قايىڭدى كولىنە اپاراتىن جولدىڭ قۇرىلىسى 2,5 ميلليارد تەڭگەگە باعالانىپ وتىر
قونايەۆ. KAZINFORM - الماتى وبلىسى كەگەن اۋدانىنىڭ اكىمى نۇرباقىت تەڭىزبايەۆ Kazinform اگەنتتىگىنىڭ تىلشىسىنە قايىڭدى كولىنە اپاراتىن جول قۇرىلىسى تۋرالى ايتىپ بەردى.
قايىڭدى كولىنە جاڭا جول سالۋ ماسەلەسى كوپتەن بەرى ايتىلىپ كەلەدى، اسىرەسە اتالعان جوبا 2023 -جىلدىڭ كۇزىندە قايىڭدى- ساتى تاۋلى جولىندا جولاۋشىلار مىنگەن اۆتوبۋس ۋاز كولىگىمەن سوقتىعىسقان قايعىلى جاعدايدان كەيىن قىزۋ تالقىلانىپ جاتىر.
جول 2024 -جىلى سالىناتىنى بەلگىلى بولدى.
اۋدان اكىمىنىڭ ايتۋىنشا، قازىر قايىڭدى كولىنە دەيىنگى 12 شاقىرىم جول قۇرىلىسىنىڭ جوبالىق-سمەتالىق قۇجاتتاماسى اياقتالدى.
- 12 شاقىرىم جولدىڭ 10 شاقىرىمىنا جوبا ازىرلەندى. سونداي- اق جەكە ينۆەستور باسقاراتىن اۆتوتۇراق سالۋ جوسپاردا. قۇجاتتار ءماسليحاتتىڭ قاراۋىنا جىبەرىلدى. وبلىس اكىمى ءوزى قولداپ وتىر. قۇرىلىستىڭ جالپى قۇنى -2,5 ميلليارد تەڭگەگە باعالانىپ وتىر، - دەدى نۇرباقىت تەڭىزبايەۆ.
اۋدان باسشىسىنىڭ سوزىنشە، جول قۇرىلىسى وسى جىلى باستالادى. بۇدان بولەك، ەلەكتر جەلىسىن تارتۋ جوسپاردا. ازىرگە جوبا ازىرلەنىپ جاتىر.
- ەلەكتر جەلىلەرىنە كەلەتىن بولساق، بۇل جوبانى جۇزەگە اسىرۋعا وبلىستىق بيۋدجەتتەن قارجى ءبولىنىپ قويعان. قازىر جوبالىق- سمەتالىق قۇجاتتامانى دايىنداپ جاتىرمىز. بۇل ءبىراز ۋاقىتتى الادى. جۇمىس اياقتالعاننان كەيىن قۇجاتتار مەملەكەتتىك ساراپتامادان وتەدى. جوباعا سايكەس، ۇزىندىعى 46 شاقىرىم - جالاعاش اۋىلىنان كولسايعا دەيىن ەلەكتر جەلىسىن تارتۋ قاراستىرىلعان، - دەدى نۇرباقتى تەڭىزبايەۆ.
سونىمەن قاتار، اۋدان باسشىسى جەكە ينۆەستور ەسەبىنەن كولساي كولىندە ەلەكتر قۋاتىن ءوندىرۋ جوباسى قاراستىرىلىپ جاتقانىن اتاپ ءوتتى. قۋاتتىلىعى 2 مەگاۆاتت شاعىن سۋ ەلەكتر ستانساسىن سالۋعا ۋاكىلەتتى ورگانداردان قاجەتتى رۇقسات قۇجاتتارى الىندى.
- بۇل ەلەكتر قۋاتىنىڭ كولەمى اۋماقتى تۇراقتى ەنەرگيامەن قامتاماسىز ەتۋگە جەتەدى. ءبىراق، ارينە، بۇل ءبىر كۇننىڭ ءىسى ەمەس. جۇمىس باستالىپ كەتتى، جوبا دايىن، قاراجات ءبولىندى. بارلىعىن جۇزەگە اسىرۋ ءۇشىن بىزگە ۋاقىت كەرەك. وزدەرىڭىز بىلەسىزدەر، بۇل وڭىردە تۋريزم بۇعان دەيىن سوڭعى جىلدارداعىداي قارقىندى دامىماعان. مىسالى، بىلتىر كولساي كولىنە 400 مىڭعا جۋىق ادام كەلگەن، بۇل جوعارى كورسەتكىش، - دەدى نۇرباقتى تەڭىزبايەۆ.
وسىعان دەيىن تۋريستەردىڭ قاۋىپسىزدىگىن كۇشەيتۋ ماقساتىندا قانداي جوبالار قولعا الىنعانى تۋرالى جازعان ەدىك.
سونداي-اق الماتى وبلىسىندا كوشپەندىلەر قالاشىعىنا جول سالىناتىنى تۋرالى جازعان بولاتىنبىز.
اۆتور
الما مۇقانوۆا
