قازاق اتبەگىلەرى دۋبايدا ارابتىڭ سايگۇلىكتەرىن باپتاپ ءجۇر
استانا. KAZINFORM - قازاقتىڭ بايگە اتىن باپتاۋ ونەرى الەمگە ۇلگى. حالقىمىز سەكىلدى جىلقىنى تەكتى جانۋار سانايتىن ارابتار بۇعان ايرىقشا قىزىعۋشىلىق تانىتىپ وتىر. ءتىپتى سول شارۋاعا ابدەن ماشىقتانعان ءبىر توپ اتبەگىمىزدى اتتاي قالاپ الدىرىپ، قىزمەتىنە جۇگىنگەن.

قازىر ونشاقتى وتانداسىمىز دۋبايدا سان الۋان سايگۇلىكتى سىناپ، الامانعا دايىندايدى. بۇل قازاقستاندىق رايىمبەك الپىسوۆ پەن قىرعىزستاندىق نۇرجىگىت قۇتمانالى ۇلىنىڭ ات ۇستىندە ءتۇرلى تريۋك جاساپ، باستى مەملەكەتتىك نىشاندارىمىزدى دارىپتەگەن ءساتى. باۋىرلاس قوس ۇلتتىڭ ۇل- قىزدارى اراب جەرىندە ۇزەڭگى قاعىستىرىپ، قاتار قىزمەت ەتىپ ءجۇر. قولى قالت ەتكەن ۋاقىتتا الەۋمەتتىك جەلىگە وسىنداي كونتەنت تۇسىرەدى.
ال قىزىلجار ءوڭىرىنىڭ تۋماسى گۇلىم اياعانوۆا قازاقتىڭ اتبەگىلىك ونەرىن امىرلىكتە العاش كاسىپ قىلعانداردىڭ ءبىرى. وسى كۇنى سوڭىنان ەرگەن ءبىر توپ وتانداسى بار. ەرگە بەرگىسىز ەڭبەگىنە قاراي اعا باپكەر اتانعان.
گۇلىم اياعانوۆا، اتبەگى:
- مەن اتقا ءمىنۋدى اۋىلدان بىلەمىن. 6 جاستا بولعانمىن العاش مىنگەندە. اۋىلدا جاقسى اتتار بولدى. جۇگەنسىز جۇرەتىنمىن. اعام دا اتقا مىنەتىن. سوعان ىلەسىپ ۇيرەندىم. جانە دۋبايدا وسىمەن اينالىسىپ جۇرگەنىمە 10 جىلداي بولدى.
ءيا بايگە اتىن باپتاۋ قازاققا ءتان قاسيەت. الامانعا قوسار جۇيرىكتى الىستان نەمەسە قۇلىن كەزىنەن تانيدى. سوندىقتان ارابتار اتتاي قالاپ الدىرعان. وعان قوسا شىمكەنتتىك شاباندوزدار نازەركە قاسىمبەك پەن بيبىگۇل بايداروۆا جەرگىلىكتى ورەندەردى ات سپورتىنا باۋليدى. ورايى كەلگەندە 100 شاقىرىمدىق الاماندارعا قاتىسادى.
ايتا كەتەيىك، بىرىككەن اراب امىرلىكتەرى جىل سايىن سايگۇلىكتەردىڭ سان ءتۇرلى سايىسىن وتكىزەدى. ول ءۇشىن دۋبايدا ارنايى اتشابار سالىنعان.
قازىر اتبەگىلەرىمىز دۋبايلىق كاسىپكەر ءالي ءال مارزۋگيدىڭ جاڭا الامان اتتارىن ءدۇبىرلى دوداعا دايىنداۋدى باستادى. بابى شاۋىپ، باعى جانسا ءبىراز جۇلدە ەنشىلەۋى مۇمكىن.
ءالي ءال مارگۋزي، كاسىپكەر، اتشابار يەسى:
- قازاق باپكەرلەرىمەن 10 جىلدان بەرى بىرگە جۇمىس ىستەيمىن. ولار مەنىڭ وتباسىم، جاقىنىمداي بولىپ كەتكەن. مەنىڭ ويىمشا، ءار ۇلتتىڭ ات باپتاۋ ءادىسى بولادى. ءبىر-بىرىنە ۇقساس ەمەس. ماسەلەن، ءسىزدىڭ ەلدەن كەلگەن قىز-جىگىتتەر تىزگىندى جاقسى ۇستايدى. ءارى ۇزاق قاشىقتىققا شىدامدى بولادى.
حالقىمىز اۋەلدەن «ات شاپپايدى، باپ شابادى» دەگەن. ءسويتىپ توقسان اۋىز ءسوزدى توبىقتاي تۇيىندەگەن. كۇنى بۇرىن «ءال ماكتۋم» چەللەندجىندە 12 سايگۇلىك اراسىنان جەتىنشى بولىپ مارە سىزىعىن كەسكەن «قابىرحانعا» قاتىستى دا وسىلاي دەۋگە بولادى. قازاق تۇلپارى سول سىندا جۇلدەگە ءسال جەتپەي قالدى. دەسە دە بۇل ونىڭ كەيىنگى 1 جىلدان بەرگى ءبىرىنشى جارىسى ەدى. حوش. الدا ءالى ايتۋلى الامان كوپ. بۇدان قازاقتىڭ ات باپتاۋ ونەرىنە قىزىعۋشىلىق ارتپاسا، كەمىمەيدى. سوزىمىزگە دۋبايدا قىزمەت ەتىپ جۇرگەن قىز- جىگىتتەر دالەل.
24.kz