قايتارىلعان قاراجاتتىڭ ءبىر بولىگىن تۇرعىن ءۇي سالۋعا جۇمساۋ قاجەت - نۇرتاي سابيليانوۆ
استانا. KAZINFORM - ەلىمىزدە 647 مىڭنان استام ادام باسپانا كەزەگىندە تۇر. بۇل تۋرالى پرەمەر-مينيستر ولجاس بەكتەنوۆتىڭ اتىنا ساۋال جولداعان ءماجىلىس دەپۋتاتى نۇرتاي سابيليانوۆ ايتتى.
«اباي وبلىسىندا حالىقپەن كەزدەسۋلەر وتكىزگەندە كەزەكتە تۇرعان ازاماتتار تۇرعىن ۇيمەن قامتاماسىز ەتۋ ماسەلەسىن ءجيى كوتەردى. بۇل ماسەلە بارلىق وڭىردە وزەكتى بولىپ تۇر. ۋاكىلەتتى ورگاننىڭ اقپاراتىنا سايكەس، رەسپۋبليكا بويىنشا تۇرعىن ءۇي كەزەگىنە 647117 ادام تۇر. ونىڭ ىشىندە، استانا قالاسىندا - 40 مىڭ ادام، الماتى قالاسىندا - 43 مىڭ ادام، تۇركىستان وبلىسىندا - 62 مىڭ ادام، اقتوبە وبلىسىندا - 36 مىڭ ادام. 2024 -جىلعا رەسپۋبليكالىق بيۋدجەتتەن 5090 پاتەردى سالۋعا 69,3 ميلليارد تەڭگە قاراجات بولىنگەن. سونىمەن قاتار، 7522 پاتەرلى كرەديتتىك تۇرعىن ءۇيدى سالۋعا 87 ميلليارد تەڭگە قاراستىرىلعان. ول تەك كەزەكتە تۇرعان ادامدار سانىنىڭ 2 پايىزىن عانا تۇرعىن ۇيمەن قامتاماسىز ەتەدى»، - دەدى ءماجىلىس دەپۋتاتى.
ونىڭ دەرەگىنشە، اباي وبلىسىندا 19373 ازامات تۇرعىن ءۇي كەزەگىندە تۇر. ال، سەمەي قالاسىندا - 14000 ادام. دەپۋتاتتىڭ قابىلداۋىندا بولعان ازاماتتار كەزەكتەن ءۇي العانعا دەيىن ۋاقىتشا تۇراتىن ءۇي، جاتاقحانا بەرۋدى ۇيىمداستىرۋ تۋرالى ۇسىنىسىن جەتكىزگەن.
«جالپى، كەزەكتە تۇرعانداردى تۇرعىن ۇيمەن قامتاماسىز ەتۋدى جاقسارتۋ باعىتىندا پارلامەنت ءماجىلىسى ءتيىستى زاڭدارعا وزگەرىستەر ەنگىزىپ، جەرگىلىكتى اتقارۋشى ورگاندارعا دايىن تۇرعىن ۇيلەردى ساتىپ الۋ قۇزىرەتى بەرىلدى. قاراجات بولىنسە، كەزەكتە تۇرعان ادامدارعا ءۇي الۋ مۇمكىندىگى ارتادى. سونداي- اق، «زاڭسىز يەمدەنگەن اكتيۆتەردى مەملەكەتكە قايتارۋ تۋرالى» زاڭعا سايكەس مەملەكەتكە قايتارىلعان قاراجات الەۋمەتتىك جوبالارعا، تۇرعىن ۇيمەن قامتاماسىز ەتۋگە دە جۇمسالۋى قاجەت. «AMANAT» پارتياسىنىڭ سايلاۋالدى باعدارلاماسىندا 730 مىڭنان استام وتباسى ءۇشىن قولجەتىمدى باعاداعى جاڭا تۇرعىن ءۇي سالۋ جوسپارىن ىسكە اسىرۋ قاراستىرىلعان»، - دەدى ول.
وسىعان بايلانىستى نۇرتاي سابيليانوۆ ۇكىمەت باسشىسىنان مىناداي ماسەلەلەردى قاراستىرۋدى سۇرادى:
• رەسپۋبليكالىق بيۋدجەتتەن تۇرعىن ءۇي سالۋعا قوسىمشا قاراجات ءبولۋ؛
• زاڭسىز يەمدەلگەن اكتيۆتەردىڭ مەملەكەتكە قايتارىلعان قاراجاتىنىڭ ءبىر بولىگىن تۇرعىن ءۇي قۇرىلىسىنا جانە جاڭا ۇيلەردى ساتىپ الۋعا جۇمساۋ؛
• 3 جىلدىق رەسپۋبليكالىق بيۋدجەتتەن جەرگىلىكتى بيۋدجەتكە سۋبۆەنتسيا بەرگەندە تۇرعىن ءۇي سالۋعا، ساتىپ الۋعا قاجەتتى قاراجات قاراستىرۋ؛
• تۇرعىن ءۇي سالۋعا باعالى قاعازدار شىعارۋ ارقىلى قاراجات تارتۋ؛
• كەزەكتە تۇرعان ازاماتتاردى تۇرعىن ءۇي كەزەگى كەلگەنگە دەيىن ۋاقىتشا تۇراتىن ۇيمەن قامتاماسىز ەتۋ ماسەلەلەرىن قاراستىرۋ.
اۆتور
مارلان جيەمباي
