قايتىس بولعان سالىمشىنىڭ زەينەتاقى قورىنداعى اقشاسى كىمگە بەرىلەدى

استانا. KAZINFORM - ءبىرىڭعاي جيناقتاۋشى زەينەتاقى قورى Kazinform ساۋالىنا جولداعان جاۋابىندا قايتىس بولعان سالىمشىنىڭ زەينەتاقى شوتىنداعى اقشا قالاي مۇراعا بەرىلەتىنىن ءتۇسىندىردى.

ازاماتتىق كودەكستىڭ 1038-بابى بويىنشا مارقۇمنىڭ اتىنداعى بانكتەر مەن شاعىن قارجى ۇيىمدارىنان العان بورىشى، نەسيەسى «مۇرا» بولىپ قالادى. ياعني، مۇراگەرلىكتى راسىمدەگەن تۋىستارى تولەۋگە مىندەتتەلەدى. ءدال وسى پرينتسيپ ازاماتتاردىڭ ءومىر بويى ەڭبەكتەنىپ جيناعان زەينەتاقى جيناعىنا قولدانىلا ما؟ قازاقستاندىقتار زەينەت جاسىنداعى تۋىسى قايتىس بولعان جاعدايدا ب ج ز ق- دان مۇراگەرلىك قاتىناستار بويىنشا قانداي دا ءبىر وتەماقى تالاپ ەتە الا ما؟ تالاپ ەتە الاتىن بولسا، ول قانداي تولەماقىلار؟

ب ج ز ق بۇل سۇراققا مىنانداي جاۋاپ بەردى.

«جەكە زەينەتاقى شوتتارىنداعى اقشا سالىمشىنىڭ مەنشىگى جانە سالىمشى قايتىس بولعاننان كەيىن دە ب ج ز ق- دا مەرزىمسىز ساقتالادى. تيىسىنشە، ولار مۇراعا قالدىرىلادى. ق ر الەۋمەتتىك كودەكسىنىڭ 40-بابىنىڭ 1-تارماعى بويىنشا مىندەتتى زەينەتاقى جارنالارىنىڭ سالىمشىلارى وزدەرىنىڭ زەينەتاقى جيناقتارىن وسيەت ەتۋگە قۇقىلى. وسيەت بولماعان كەزدە مۇراگەرلىك زاڭ بويىنشا كۇشىنە ەنەدى»، - دەپ جازىلعان جاۋاپتا.

اۋەلى قايتىس بولعان سالىمشىنىڭ زاڭدى مۇراگەرلەرى التى ايدىڭ ىشىندە جەرگىلىكتى نوتاريۋسكە بارۋ كەرەك.

«ق ر ازاماتتىق كودەكسىنە سايكەس مۇراگەر تولەمدەردى الۋ ءۇشىن مۇرا اشىلعان جەر (سالىمشىنىڭ قايتىس بولعان مەكەنجايى - رەد. ) بويىنشا نوتاريۋسقا مۇرانى قابىلداۋ تۋرالى ءوتىنىش بەرۋى ءتيىس. مۇنى مۇرا قالدىرۋشى قايتىس بولعان كۇننەن باستاپ التى اي ىشىندە جاساۋ كەرەك ەكەنىن ەسكەرگەن ءجون. نوتاريۋستار «ە- نوتاريات» جۇيەسى ارقىلى ءبىرىڭعاي جيناقتاۋشى زەينەتاقى قورىنان قايتىس بولعان ادامنىڭ جەكە زەينەتاقى شوتىنداعى اقشا قالدىقتارى مەن قوزعالىسى تۋرالى مالىمەتتەردى ونلاين رەجيمدە سۇراتا الادى.

زاڭدى مۇراگەرلەر نوتاريۋستا رەسىمدەلگەن مۇرا قۇجاتتارىن الىپ ب ج ز ق- نىڭ كەز كەلگەن بولىمشەسىنە جۇگىنەدى. جەكە وتىنىشپەن جۇگىنۋ مۇمكىندىگى بولماسا، نوتاريۋس ارقىلى سەنىم بىلدىرىلگەن تۇلعادان نەمەسە پوشتامەن جىبەرۋگە بولادى»، - دەلىنگەن مينيسترلىك مالىمەتىندە.

سونداي- اق، جاۋاپتا سالىمشىنىڭ وتباسى مۇشەلەرىنە مارقۇمنىڭ جەكە زەينەتاقى شوتىنان جەرلەۋ راسىمدەرىنىڭ شىعىنى رەتىندە 94 ايلىق ەسەپتىك كورسەتكىش (347048 تەڭگە - رەد. ) مولشەرىندە ءبىرجولعى تولەم جۇرگىزىلەتىنى ايتىلعان. بۇل تولەم جۇرگىزىلگەننەن كەيىن شوتتا قالعان اقشا ەڭ تومەنگى زەينەتاقى مولشەرىنەن اسپايتىن بولسا، ول قالدىق تا مارقۇمنىڭ وتباسى مۇشەلەرىنە جەرلەۋگە ارنالعان تولەم رەتىندە بەرىلەدى.

