قازاق ۇ ۋ-دىڭ جەرى مەملەكەتكە قاعاز جۇزىندە عانا قايتارىلدى - باقىتجان بازاربەك

استانا. KAZINFORM - ءماجىلىس دەپۋتاتى باقىتجان بازاربەك باس پروكۋرور بەرىك اسىلوۆتىڭ اتىنا گەنەرال نوۆيكوۆتىڭ اتىنداعى داۋلى الما باعى تۋرالى ساۋال جولدادى.

- مەن بۇل سۇراعىمدى زاڭسىز يەمدەلگەن جەردى مەملەكەت قايتارۋ جونىندەگى پرەزيدەنت تاپسىرماسى مەن سوت شەشىمدەرىنىڭ ورىندالماي جاتقانىنا ارنايمىن. «جەر اماناتى» رەسپۋبليكالىق كوميسسياسى وسىنداي پروبلەماعا تاپ كەلىپ وتىر. بۇل ماسەلەنى وسىمەن ەكىنشى رەتى اشىق كوتەرۋگە تۋرالى كەلىپ وتىر. ويتكەنى شەشىلمەي جاتىر، - دەدى دەپۋتات.

ايتۋىنشا، ءال-فارابي اتىنداعى قازاق ۇ ۋ- دىڭ زاڭسىز بەرىلىپ كەتكەن جەرى سوت شەشىمى شىققانىنا قاراماستان ءالى قايتارىلماعان. تەلىم اۋماعىنا سالىنعان كوپقاباتتى بيزنەس ورتالىق ءالى ءسۇرىلىپ تاستالماعان.

- رەميزوۆكاداعى الما باعىنىڭ جاعدايى دا وسىنداي. سوت شەشىمى ورىندالماي جاتىر. الما باعى زاڭ جۇزىندە مەملەكەت مەنشىگىنە قايتارىلعانىمەن، ءىس جۇزىندە جەكە جانە زاڭدى تۇلعالاردىڭ قولىندا قالىپ وتىر. جالعىز الماتى بويىنشا عانا زاڭسىز سالىنعان تۇرعىن ءۇيدى ءسۇرىپ تاستاۋ تۋرالى 86 تالاپتىڭ 59-ىن سوت قاناعاتتاندىرعان. ءبىراق ادىلەت ورگاندارى مەن ورىنداۋ قىزمەتتەرى سوت شەشىمدەرىن سانالى تۇردە ورىنداماي سوزىپ، قولدان كەدەرگىلەر تۋىنداپ وتىر، - دەگەن ماجىلىسمەن باس پروكۋروردان ادىلەت مينيسترلىگى مەن ونەركاسىپ جانە قۇرىلىس مينيسترلىگىنىڭ سوت شەشىمدەرىن قالتقىسىز ورىنداپ، ءسۇرىپ تاستاۋ تۋرالى شەشىم شىعارىلعان قۇرىلىستاردى ۋاقىتىندا بۇزۋىنا ىقپال ەتۋدى سۇرادى.

- بىزگە كوپ جەردى قايتارىپ جاتقاندارىڭىزبەن گەنەرال نوۆيكوۆ سياقتى ءىرى جەر يەلەنۋشىلەردىڭ زاڭسىز جەرىن قايتارا الماي وتىرسىزدار دەگەنگە ساياتىن سىن كوپ ايتىلادى. جۋىقتا عانا الماتى قالاسىنىڭ اۋدانارالىق سوتى قاراساي اۋدانى اكىمىنىڭ قاۋلىسىنىڭ كۇشىن جويۋى تۋرالى قالالىق پروكۋروردىڭ تالابىن قاناعاتتاندىرۋ تۋرالى شەشىم قابىلدادى. ارينە، سوت شەشىمىنەن كەيىن جەر اقىرى مەملەكەت مەنشىگىنە قايتارىلادى. ءبىراق ءبىز جەر قايتارىلعاننان كەيىنگى جاعدايدى ويلاۋىمىز كەرەك، - دەدى ول.

دەپۋتات گەنەرال نوۆيكوۆتان قايتارىلعان جەر باسقا ىقپالدى ادامداردىڭ مەنشىگىنە ءوتىپ كەتە مە دەپ الاڭدايتىن كورىنەدى.

- گەنەرال نوۆيكوۆتىڭ مەنشىگىندە بولعان جەر قايتارىلعاننان كەيىن تۇگەل الاتاۋ مەملەكەتتىك ۇلتتىق تابيعي پاركىنىڭ قۇرامىنا تابيعي قورعالاتىن مەكەمە ستاتۋسىمەن ەنۋى كەرەك. تاعى ءبىر 3-5 نەمەسە 7 جىلدان كەيىن اتالعان تەلىمدەر قايتادان جەرگىلىكتى وليگارحتارعا، قۇرىلىس كومپانيالارىنا ءوتىپ كەتپەۋى كەرەك. ويتكەنى بۇل تەلىمدەر بىرەگەي اۋماقتا جاتىر. ودان كەيىن الما وسىرۋشىلەردىڭ قۇقىعى ساقتالۋ كەرەك. ولار الەۋمەتتىك جەلىدە بۇل شارانىڭ ءبارىن پروكۋراتۋرانىڭ رەيدەرلىك ارەكەتى رەتىندە سيپاتتاپ جاتىر. ەشكىم باۋ- باقشا ەگۋشىلەر مەن الما وسىرۋشىلەردىڭ جەرىن تاركىلەپ جاتقان جوق. تەلىمدەردىڭ قانشالىقتى زاڭدى بەرىلگەنىن عانا تەكسەرىپ، گەنەرال نوۆيكوۆتىڭ جەرىن عانا الىپ جاتىرمىز. ول جەر مەملەكەتكە قايتارىلعاننان كەيىن باۋ- باقشا ەگۋشىلەر مەن الما وسىرۋشىلەردىڭ قۇقىعى قورعالۋى كەرەك. بۇل ماسەلەنى «جەر اماناتى» رەسپۋبليكالىق كوميسسياسىنىڭ اياسىندا ەرەكشە باقىلاۋعا الامىز دەپ ۇمىتتەنەمىن، - دەدى دەپۋتات.

ەسىمجان ناقتىباي

اۆتور