قازاق دالاسىندا كەرقۇلاننىڭ العاشقى قۇلىندارى دۇنيەگە كەلدى
استانا. قازاقپارات - قازاقستاندا كەرقۇلاندى (پرجيەۆالسكي جىلقىسىن) تاريحي مەكەنىنە قايتارۋ جوباسى جاڭا كەزەڭگە ءوتتى. 2026 -جىلى رەينترودۋكسيا ورتالىعىندا جويىلىپ كەتۋ قاۋپى تونگەن جابايى جىلقىنىڭ ەكى قۇلىنى دۇنيەگە كەلدى. قازىر ەلدەگى كەرقۇلاننىڭ جالپى سانى 22 باسقا جەتتى.
ال 2029 -جىلعا دەيىن ولاردىڭ سانىن كوبەيتىپ، تۇراقتى پوپۋلياتسيا قالىپتاستىرۋ ءۇشىن ەلگە تاعى جانۋارلار اكەلۋ جوسپارلانىپ وتىر.
جابايى جىلقى قازاقستانعا قايتا ورالدى
كەرقۇلاندى ورتالىق قازاقستان دالاسىنا قايتارۋ جۇمىستارى جانۋارلاردى ەلگە جەتكىزۋدەن بىرنەشە جىل بۇرىن باستالعان. 2023 -جىلعى 24-ساۋىردە استانادا وتكەن قازاقستان- چەحيا بيزنەس- فورۋمى اياسىندا ورمان شارۋاشىلىعى جانە جانۋارلار دۇنيەسى كوميتەتى مەن پراگا حايۋاناتتار باعى اراسىندا سيرەك كەزدەسەتىن جانۋارلاردى قورعاۋ جونىندەگى ىنتىماقتاستىق تۋرالى مەموراندۋمعا قول قويىلدى. قۇجاتتا پرجيەۆالسكي جىلقىسىن ساقتاپ قالۋعا جانە تاريحي مەكەنىنە قايتارۋعا باسىمدىق بەرىلدى.
پرجيەۆالسكيي جىلقىسى 1960 -جىلداردىڭ سوڭىنا قاراي تابيعي ورتادا جويىلىپ كەتتى. سودان بەرى بۇل ءتۇردى ساقتاپ قالۋ جانە قايتا كوبەيتۋ جۇمىستارى نەگىزىنەن ارنايى ورتالىقتار مەن حايۋاناتتار باقتارىندا جۇرگىزىلدى. قازاقستان اۋماعى دا بۇل جانۋاردىڭ تاريحي تارالۋ ايماعىنا كىرگەن. پرجيەۆالسكي جىلقىسى قازىرگى اقتوبە، قوستاناي، قاراعاندى، اقمولا جانە شىعىس قازاقستان وبلىستارىنىڭ اۋماعىن، سونداي- اق ەلىمىزدىڭ ءبىرقاتار وڭتۇستىك-شىعىس وڭىرلەرىن مەكەندەگەن.
قازاقستانعا 22 جىلقى جەتكىزىلدى
پرجيەۆالسكي جىلقىلارىن قازاقستانعا كەزەڭ-كەزەڭىمەن اكەلۋ 2024 -جىلى باستالدى. سول جىلى ەلگە العاشقى جەتى جانۋار جەتكىزىلدى. ونىڭ بىرەۋى - ەركەك، التاۋى - ۇرعاشى جىلقى. 2025 -جىلى قازاقستانعا پراگا حايۋاناتتار باعى مەن ۆەنگرياداعى «حورتوباد» ۇلتتىق پاركىنەن تاعى جەتى جىلقى اكەلىندى. ال 2026 -جىلى «ءالىبي» ورتالىعىنا سەگىز جانۋار جەتكىزىلدى. ونىڭ تورتەۋى پراگا حايۋاناتتار باعىنان، تورتەۋى بەرليندەگى «تيرپارك» جانۋارلار پاركىنەن اكەلىنگەن. وسىلايشا، قازاقستانعا جەتكىزىلگەن پرجيەۆالسكي جىلقىلارىنىڭ سانى 22 باسقا جەتتى. ونىڭ 20-سى شەتەلدەن اكەلىنسە، ەكەۋى قازاقستاندا دۇنيەگە كەلگەن قۇلىندار.