ۇلتتىق زاڭنامادا مۇراگەرلىك راسىمدەۋ قايتىس بولعان ادامنىڭ اكتيۆىنە يەلىك ەتۋمەن بىرگە موينىنداعى قارىز مىندەتتەمەلەرىن دە ارقالاۋعا مىندەتتەيدى. ياعني، ارتىندا قالعان نەسيەسىن وتەۋدەن باستا تارتىپ، زەينەتاقى شوتىنداعى اقشاسىن الۋ مۇمكىن ەمەس. مارقۇمنىڭ بانك پەن قارجى ۇيىمى الدىنداعى بورىشىن وتەۋدەن باس تارتساڭىز، اتىنداعى مۇلىكتەردى يەلەنۋ قۇقىعىنان دا باس تارتۋىڭىز كەرەك.

قور ماماندارى قايتىس بولعان سالىمشىنىڭ ارتىندا بىرنەشە مۇراگەرى قالسا، مۇرا قالاي بولىنەتىنىن ءتۇسىندىردى.

زاڭ بويىنشا مۇراگەر بولۋ قۇقىعىن بىرىنشى كەزەكتە مۇرا قالدىرۋشىنىڭ بالالارى، ونىڭ ىشىندە ول قايتىس بولعاننان كەيىن ءتىرى تۋعان بالالارى، سونداي-اق، مۇرا قالدىرۋشىنىڭ جۇبايى (زايىبى) مەن اتا-اناسى تەڭ ۇلەسپەن الادى.

ەكىنشى كەزەكتە مۇرا قالدىرۋشىنىڭ ءبىر اكە، ءبىر شەشەدەن تۋعان جانە اكەسى نەمەسە شەشەسى بولەك اعا-ىنىلەرى مەن اپا- قارىنداستارى (سىڭلىلەرى)، سونداي-اق، ونىڭ اكەسى جاعىنان دا، اناسى جاعىنان دا اتاسى مەن اجەسى - تەڭ ۇلەسپەن الادى.

ءۇشىنشى كەزەكتە مۇرا قالدىرۋشىنىڭ اكەسىمەن بىرگە تۋعان اعالارى مەن اپالارى، ناعاشى اعالارى مەن ناعاشى اپالارى تەڭ ۇلەسپەن الادى.

ءتورتىنشى كەزەكتەگى مۇراگەرلەر رەتىندە ءۇشىنشى تۋىستىق دارەجەسىندەگى تۋىستار - مۇرا قالدىرۋشىنىڭ ارعى اتالارى مەن اجەلەرى.

بەسىنشى كەزەكتەگى مۇراگەرلەر رەتىندە ءتورتىنشى تۋىستىق دارەجەسىندەگى تۋىستار - مۇرا قالدىرۋشىنىڭ تۋعان نەمەرە ءىنى-قارىنداستارىنىڭ، جيەندەرىنىڭ بالالارى (شوبەرە ءىنى-قارىنداستارى، جيەنشارلارى) جانە ونىڭ اتالارى مەن اجەلەرىنىڭ تۋعان اعا-ىنىلەرى مەن اپا- قارىنداستارى (سىڭلىلەرى).

التىنشى كەزەكتەگى مۇراگەرلەر رەتىندە بەسىنشى تۋىستىق دارەجەسىندەگى تۋىستار - مۇرا قالدىرۋشىنىڭ شوبەرە ىنى-قارىنداستارىنىڭ، جيەنشارلارىنىڭ بالالارى، ونىڭ نەمەرە اعا-ىنىلەرى مەن اپا- قارىنداستارىنىڭ (سىڭلىلەرىنىڭ) بالالارى جانە ونىڭ ەكى اتادان قوسىلاتىن اتالارى مەن اجەلەرىنىڭ بالالارى شاقىرىلادى.

جەتىنشى كەزەكتەگى مۇراگەرلەر رەتىندە مۇرا قالدىرۋشىمەن كەمىندە ون جىل ءبىر وتباسىندا تۇرعان مۇرا قالدىرۋشىنىڭ وگەي اكەسىنە نە وگەي شەشەسىنە ەرىپ كەلگەن اعا-ىنىلەرى مەن اپا- قارىنداستارى (سىڭلىلەرى)، وگەي ۇلدارى، وگەي قىزدارى، وگەي اكەسى جانە وگەي شەشەسى شاقىرىلادى.

اۆتور

ەسىمجان ناقتىباي