە بايلاپ شالعىنعا، جاساپ تويىن، ەۋ ايداي.
ساۋىق قۇرىپ بوزبالا، ءان شىرقايدى-ەي،
قىز-كەلىنشەك جينالسا سالىپ ويىن، ەۋ-ايداي.
قايىرماسى:
جۇگىرىپ شىقتىم بەلەڭگە،
سەن بولماساڭ كەلەم بە.
ادەيى ىزدەپ مەن كەلدىم،
توي بوپ جاتىر دەگەنگە.
دايىم مەنىڭ مىنگەنىم قۇلا مويىن ەي،
قىز-بوزبالا سىلايدى تۇلا-بويىن، ەۋ-ايداي.
ساۋىق قۇرىپ سايرانداپ ءان شىرقايدى-ەي.
جىگىت جەلەڭ جيىلىپ سالىپ ويىن، ەۋ-ايداي.
قايىرماسى.
ەۋ-ايداي
(3 - ءتۇرى)
قارا تاۋدىڭ باسىندا قاق تۇرمايدى، ەۋ-ايداي،
جالعىز قۇلان دالادا اتتىرمايدى.
قايىرماسى:
بال قاينات،
شاي قاينات.
اقىرىن جاعىپ،
جاي قاينات.
قيقۋ، ماقپال قىز دا اراز،
قىزدارمەنەن ءبىز دە اراز.
كەلەسىڭ دەپ قىز دا اراز،
كەلەمىز دەپ ءبىز دە اراز.
سونىمەنەن كۇندە اراز،
بولىپ ءجۇرمىز مۇلدە اراز.
التىن-اي، كۇمىس-اي،
ءوزىڭ ءبىل قالقام كۇنىش-اي.
قىزدى اۋىلدىڭ سىرتىنان ءان سالعاندا، ەۋ-ايداي،
قىزى بار ءۇي قىرجىڭداپ جاقتىرمايدى.
قايىرماسى.
ەۋ-ايداي
(4- ءتۇرى)
كەڭ جايلاۋ قانداي جاقسى جايلاعانعا،
بيەنى توپ-توبىمەن، ەۋ ايداي، بايلاعانعا-ياۋ.
كەلمەيدى جاتسام ۇيقىم، تۇرسام كۇلكىم،
ساۋىعىن قازاق حالقىم، ويلاعاندا-ياۋ.
ەۋ-ايداي
(5- ءتۇرى)
قوي ىشىندە سۇيگەنىم-ەي ىسەك-تۇساق،
قويدىڭ ەتى تۋراسا بولادى ۇساق.
ەۋ ايداي، ەكپىندەتىپ، انگە سال.
ارعى اتامىز جاعى جوق ەي ولەڭشى ەكەن،
ءبىز دە ولەڭشى بولايىق سولار قۇساپ.
ەۋ، ايداي، ەكپىندەتىپ انگە سال.
جالعان-اي، ءماجىلىس
ولەڭ باسى، اۋ، ءبىسمىللا، نەمەنە ەدى، وۋ،
قىرعي سالىپ، وۋ، ولتىردىك بودەنەنى، وي،
جالعان-اي، ءماجىلىس،
ايحوي، زامانىم-اي.
ولەڭ دەگەن، وۋ، نەمەنە ورلەگەنگە، وۋ،
اللا ءناسىپ، وۋ، شاشادى ولمەگەنگە، وي،
جالعان-اي، ءماجىلىس،
ايحوي، زامانىم-اي.
جاناي قۇربىم
باتىسايىن باس كىلەم قالادا تۇر، قۇربىم-اي،
توقپاق جالدى تورى ايعىر دالادا تۇر، قۇربىم-اي.
قايىرماسى:
جاناي قۇربىم،
جاناي سىلقىم،
جاناي كەرىم،
جاناي بۇلبۇل،
جاناي جان.
مەن ەسىڭە تۇسكەندە ەي، قاراعىم، قۇربىم-اي.
اق ۇيىڭە سۇيەنىپ قارادا تۇر، قۇربىم-اي،
قايىرماسى.
نۇر ءديدارىڭ قالقاتاي، جاننان ارتىق، قۇربىم-اي،
بولدىم عاشىق سىرتىڭنان مەن قۇمارتىپ، قۇربىم-اي
قايىرماسى.
ءسىز سارى التىن بولعاندا، مەن - بولاتپىن، قۇربىم-اي،
لەبىزىڭمەن الساڭشى-اي مەنى تارتىپ، قۇربىم-اي.
قايىرماسى.
جان ەركەم
اينالايىن كوزىڭنەن كولگىرىم-اي،
تاس بۇلاقتىڭ سۋىنداي ءمولدىرىم-اي،
وي، دۇنيە-اي!
شارشى توپتىڭ ىشىنەن تانداپ العان،
اسقار تاۋداي ايشىقتى بەلگىلىم-اي،
وي، دۇنيە-اي!
قايىرماسى:
اشىق مىنەز، اق ماڭداي،
مەنمەندىك جوق ەشقانداي.
ءسوزىڭ التىن، كۇلكىڭ از،
جايدارى ءجۇز ەركەم-اي.
