قازاق حالقىنىڭ ءۇمىتىن اقتادى دەپ ويلايمىن - عۇسمان قىرعىزبايەۆتىڭ اكەسى
الماتى. KAZINFORM - Kazinform ءتىلشىسى قازاقستاندىق تاتامي شەبەرى عۇسمان قىرعىزبايەۆتىڭ اكەسى دانيار قىرعىزباي ۇلى پەن اناسى ۇلبالا اپەنتايەۆانىڭ شاڭىراعىندا بولىپ، وليمپيادا جۇلدەگەرىنىڭ اتا-اناسىنىڭ العاشقى ەموتسياسىنىڭ كۋاگەرى بولدى.
- دزيۋدو جارىسىنىڭ ءبىرىنشى كۇنى وتە ءساتتى اياقتالدى. ەلدوس باۋىرىم التىن الىپ كەلدى. ەكىنشى كۇنى عۇسمان بالامىز قولا مەدال الدى. ول دا ءبىر ۇلكەن جەتىستىكتىڭ ءبىرى، قازاق حالقىنىڭ ءۇمىتىن اقتادى دەپ ويلايمىن. الدا قاتىساتىن قالعان سپورتشىلارىمىزعا جەڭىس پەن ساتتىلىك تىلەيمىن، - دەدى عۇسمان قىرعىزبايەۆتىڭ اكەسى دانيار قىرعىزباي ۇلى.
عۇسمان قىرعىزبايەۆتىڭ سىڭارى عۇمار قىرعىزبايەۆ باۋىرى ەكەۋى سپورتقا 5-سىنىپتان قاتىسقانىن اتاپ ءوتتى.
- سىڭارىم ەكەۋىمىز 5-سىنىپتا دزيۋدوعا باردىق. العاشقى جاتتىقتىرۋشىمىز - ەركە وتىزبايەۆ بولدى. ورداباسى اۋدانى، تەمىرلان ەلدىمەكەنىندە 11-سىنىپتى ءبىتىرىپ، 2010 -جىلى تۋريزم جانە سپورت اكادەمياسىنا تۇستىك. 2013 -جىلدان باستاپ ۇلتتىق قۇراما ساپىنا كىردىك. وعان دەيىن قازاقشا كۇرەسپەن اينالىسقانبىز. دزيۋدو وليمپيادالىق سپورت بولعاندىقتان، قاتتى قىزىعىپ، وسى سپورتتا باق سىناپ كورەيىك دەدىك. جالپى سپورتتا سىڭارىڭ بولعانى جاقسى، - دەدى عۇسمان قىرعىزبايەۆتىڭ باۋىرى عۇمار قىرعىزبايەۆ.
اۆتور
دوسبول اتاجان
