قازا تاپقان يزرايلدىك ساربازداردىڭ جالپى سانى 556 عا جەتتى
گازا سەكتورىنىڭ وڭتۇستىگىندەگى جارىلىستان عيمارات قۇلاپ، 21 يزرايلدىك سارباز قازا تاپتى. بۇل تۋرالى 23-قاڭتاردا وتكەن باسپا ءسوز ءماسليحاتىندا يزرايل قورعانىس كۇشتەرىنىڭ باسپا ءسوز حاتشىسى دانيەل حاگاري مالىمدەدى، دەپ حابارلايدى Kazinform سينحۋاعا سىلتەمە جاساپ.
عيماراتتىڭ قۇلاۋىنا حاماس-تىڭ يزرايلدىك تانككە قارسى گراناتامەدتەن وق اتۋى سەبەپ بولعان. حاگاري يزرايل اسكەريلەرىنىڭ ايماقتاعى مىندەتىنىڭ ءبىرى - حاماس-قا تيەسىلى عيماراتتاردى جويۋ ەكەنىن ايتتى. شابۋىلعا ۇشىراعان تانك وسى وپەراتسيانى جۇزەگە اسىرىپ جاتقان اسكەري قىزمەتكەرلەردىڭ قاۋىپسىزدىگىن قامتاماسىز ەتكەن.
حاگاري قايتىس بولعانداردىڭ اراسىندا كوپتەگەن رەزەرۆشىلەر بار ەكەنىن ايتتى.
يزرايل پرەمەر-ءمينيسترى بينيامين نەتانياحۋ ءوز ەلىنىڭ ارمياسى تولىق جەڭىسكە جەتكەنشە حاماس-قا قارسى كۇرەستى جالعاستىراتىنىن ايتتى. نەتانياحۋ گازا سەكتورىنىڭ وڭتۇستىگىندە 21 ساربازدىڭ ءومىرىن قيعان عيماراتتىڭ قيراۋىن تەرگەۋگە ۋادە بەردى.
«س ح ا ل» اگەنتتىگىنىڭ حابارلاۋىنشا، گازا سەكتورىنداعى قۇرلىق وپەراتسياسى باستالعالى قازا تاپقان يزرايلدىك اسكەريلەردىڭ سانى 219 عا جەتكەن. 1200-دەن استام سارباز جارالانعان. DPA اگەنتتىگىنىڭ حابارلاۋىنشا، 2023 -جىلدىڭ 7-قازانىندا حاماس-تىڭ يزرايلگە جاساعان اۋقىمدى شابۋىلىنان كەيىن قازا تاپقان يزرايلدىك ساربازداردىڭ جالپى سانى 556 عا جەتكەن.
اۆتور
جاراسقان نۇرىبايەۆ