جىلقىلار تابيعي ورتاعا جىبەرىلە باستادى
جوبانىڭ ماڭىزدى كەزەڭدەرىنىڭ ءبىرى - جانۋارلاردى تابيعي ورتاعا بەيىمدەپ، ەركىندىككە جىبەرۋ. 2025 -جىلعى 4-ماۋسىمدا قازاق دالاسىنا كەرقۇلاننىڭ العاشقى توبى تابيعاتقا جىبەرىلدى. ەركىندىككە شىققان التى جانۋاردىڭ اراسىندا زوررو ەسىمدى ايعىر مەن بەس ۇرعاشى جىلقى بولدى. 2026 -جىلعى 25-مامىردا تاعى بەس جىلقى تابيعي ورتاعا جىبەرىلدى. بۇل توپتا گالۆان ەسىمدى ايعىر مەن ءتورت ۇرعاشى جىلقى بار. جانۋارلاردىڭ قوزعالىسىن باقىلاۋ ماقساتىندا ولاردىڭ ەكەۋىنە سپۋتنيكتىك قارعىباۋ تاعىلدى. مۇنداي باقىلاۋ جىلقىلاردىڭ جاڭا مەكەنگە بەيىمدەلۋىن، قوزعالىس باعىتىن جانە تىرشىلىك ەتۋ ەرەكشەلىكتەرىن زەرتتەۋگە مۇمكىندىك بەرەدى. جينالعان دەرەكتەر جانۋارلاردى ودان ءارى تابيعاتقا جىبەرۋ جۇمىستارىن جوسپارلاۋعا دا كومەكتەسەدى.
العاشقى قۇلىندار دۇنيەگە كەلدى
2026 -جىل جوبا ءۇشىن ەرەكشە ناتيجەلەرمەن ەستە قالدى. 22 -تامىزدا رەينترودۋكسيا ورتالىعىندا بەرليندەگى «تيرپارك» جانۋارلار پاركىنەن اكەلىنگەن پرجيەۆالسكي جىلقىسى العاشقى قۇلىنىن دۇنيەگە اكەلدى. ارادا سەگىز كۇن وتكەن سوڭ، 30-تامىزدا ۋمبرا ەسىمدى بيەنىڭ دە قۇلىنى تۋدى. قازاقستاندا وسى ءتۇردىڭ ءتول بەرۋى - ونى ەلىمىزدە قايتا كوبەيتۋ جۇمىستارىنىڭ ماڭىزدى ناتيجەسى. بۇل جانۋارلاردىڭ جاڭا ورتادا ءوسىپ-ونۋىنە جاعداي جاساۋعا باعىتتالعان شارالاردىڭ جالعاسىپ جاتقانىن كورسەتەدى. كەرتاعىنىڭ تابيعي ورتادا تۇراقتى پوپۋلياتسياسىن قالىپتاستىرۋ ءۇشىن جانۋارلاردى كوبەيتۋ عانا ەمەس، ولاردىڭ تىرشىلىك ەتۋىنە قولايلى اۋماقتى ساقتاۋ، بەيىمدەلۋىن باقىلاۋ جانە قاۋىپسىزدىگىن قامتاماسىز ەتۋ دە ماڭىزدى.
40 جىلقى اكەلۋ جوسپارلانعان جوبانىڭ نەگىزگى ماقساتى - پرجيەۆالسكي جىلقىسىن قازاقستاننىڭ دالالىق ەكوجۇيەسىنە قايتا ەنگىزىپ، تابيعي جاعدايدا وزدىگىنەن تىرشىلىك ەتە الاتىن تۇراقتى پوپۋلياتسيا قالىپتاستىرۋ. وسى ماقساتتا 2029 -جىلعا دەيىن قازاقستانعا تاعى 40 باس پرجيەۆالسكي جىلقىسىن اكەلۋ جوسپارلانىپ وتىر. جۇمىس كەزەڭ-كەزەڭىمەن جۇرگىزىلىپ، جانۋارلاردىڭ جاعدايى مەن تابيعي ورتاعا بەيىمدەلۋ ناتيجەلەرى ەسكەرىلەدى. كەرقۇلاندى تاريحي مەكەنىنە قايتارۋ - سيرەك كەزدەسەتىن جانۋارلاردى قورعاۋعا جانە قازاقستاننىڭ تابيعي بيوالۋانتۇرلىلىگىن قالپىنا كەلتىرۋگە باعىتتالعان ماڭىزدى باستاما. قازاقستاندا دۇنيەگە كەلگەن العاشقى ەكى قۇلىن وسى جوبانىڭ كەلەشەگىنە دەگەن ءۇمىتتى ارتتىرا ءتۇستى.
24.kz