اۋىلىم كولساي بويىندا،
ەش نارسە جوق ويىمدا.
شىرقاپ انگە سالايىن،
وسىناۋ جاستىڭ تويىڭدا.
كورىنسەڭشى كوزىمە ەگىندەي بوپ، اي،
جاڭا شىققان ەگىننىڭ كوگىندەي بوپ،
وي، دۇنيە-اي!
جاسىل گۇلدەي جايناعان جان ەركەم-اۋ،
اتپەن شارلاپ الىستان كەلگەنىمدە،
وي، دۇنيە-اي
قايىرماسى.
جان ەركە
نە بار دەيسىڭ ولەڭدى سالا بەرمەي-ەي،
كوكىرەگىم كەڭ ساراي - دالا جەردەي.
ا، شىركىن جان ەركە.
تۇرا المايمىن توي دەسە ەلەگىزىپ،
جۇما سايىن بايگە العان قارا كەردەي.
ا، شىركىن جان ەركە.
جان جاناكي
ايت دەگەندە ايتايىن ءانىم ساعان-اۋ،
تۇرىپ ورىن بەرمەيدى تانىماعان-اۋ.
سىيلاسقانداي كىسىنىڭ بالاسى ەدىك-ەي،
ءتاۋىر-ءتاۋىر ولەڭ ايت، جانىم ماعان-اي.
قايىرماسى:
جان جاناكي-اۋ،
ءبىز مىنەكي-اۋ.
ۋادەلى ءسوز قايدا،
قول كانەكي-اۋ.
جانىم-اي
اۋزىندى اشساڭ كورىنەر مارجان ءتىسىڭ، جانىم-اي،
نە دەمەيدى سىرتىڭنان دۇشپان كىسىڭ، جانىم-اي،
جاناي سالعان ءانىم-اي.
دەسە دەسىن سىرتىڭنان دۇشپان كىسىڭ، جانىم-اي،
كورىنبەي مە دوسىڭا قىلعان ءىسىڭ، جانىم-اي،
جاناي سالعان ءانىم-اي.
ارعىماقتان ات جاقسى شابىس بولسا، جانىم-اي،
اعايىننان جات جاقسى تانىس بولسا، جانىم-اي،
جاناي سالعان ءانىم-اي.
دوسىڭ كۇلىپ، دۇشپانىڭ تابالايدى، جانىم-اي،
ءبىر نورسەدەن اياعىڭ شالىس بولسا، جانىم-اي،
جاناي سالعان ءانىم-اي.
جانيا-اۋ
سۇيگەنىم قوي ىشىندە-ەي كوك ەركەك قوي،
بويىندى كوك سەڭگىردەن، جانيا-اۋ، كورسەتىپ قوي، ءياح-ۋاي
كەتكەندە اۋلىڭ الىس ەي، جان قالقاتاي،
جاڭىلتىپ ءوز اتىڭدى، جانيا-اۋ، دوڭگەلەك قوي، ءياح-ۋاي.
جان قالقاتاي
دايىم مەنىڭ مىنگەنىم كوگىلدىرىك، كوگىلدىرىك،
كوك دونەنگە جاراسار ومىلدىرىك-اي.
جەرىڭ شالعاي كەتكەندە قۇربىلاستار، قۇربىلاستار،
وسى انىمە سالا ءجۇر توگىلدىرىپ-اي.
قايىرماسى:
اققۇيرىق شاي،
بوز جورعا تاي،
ەسەن-امان ءجۇرمىسىڭ جان قالقاتاي-اي.
دايىم مەنىڭ مىنگەنىم قۇلا-قاسقا، قۇلا-قاسقا،
تاۋدان سوقپاق سالدىردىم قۇلاماسقا-اي.
اۋىلىڭ الىس كەتكەندە قۇربىلاستار، قۇربىلاستار،
بەت ورامال بەرىپ كەت جىلاماسقا-اي.
قايىرماسى:
اقاۋ دەسەك،
مامىق توسەك
بارا بەرسەك اۋلىڭا
بولادى وسەك-اي.
جانىمسىڭ
ەي، قالقا، سەن قاندايسىڭ مەن دەگەندە،
مەندە جوق ۇشار قانات سەن دەگەندە.
كەتكەندە اۋلىڭ شالعاي، بەۋ قاراعىم،
سىلەكەي سىرنە تاتىر شولدەگەندە.
قايىرماسى:
جانىمسىڭ،
ءلاززاتىمسىڭ اڭساپ جۇرگەن.
استىنا تاڭدايىمنىڭ
بال ساپ جۇرگەن.
باسىنان الاتاۋدىڭ ارشا اپ ءجۇرمىن،
ارشامدى كوتەرە الماي شارشاپ ءجۇرمىن.
كوپ ايدىڭ كورمەگەلى ءجۇزى بولدى،
ساعىنىپ، اق ءجۇزىڭدى اڭساپ ءجۇرمىن.
قايىرماسى:
جانىمسىڭ،
ءلاززاتىمسىڭ اڭساپ جۇرگەن.
استىنا تاڭدايىمنىڭ
بال ساپ جۇرگەن.
