قازاق حالقى قوناقجاي قاسيەتىمەن ەرەكشەلەنەدى - يۋري حەگاي

قىزىلوردا. KAZINFORM - قىزىلوردالىق يۋري پاۆلوۆيچ حەگاي قازاق تىلىندە جاقسى سويلەيدى. جەرگىلىكتى ۇلت وكىلدەرىمەن جاقسى قارىم-قاتىناس جاساپ، ءتۇرلى جيىن-تويلاردى بىرگە اتاپ وتەدى. قازاقتىڭ ۇلتتىق تاعامدارىن تۇتىنىپ، سالت- ءداستۇردى جاقسى بىلەدى.

يۋري حەگاي بۇگىندە قىزىلوردا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتىندە اۋرۋحاناىشىلىك ينفەكسيالاردى ەپيدەميولوگيالىق باقىلاۋ ءبولىمىنىڭ باسشىسى قىزمەتىن اتقارادى.

ءوز سالاسى بويىنشا تاجىريبەلى مامان جۇمىسىندا جوعارى جەتىستىكتەرگە جەتىپ كەلەدى. مەكەمەدە ءىس-قاعازدارىن قازاقشا تولتىرادى.

«مەن قازاق حالقىنىڭ ورتاسىندا ءوستىم. اتا-انامىز ۇنەمى كورشى تۇرعان جەرگىلىكتى ۇلت وكىلدەرىمەن باۋىرىنداي ارالاستى. ءبىر-ءبىرىنىڭ ۇيىنە قوناققا شاقىرىپ، قۋانىش پەن قايعىنى ورتاق ءبولىستى. سوندىقتان مەن بالا كەزىمنەن قازاق ءتىلىن مەڭگەرۋگە تىرىستىم. ول ماعان ەشبىر قيىندىق تۋعىزعان جوق. كورشىلەردىڭ بارلىعى قازاق ۇلتىنان ەدى. ءبىر-بىرىمىزبەن قازاق تىلىندە سويلەسەمىز. وسىلايشا ءتىلدى جاقسى مەڭگەرىپ الدىم. جالپى، ءتىل ۇيرەنگەننىڭ ەشبىر ايىبى جوق. قايتا ويتانىمىڭ كەڭەيىپ، ءوزىڭدى جاڭاشا قىرىنان سەزىنۋگە بولادى. ەڭبەك جولىمدا دا قازاق ءتىلىنىڭ كوپ پايداسى ءتيىپ كەلەدى»، - دەيدى ول.

كەيىپكەرىمىز قازاق جازۋشىلارىنىڭ شىعارمالارىن جاقسى بىلەدى.

ولاردىڭ اراسىندا قارىمدى قالامگەر ءىلياس ەسەنبەرليننىڭ شىعارمالارىن ەرەكشە قىزىعۋشىلىقپەن وقىعان.

وزگە دە اقىن-جازۋشىلاردىڭ شىعارمالارىن ءسۇيسىنىپ وقيدى.

«ەسەنبەرليننىڭ قالامىنان تۋعان دۇنيەلەردە قازاق حالقىنىڭ تاريحى كەڭىنەن ءسوز بولادى. قانشاما عاسىرعا سوزىلعان تاريحى جايىندا جان- جاقتى تانىسا الاسىڭ. وسى ورايدا «كوشپەندىلەر» شىعارماسى ماعان ەرەكشە اسەر ەتتى. ءشامشىنىڭ اندەرىنە دەگەن قۇرمەتىم ەرەكشە. قازاق حالقى قاشاندا قوناقجاي داستۇرىمەن ەرەكشەلەنەدى. كەزىنە تاعدىر جازۋىمەن قازاق جەرىنە قادام باسقان قانشاما ۇلت وكىلدەرىن ەشبىر جاتسىنعان جوق. بارلىعىن باۋىرىنا باسىپ، مەيىرىم شۋاعىن توكتى. سوندىقتان ءقازىر ەلىمىزدە ءومىر ءسۇرىپ جاتقان كوپتەگەن ەتنوس وكىلدەرى قازاق حالقىنىڭ وسىنداي مەيىرىمى ءۇشىن ريزاشىلىعىن بىلدىرەدى»، - دەيدى كەيىپكەرىمىز.

ول حالىقتىڭ سانيتاريالىق-ەپيدەميولوگيالىق سالاماتتىلىعى سالاسىندا 40 جىلعا جۋىق ۋاقىت قىزمەت اتقارىپ كەلەدى. بۇل سالادا جەمىستى ەڭبەگىنىڭ ارقاسىندا كوپتەگەن ماراپاتقا يە بولدى.

«كوپتەگەن قازاق اندەرىن جاتقا بىلەمىن. ءىس-شارالارعا، قوعامدىق جۇمىستارعا بەلسەندى قاتىسامىن. قازاق تىلىندە ءان ايتامىن. قازاقتىڭ ۇلتتىق تاعامدارىن ءوزى دايىنداي الامىن. ايەلىم - قازاق، ءبىر ۇل تاربيەلەپ وتىرمىز»، - دەيدى ول.

اۆتور

ءادىلجان ۇمبەتباي